SEPANIA ke naga ya dilo tše di fapafapanego ka tsela yeo e bogegago ka yona le batho ba yona. Karolo e kgolo ya Sepania e na le mašemo a korong, mašemo a diterebe le mehlware. Go yela ka borwa, meetse a monabo wa dikhilomithara tše 14 a aroganya naga ya Sepania le kontinente ya Afrika.

Batho ba bantši—go akaretša le Bafenikia, Bagerika le batho ba Carthage—ba ile ba hudugela karolong ye ya ka borwabodikela bja Yuropa. Ge Baroma ba be ba fihla lekgolong la boraro la mengwaga B.C.E., ba ile ba bitša naga ya bona yeo ba bego ba sa tšwa go e thopa gore ke Hispania. Ka morago naga e ile ya dulwa ke ma-Visigoth le Mamoor, bao ka moka ba ilego ba tlogela bohwa bja setšo sa bona.

Ngwageng o mongwe wa morago bjale, batho ba fetago ba dimilione tše 68 ba ile ba etela Sepania. Ba bantši ba tlela  mahlasedi a letšatši, mabopo a santa ya mmala wa gauta le bakeng sa matlotlo a naga ye a tša bokgabo, a histori le a tša meago. Dijo tša Sepania le tšona di ratwa ke baeng ba bantši. Dijo tše di tlwaelegilego di akaretša tšeo di tšwago lewatleng, heme, mehuta ya setšhuu sa nama, disalate le merogo yeo e apeilwego ka makhura a mohlware goba yeo e tšhetšwego makhura ao. Dijo tša Sepania e lego mae ao a gadikilwego (omelet), paella le tapas di tsebja lefaseng ka bophara.

Batho ba Sepania ba na le bogwera e bile ba rata go bolela. Ba bantši ba ipolela gore ba tsena kereke ya Roma Katholika, eupša ke ba sego kae bao ba yago Mmiseng. Mengwageng ya morago bjale batho ba tšwago Afrika, Asia le Latin America ba hudugetše Sepania. Ba bantši ba rata go boledišana ka ditumelo tša bona le meetlo ya bona. Dihlatse tša Jehofa di bile le dipoledišano tše dibotse le bona gomme di kgonne go ba thuša go ithuta seo Beibele e se rutago ka ditaba tše dintši.

Ka 2015, Dihlatse tše fetago tše 10 500 di ile tša ithaopela go aga goba go mpshafatša mafelo a 70 ao di kopanelago go ona, ao a bitšwago Diholo tša Mmušo. Mebasepala e ile ya sega ditsha bakeng sa e mengwe ya meago yeo. E le go thuša bafaladi, Dihlatse tša Jehofa di swara diboka ka maleme a fetago a 30 go tlaleletša go la Sepanishi. Ka 2016, batho ba fetago ba 186 000 ba ile ba ba gona sebokeng se se kgethegilego seo se bego se swerwe ke Dihlatse tša Jehofa bakeng sa go gopola lehu la Jesu Kriste.