‘Go Enywa Dienywa Botšofading’

BATHO ba bantši dinageng tša Mediterranean ba bjala mepalema ya ditatlele ka magaeng a bona. Mehlare ye e tsebja ka bobotse bja yona le ka dienywa tša yona tše bose. Go oketša moo, e tšwela pele e enywa nywageng e fetago e lekgolo.

Kgoši Salomo wa Isiraele ya bogologolo o ile a reta sebopego sa ngwanenyana yo mobotse wa Mosulami e le se se swanago le mopalema. (Sefela sa Difela 7:7, PK) Puku ya Plants of the Bible e re: “Mopalema wa ditatlele o bitšwa ‘tàmâr’ ka Seheberu. . . . O be o swantšhetša kgaugelo le botse bja Bajuda gomme basadi gantši ba be ba reelwa ka wona.” Ka mohlala, kgaetšedi yo mobotse wa Salomo ka motswadi o tee o be a bitšwa Thamara. (2 Samuele 13:1) Batswadi ba bangwe ba sa dutše ba bitša barwedi ba bona ka leina leo.

Ga se basadi ba babotse feela bao ba swantšhwago le mopalema. Mopsalme o opetše ka gore: “Moloki ó tlo taxa byalo ka sehlare sa [mopalema]; ó tlo mela bo-ka morôkwana thabeng ya Libanoni. Ba šemilwe mo Ngwakong wa Morêna, ba hloxa bà le malapeng a Modimo wa rena. Le xe e ka ba ba batála, ba enywa dienywa, ba hloxa botalá ba taxa.”—Psalme 92:12-14.

Ge re bolela ka tsela ya seswantšhetšo, bao ba hlankelago Modimo ka potego botšofading bja bona ba swana kudu le mopalema o mobotse. Beibele e re: “Hlôxô-pududu ké ’ala sa bothšephi; se hwetšwa tseleng ya xo loka.” (Diema 16:31) Gaešita le ge matla a bona a mmele a ka fokotšega ge ba dutše ba gola, batšofadi ba ka dula ba e-na le matla a moya ka go imatlafatša ka go ithuta Lentšu la Modimo, Beibele, ka mehla. (Psalme 1:1-3; Jeremia 17:7, 8) Ka baka la mantšu a bona a kgahlišago le mohlala o mobotse, batšofadi bao ba botegago ke mothopo o mobotse kudu wa kgothatšo go ba bangwe gomme ba tšwela pele ba enywa dienywa ngwaga o mongwe le o mongwe. (Tito 2:2-5; Baheberu 13:15, 16) Ka go swana le mopalema wa ditatlele, batšofadi ba ka enywa dienywa botšofading bja bona.