Banyalani bao ba hlomphago lenyalo la bona ba le lebelela e le la sa ruri, e bile ba ikwa ba šireletšegile. Yo mongwe le yo mongwe wa bona o kgodišegile gore yo mongwe a ka se mo tlogele le ge go ka ba le mathata.

Banyalani ba bangwe ba ikwa ba gapeletšega go dula mmogo ka gobane ba tšhaba gore bagwera ba bona, ba leloko le bašomigotee ba tla ba sola ge ba ka hlalana. Eupša selo seo se swanetšego go hlohleletša banyalani gore ba dule mmogo ke lerato le tlhompho.

MOLAO WA MOTHEO WA BEIBELE: “Monna a se ke a tlogela mosadi wa gagwe.”—1 Bakorinthe 7:11.

Micah o re: “Ge e ba o hlompha lenyalo la gago, o ka se kitimele go kgopišega. Go e na le moo, o tla kitimela go lebalela molekane wa gago le go mo kgopela tshwarelo. O tla lebelela mathata lenyalong e le mapheko feela, e sego lebaka la go hlala.”

Gantši ge banyalani bao ba sa hlomphego lenyalo la bona ba eba le mathata, ba phetha ka gore: ‘Re nyalane ka phošo,’ gomme ba nyaka mabaka a go hlalana.

Jean o re: “Batho ba bantši ba tsena lenyalong ba na le kgopolo ya gore ge dilo di pala ba tla no hlalana. Ge batho ba tsena lenyalong ba šetše ba na le dikgopolo tšeo, seo se bontšha gore ga ba hlomphe lenyalo la bona.”

ITLHAHLOBE

Ge wena le molekane wa gago le ngangišana . . . 

• Na o ikwa o itshola gore gore’ng le nyalane?

• Na o duma ge nkabe o nyalane le motho yo mongwe?

• Na o fela o bolela mantšu a go swana le gore: “Ke a go tlogela,” goba gore, “ga ke go rapele, ke tla hwetša motho yo a nthatago”?

Ge e ba o arabile ka ee go e nngwe ya dipotšišo tše, gona ke nako ya gore o lokiše lenyalo la gago.

BOLEDIŠANA LE MOLEKANE WA GAGO KA DIPOTŠIŠO TŠE

• Na re sa ratana go swana le peleng le go hlomphana? Ge e ba go se bjalo, bothata ke’ng?

• Ke’ng seo re ka se dirago gore re tsošološe lerato la rena?

DITŠHIŠINYO

• Fela o ngwalela molekane wa gago molaetša wa lerato

• Bontšha gore o rata molekane wa gago le go hlompha lenyalo la lena ka go bea dinepe tša gagwe tesekeng ya gago mošomong

• Founela molekane wa gago letšatši le lengwe le le lengwe ge o le mošomong goba ge le se mmogo

MOLAO WA MOTHEO WA BEIBELE: “Se Modimo a se tlemagantšego jokong go se be le motho yo a se aroganyago.”—Mateo 19:6.