Seo re Ithutago Sona go Jesu

Ka Mmušo wa Modimo

Mmušo wa Modimo ke Eng?

Mmušo wa Modimo ke pušo yeo e tlago go buša lefase ka moka. Jesu o itše: “Le swanetše go rapela ka tsela ye: . . . ’Mmušo wa gago a o tle. Thato ya gago a e direge le mo lefaseng.’”—Mateo 6:9, 10; Daniele 2:44.

Ke bomang bao ba tlago go buša Mmušong wa Modimo?

Jesu o belegetšwe go ba Mmuši wa Mmušo wa Modimo. Morongwa o boditše mmago Jesu gore: “Jehofa Modimo o tla mo nea sedulo sa bogoši sa Dafida tatagwe gomme o tla buša e le kgoši.” (Luka 1:30-33) Go oketša moo, Jesu o kgethile balatedi ba bangwe ba gagwe gore ba buše le yena. O itše go baapostola ba gagwe: “Ke lena bao le swareletšego le nna melekong ya-ka; gomme ke dira kgwerano le lena go etša ge Tate a dirile kgwerano le nna, ya mmušo.” (Luka 22:28, 29; Daniele 7:27) Palo-moka ya balatedi ba Jesu ba 144 000 e tla buša gotee le yena.—Kutollo 5:9, 10; 14:1.

Mmušo woo o tla hlongwa kae?

Mmušo wa Modimo o tla buša o le legodimong. Jesu o itše go barutiwa ba gagwe: “Ge e ba ke tloga ke e-ya go le lokišetša lefelo [legodimong], ke tla buša ka boa, gomme ka le amogela gae go nna gore moo ke lego gona le lena le be gona. . . . Ke a tloga ke ya go Tate.”—Johane 14:2, 3, 12; Daniele 7:13, 14.

Mmušo wa Modimo o tla dira’ng ka bokgopo?

Jesu o tla fediša batho ba kgopo lefaseng. Jesu o itše: “Ge Morwa wa motho [Jesu] a fihla ka letago la gagwe, le barongwa ka moka ba e-na le yena, o  tla dula sedulong sa gagwe sa bogoši sa letago. Ditšhaba ka moka di tla kgobokanywa pele ga gagwe, gomme o tla kgethologanya batho . . . Ba [kgopo] ba tla ya phedišong ya ka mo go sa felego, eupša baloki ba tla ya bophelong bjo bo sa felego.”—Mateo 25:31-34, 46.

Ke bomang bao ba tlago go phela mo lefaseng e le balata ba Mmušo?

Jesu o itše: “Go thaba ba moya o boleta, ka ge ba tla ja bohwa bja lefase.” (Mateo 5:5; Psalme 37:29; 72:8) Lefase le tla tlala ka batho bao gaešita le gona bjale ba ithutago go ratana. Jesu o itše go balatedi ba gagwe: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba-ka, ge e ba le ratana.”—Johane 13:34, 35.

Mmušo wa Modimo o tla direla batho eng mo lefaseng?

Jesu o tla fodiša batho malwetši. Ge a be a le mo lefaseng, Jesu o boletše le mašaba “ka mmušo wa Modimo gomme a fodiša bao ba nyakago go fodišwa.” (Luka 9:11) Ka morago ga go bona pono ya Jesu yo a tsošitšwego, moapostola Johane o itše: “Ka bona legodimo le lefsa le lefase le lefsa . . . ka kwa lentšu le le hlabošago le le tšwago sedulong sa bogoši le re: ‘Bonang! Tente ya Modimo e go batho . . . O tla phumola megokgo ka moka mahlong a bona, gomme lehu le ka se hlwe le sa ba gona.’”—Kutollo 21:1-4.

Mmušo wa Modimo o tla tsošološa lefase gore e be Paradeise. Sesenyi seo se ilego sa bolawa le Jesu se itše: “Jesu, o nkgopole ge o tsena mmušong wa gago.” Ke moka Jesu o ile a re go sona: “Ruri ke go botša lehono, o tla ba le nna Paradeiseng.”—Luka 23:42, 43; Jesaya 11:4-9.

Bakeng sa tsebišo e oketšegilego, bona kgaolo 8 pukung ya Ke Eng Seo ge e le Gabotse Beibele e se Rutago? *

[Mongwalo wa tlase]