SOO-JEONG, yo e lego moeletši wa tša thuto sekolong se se phagamego sa kua Korea Borwa, o bontšhitše klase ya gagwe dibidio tšeo a di tšerego Wepesaeteng ya jw.org. O re: “Ruri go a thabiša go bona tsela yeo barutwana ba arabelago ka yona ge ba bogetše bidio ya Mogwera wa Paale ke wa Mohuta Mang? Ge ba fetša go bogela bidio yeo ba ile ba hlalosa ka gore: ‘Ga se ra ka ra nagana ka segwera ka tsela yeo. Ruri ke tsela e mpsha ya go ruta!’ Ba bangwe ba boletše gore ba tla tsena Wepesaeteng ye nako le nako ge ba nyaka keletšo.” Soo-jeong o oketša ka gore: “Ke kgothaleditše bašomigotee gore ba bogele bidio yeo, gomme ba thabela go e diriša diklaseng tša bona.”

Bidio e nngwe yeo barutwana ba bantši kua Korea Borwa ba e thabelago ke ya dipopaye ya O ka Fenya Bomphenyašilo Ntle le go lwa. Mofahloši yo a šomago Mokgatlong wa go Thibela Bošoro bja Bafsa o bontšhitše klase ya barutwana bidio yeo. O itše: “Bidio ye e dira gore bana ba bantši ba tsepamiše kgopolo ka baka la mokgwa woo e hlamilwego ka wona. Go oketša moo, bidio yeo e a kgahliša ka ge e sa bontšhe feela ditsela tšeo ka tšona re ka lebeletšanago le bošoro eupša e bontšha gape le ditsela tšeo ka tšona re ka bo phemago.” Mokgatlo woo o ile wa kgopela tumelelo ya go diriša bidio ye ge o ruta dikolong tše dintši tša tlasana le tšeo di phagamego, ke moka o ile wa hwetša tumelelo. Balaodi ba maphodisa le bona ba diriša dibidio tšeo di hwetšwago go jw.org.

Ge e ba o se wa hlwa o tsena Wepesaeteng ya jw.org, ke ka baka la eng o sa dire bjalo? E bonolo go e diriša. O ka taonelouta mananeo a go theetšwa, dibidio, Beibele le dikgatišo tše dingwe tše dintši mahala.