Babadi ba Rena ba a Botšiša

Na Dikotsi tša Tlhago ke Kotlo e Tšwago go Modimo?

Modimo ga a diriše dikotsi tša tlhago go otla batho ba ba se nago molato. Ga se a ka a dira bjalo, le gona a ka se ke a dira bjalo le ka mohla. Ka baka la’ng? Ka gobane go 1 Johane 4:8 Beibele e re “Modimo ke lerato.”

Lerato ke mothopo wa selo se sengwe le se sengwe seo Modimo a se dirago. Lerato ga le kweše batho ba se nago molato bohloko, ka gobane Beibele e re “lerato ga le dire moagišani wa motho gampe.” (Baroma 13:10) Go Jobo 34:12, (PK) Beibele e re: “Ka kgonthe Modimo ga a na go dira bokgopo.”

Ke therešo gore Beibele e boletše e sa le pele ka dikotsi tšeo di tlago go direga mehleng ya rena, tše bjalo ka “ditšhišinyego tša lefase.” (Luka 21:11) Eupša Jehofa ga a ikarabele le gatee ka tshenyo yeo e bakwago ke dikotsi tšeo go fo swana le ge mmegi wa ditaba tša boemo bja leratadima a sa ikarabele ka tshenyo yeo e bakwago ke ledimo leo a boletšego ka lona e sa le pele. Ka gona, ge e ba Modimo a sa ikarabele ka tlaišego ya batho yeo e bakwago ke dikotsi tša tlhago, e bakwa ke’ng?

Beibele e utolla gore “lefase ka moka le rapaletše matleng a yo kgopo,” Sathane Diabolo. (1 Johane 5:19) E bile mmolai wa batho go tloga ge a rabela mathomong a go bopša ga batho go fihla le lehono. (Johane 8:44) Sathane o lebelela bophelo bja batho e se bja bohlokwa. O laolwa ke dikganyogo tša boithati, ka gona ga go makatše ge a hlodile tshepedišo ya lefase ka bophara yeo e tletšego moya wa boithati. Tshepedišo ya lefase ya lehono e kgothaletša tshwaro e mpe ya batho yeo e feleletšago ka gore batho bao ba sa kgonego go iphemela ba dule mafelong a kotsi, ao go nago le kgonagalo e kgolo ya gore a hlaselwe ke dikotsi tša tlhago goba tšeo di bakwago ke batho. (Baefeso 2:2; 1 Johane 2:16) Ka gona, batho bao ba nago le megabaru ba ikarabela ka dikotsi tše dingwe tšeo di hlaselago batho. (Mmoledi 8:9) Go bjalo bjang?

Bonyenyane karolo e itšego ya palo e makatšago ya dikotsi tša tlhago e bakwa ke batho. Ka mohlala, ela hloko mathata ao a ilego a wela badudi ba motse woo o ilego wa hlaselwa ke mafula wa New Orleans, kua U.S.A., goba dintlo tšeo di ilego tša senywa ke leraga leo le bego le ela kgaufsi le dithaba tšeo di lego lebopong la Venezuela. Maemong ao gotee le go a mangwe, ditiragalo tša tlhago tše bjalo ka madimo le dipula di ile tša baka tshenyo e kgolo ka baka la go se šetše ga batho, meago e sa agwago gabotse, go se rulaganye dilo gabotse, go se kwe ditemošo le diphošo tšeo di dirwago ke ba tša taolo.

Ela hloko kotsi yeo e ilego ya direga mehleng ya Beibele. Mehleng ya Jesu, go wa mo go sa letelwago ga tora go ile gwa bolaya batho ba 18. (Luka 13:4) Kotsi ye e ka ba e bakilwe ke phošo ya motho, “nako le ditiragalo tše di sa letelwago” goba dilo tše ka bobedi—eupša ga se ya bakwa ke kotlo ya Modimo le gatee.—Mmoledi 9:11, NW.

Na go na le dikotsi le ge e le dife tšeo di kilego tša bakwa ke Modimo? Ee, eupša ka go se swane le dikotši tša tlhago goba tšeo di bakwago ke batho, dikotsi tšeo di bego di bakwa ke Modimo di be di sa bolaye batho ka moka, di be di e-na le morero le gona di be di direga ka sewelo kudu. Mehlala e mebedi ke Meetse-fula a lefase ka bophara a mehleng ya mopatriareka Noa le go fedišwa ga metse ya Sodoma le Gomora mehleng ya Lota. (Genesi 6:7-9, 13; 18:20-32; 19:24) Dikahlolo tšeo tša Modimo di ile tša fediša batho ba kgopo bao ba bego ba ka se fetoge eupša tša phološa batho bao ba bego ba lokile mahlong a Modimo.

Ge e le gabotse, Jehofa Modimo o na le bokgoni, kganyogo le matla a go fediša tlaišego ka moka le go imolla batho ditla-moragong tša dikotsi tša tlhago. Psalme 72:12 e boletše e sa le pele mabapi le Kgoši e kgethilwego ya Modimo, Jesu Kriste gore: “Ó tlo hlakodiša modiitšana xe a lla, le mohlaki xe a hlôka monamodi.”