“Banna ba Bohlale ba Bohlabela” e be e le Bomang?

Ditiragatšo tša go belegwa ga Jesu gantši di bontšha banna ba bararo bao ba aperego diaparo tše ditelele ba na le dikamela tša bona, ba fihla setaleng moo Jesu yo monyenyane a bego a robetše ka legopong. Baeng bao ba aperego gabotse kudu gantši ba bitšwa banna ba bohlale ba bohlabela. Beibele e bolela’ng ka bona?

Go ya ka Beibele, bao go thwego ke banna ba bohlale ba bohlabela ba be ba “e-tšwa dikarolong tša ka bohlabela,” gomme ba be ba kwele ka matswalo a Jesu fao. (Mateo 2:​1, 2, 9, bapiša le NW.) Go swanetše go ba go tšere banna bao nako e telele go fihla Judea. Ge mafelelong ba hwetša Jesu, e be e se sa le leseana le lego ka setaleng. Go e na le moo, banna ba ile ba hwetša Maria le “ngwana” ba dula ka ngwakong.​—⁠Mateo 2:⁠11.

Beibele e bitša banna ba gore ke banna ba bohlale ba bohlabela go­ba “balepi ba dinaledi,” gomme ga e bolele gore e be e le ba bakae. The Oxford Com­pan­ion to the Bible e hlalosa go­re: “Tswalano magareng ga maleatlana le bolepi bja dinaledi e bontšhwa ke go kgahlišwa ga baeng ke naledi yeo e ba eteletšego pele go ya Betlehema.” Beibele e ganetša ka mo go kwagalago mehuta ka mo­ka ya maleatlana le mekgwa ya ba-Babele ya go leka go hwetša tsebišo dinaleding.​—⁠Doiteronomio 18:​10-12; Jesaya 47:⁠13.

Tsebišo ye e bego e neilwe banna ba ga se ya lebiša mafelelong le ge e le afe a mabotse. E ile ya tsoša kgalefo ya lehufa ya Kgoši Heroda yo kgopo. Mafelelong se se ile sa lebiša go go tšhabela ga Josefa, Maria le Jesu Egipita, le go bolawa ga bana ka moka ba bašemane kua Betlehema go tloga ka “ba nywaxa e mebedi le ba ba ba hlatlamaxo.” Heroda o ile a nyakišiša ka kelohloko nako ya matswalo a Jesu go seo a se kwelego go balepi ba dinaledi. (Mateo 2:​16) Ka baka la mathata ka moka ao a bakilwego ke leeto la bona, ke mo go kwagalago go phetha ka gore naledi yeo ba e bonego le molaetša wa mabapi le “Kxoši ya Ba-Juda e sa tš’o xo bêlêxwa” di be di e-⁠tšwa go lenaba la Modimo e lego Sathane Diabolo, yo a bego a nyaka go bolaya Jesu.​—⁠Mateo 2:​1, 2.