Na o Beetše Nako ka Thoko Bakeng sa go Ithuta Beibele?

NGWAGOLA, Sehlopha se Bušago se ile sa re tsebiša ka phetogo ya mabapi le thulaganyo ya diboka tša phuthego yeo e re neago nako e oketšegilego bakeng sa go ithuta le go ahla-ahla Beibele bjalo ka lapa. Ge e ba o le hlogo ya lapa, kgonthišetša gore o swara thuto ya Beibele e nago le morero le ya ka mehla le mosadi wa gago le bana. Banyalani ba se nago bana ba tla rata go diriša nako ye go ithuta Beibele ba le gotee. Bana babo rena le dikgaetšedi ba sego lenyalong e bile ba se na boikarabelo bja lapa ba tla kgona go diriša nako ye gabotse bakeng sa thuto ya Beibele ya motho ka noši.

Ba bantši ba ile ba bontšha tebogo ya bona bakeng sa tokišetšo ye ya mantšiboa a Borapedi bja Lapa. Ka mohlala, Kevin yo a hlankelago e le mogolo o ngwadile gore: “Mantšu ‘re a leboga’ ga a kgone go hlalosa ka botlalo kamoo re ikwago ka gona re le phuthego. Bjalo ka bagolo, re ile ra boledišana kamoo re dirišago bošego bjo botee bjo bo beetšwego ka thoko bakeng sa go dira sona seo Sehlopha se Bušago se se kgopetšego—go ithuta le malapa a rena.”

Jodi yoo monna wa gagwe e lego mogolo o ngwadile gore: “Re na le barwedi ba bararo, ba nywaga e 15, 11 le 2. Morago bjale re sa tšwa go hudugela phuthegong ya polelo ya diatla. Go nyakega nako e ntši kudu le maiteko e le gore re lokišetše diboka ka moka. Ga bjale, ka phetogo ye thulaganyong ya diboka, re na le mantšiboa a oketšegilego ao a re neago sebaka sa go lebiša tlhokomelo borapeding bja lapa!”

John le JoAnn, banyalani bao ba hlankelago bjalo ka babulamadibogo ba ka mehla, ba ngwadile gore: “Thuto ya rena ya lapa ya Beibele e be e dirwa ka sewelo ka gobane re swanetše go e pataganya le mešomo e mengwe ya phuthego. Tokišetšo ye e mpsha ke mpho e tšwago go Jehofa yeo e re lapološago moyeng—ge e ba re diriša nako ye ka tsela yeo re swanetšego go e diriša ka yona.”

Tony, e lego ngwanabo rena yo a sego a nyala le yo a lego nywageng ya magareng ya bo-20, o beetše ka thoko mantšiboa a Labobedi bjalo ka mantšiboa a gagwe a go ithuta. O diriša matšatši a mangwe a beke go lokišeletša diboka tša phuthego. Lega go le bjalo, Tony o re: “Ke dula ke letetše Labobedi ka phagahlo.” Lebaka? “Mantšiboa ao ke nako ya-ka e kgethegilego le Jehofa.” Tony o hlalosa gore: “Mo e ka bago ka diiri tše pedi, ke ithuta dihlogo tšeo di tiišago tswalano ya-ka le Jehofa. Go ba le nako e oketšegilego ya go ithuta go dira gore ke kgone go naganišiša ka ditemana tša Beibele tšeo ke di balago.” Mafelelo e ba afe? “Dikeletšo tša Jehofa di fihlelela gare-gare pelong ya-ka go feta le ge e le neng pele.” Na a ka re fa mohlala? “Ka pukung ya Insight, ke badile ka segwera sa Dafida le Jonathane. Ke ithutile mo gontši boemong bja kgopolo bja Jonathane bja go hloka boithati. Mohlala wa gagwe o nthušitše go bona seo se bolelwago ke go ba mogwera wa paale. Ke tloga ke lebeletše pele go hwetša tše dingwe tša ditherešo tše tša bohlokwa mantšiboeng a Labobedi!”

Ntle le pelaelo, bahlanka ka moka ba Jehofa ba tla holwa kudu ke go diriša gabotse nako ye e oketšegilego yeo ga bjale e hwetšagalago bakeng sa thuto e nago le morero ya Beibele le borapedi bja lapa.