Ke ka Baka La’ng o Swanetše go Bontšha Tebogo?

“Raquel yo a Rategago,

Ke leboga kudu ge o ile wa ba mothopo wa kgothatšo go nna. Gaešita le ge o ka ba o sa tsebe seo, semelo sa gago se se kgothatšago le mantšu a gago a botho di nthušitše kudu.”—Jennifer.

NA O ile wa amogela lengwalwana leo o sa le letelago la tebogo? Ge e ba go le bjalo, ga go pelaelo gore mantšu a bjalo a ile a go thabiša. Ge e le gabotse, ke ga tlhago go nyaka go ikwa o tšeelwa godimo e bile o lebogwa.—Mateo 25:19-23.

Mantšu a tebogo gantši a aga tswalano e matla magareng ga monei le monewa. Go feta moo, motho yo a bontšhago tebogo o latela mohlala wa Jesu Kriste, yo a sa kago a palelwa ke go lemoga mediro e mebotse ya ba bangwe.—Mareka 14:3-9; Luka 21:1-4.

Ka manyami, go bonagala batho ba se sa bontšha tebogo ka mantšu le ka go ngwala. Beibele e lemošitše gore “mehleng ya bofelo” batho e tla ba “ba go se leboge.” (2 Timotheo 3:1, 2) Ge e ba re sa hlokomele, go ata ga go hloka tebogo mo go lego gona lehono go ka bipa maikwelo le ge e le afe a go bontšha tebogo ao re ka bago re e-na le ona.

Ke megato efe e šomago yeo batswadi ba ka e gatago go ruta bana ba bona kamoo ba ka bontšhago tebogo? Ke mang yo re swanetšego go mo leboga? Le gona, ke ka baka la’ng re swanetše go ba bao ba lebogago gaešita le ge batho bao re phelago le bona ba se na tebogo?

Ka Lapeng

Batswadi ba šoma ka thata go hlokomela bana ba bona. Lega go le bjalo, ka dinako tše dingwe batswadi ba ka ikwa eka maiteko a bona ga a lebogwe. Ba ka dira’ng e le gore ba lokiše boemo bjo? Go nyakega dilo tše tharo.

(1) Mohlala. Go swana le dibopego tše dintši tša go tlwaetša ngwana, mohlala ke tsela e atlegago ya go ruta bana. Ge Beibele e bolela ka mma yo a šomago ka thata Isiraeleng ya bogologolo e re: “Bana ba gagwe ba bolela gabotse ka yena.” Bana ba ba ithutile kae go bontšha tebogo? Karolo ya mafelelo ya temana ye e re nea karabo. E re: “Monna wa gagwe le yena o a mo reta.” (Diema 31:28, New Century Version) Batswadi bao ba bontšhanago tebogo ba bontšha bana ba bona gore mantšu a bjalo a thabiša yo a lebogwago, a matlafatša ditswalano tša lapa e bile ke pontšho ya go gola.

Tate yo a bitšwago Stephen o re: “Ke lekile go beela bana ba-ka mohlala ka go leboga mosadi wa-ka bakeng sa dijo tša mantšiboa.” Mafelelo e bile afe? Stephen o re: “Barwedi ba-ka ba babedi ba ile ba lemoga seo gomme se ba thušitše go lemoga bohlokwa bja go bontšha tebogo.” Ge e ba o le lenyalong, na ka mehla o leboga molekane wa gago bakeng sa go dira mediro ya ka gae ya letšatši le letšatši yeo go lego bonolo go e hlokomologa? Na o leboga bana ba gago gaešita le ge ba dira seo o letetšego gore ba se dire?

(2) Tlwaetšo. Maikwelo a go leboga a swana le matšoba. A swanetše go hlagolelwa e le gore a ka tšweletša mafelelo a makaone-kaone.  Batswadi ba ka thuša bana ba bona bjang go hlagolela le go bontšha tebogo? Kgoši Solomone yo bohlale o bontšhitše tsela e nngwe ya bohlokwa ge a be a ngwala gore: “Pelo ya moloki e akanya diphetolô.”—Diema 15:28.

Batswadi, na le ka tlwaetša bana ba lena go nagana ka maiteko le go ba le seatla se se bulegilego mo go sepedišanago le mpho e nngwe le e nngwe yeo ba e amogelago? Tsela ye ya go naganišiša e godiša tebogo go swana le ge mobu o dira gore matšoba a gole. Maria, yo a godišitšego bana ba bararo, o re: “Go nyakega nako e le gore o dule fase le bana ba gago gomme o ba hlalosetše seo se akaretšwago ge motho a ba nea mpho—gore motho yo mongwe o be a nagana ka wena gomme a nyaka go go bontšha kamoo a go ratago ka gona. Ke nagana gore batswadi ba swanetše go leka go dira bjalo.” Dipoledišano tše bjalo ga di thuše bana go ithuta feela seo ba swanetšego go se bolela ge ba bontšha tebogo eupša gape di ba thuša go ithuta lebaka leo ka lona ba swanetšego go bolela bjalo.

Batswadi ba bohlale ba thuša bana ba bona go phema go nagana gore ka tsela e itšego dilo ka moka tše dibotse tšeo ba di amogelago ba swanetše go di hwetša. * Temošo yeo e hwetšagalago go Diema 29:21 ya mabapi le go swara bahlanka e šoma ka tsela e swanago le go bana ge e re: “Mohlanka wa xo êkêlêlwa xo tšwa byaneng, ó tlo ba a re: le bohwa ke a ja.”

Bana ba banyenyane kudu ba ka thušwa bjang go bontšha tebogo? Linda, e lego mma wa bana ba bararo, o re: “Nna le monna wa-ka re ile ra kgothaletša bana ba rena go tšea karolo ge re ngwala mangwalwana a go leboga ka gore ba thale seswantšho seo se ka tsenywago ka lengwalwaneng goba gore ba ngwale maina a bona karateng.” Ke therešo gore seswantšho e ka ba sa boemo bja tlasana gomme gwa ba thata go bala mongwalo wa bona, eupša thuto yeo bana ba ithutago yona tirong ye ke ya bohlokwa.

(3) Go Phegelela. Ka moka ga rena re na le tshekamelo ya leabela ya boithati gomme tshekamelo ye e ka re šitiša go bontšha tebogo. (Genesi 8:21; Mateo 15:19) Lega go le bjalo, Beibele e kgothaletša bahlanka ba Modimo ka gore: “Le mpshafatšwe matleng a tutuetšago monagano wa lena, le apare motho yo mofsa yo a bopilwego go ya ka thato ya Modimo.”—Baefeso 4:23, 24.

Lega go le bjalo, batswadi bao ba nago le maitemogelo ba a tseba gore go thuša bana gore ba “apare motho yo mofsa” ga go bonolo. Stephen yo a tsopotšwego ka mo godimo o re: “Go ruta barwedi ba rena go leboga, ntle le go ba gopotša go dira bjalo, go bonagetše go tšea nako e telele.” Eupša Stephen le mosadi wa gagwe ga se ba ka ba langwa. Stephen o tšwela pele ka gore: “Ka go phegelela kudu, banenyana ba rena ba ile ba ithuta. Ga bjale re ikgantšha ka tsela yeo ba bontšhago tebogo go ba bangwe.”

Go Thwe’ng ka Bagwera le Baagišani?

Ge re palelwa ke go leboga, ga se gore ga re na tebogo, re fo ba re lebala. Na ruri go bohlokwa gore re bontšhe tebogo e sego feela go ikwa re e-na le yona? E le gore re arabe potšišo ye, ela hloko tiragalo yeo e akaretšago Jesu le balephera ba itšego.

Ge a be a e-ya Jerusalema, Jesu o ile a kopana le banna ba lesome bao ba bego ba e-na le lephera. Beibele e re: “Ba hlaboša mantšu a bona ba re: ‘Jesu, Morutiši, re gaugele!’ Eitše ge a ba bona a re go bona: ‘E-yang le iponagatše go baperisita.’ Ke moka ge ba sa dutše ba sepela, ba hlweka. Yo mongwe wa bona ge a bona gore o fodile, a boela morago a reta Modimo ka lentšu le le hlabošago. A wela fase ka sefahlego dinaong tša Jesu, a mo leboga; go feta moo, yena e be e le Mosamaria.”—Luka 17:11-16.

Na Jesu o ile a hlokomologa go palelwa ga ba bangwe ke go bontšha tebogo? Pego e tšwela pela ka gore: “Jesu ge a fetola a re: ‘Go hlwekišitšwe ba lesome, na ga go bjalo? Bjale, ba bangwe ba senyane ba kae? Na go hlokile ba ba boago go tla go reta Modimo, ge e se motho yo wa setšhaba se sengwe?’”—Luka 17:17, 18.

Balephera ba bangwe ba senyane e be e se batho ba kgopo. Pejana, ba be ba ile ba bontšha tumelo  go Jesu phatlalatša gomme ka go rata ba kwa ditaelo tša gagwe, tšeo di bego di akaretša go ya Jerusalema go yo iponagatša go baperisita. Lega go le bjalo, gaešita le ge ka ntle le pelaelo ba ile ba ikwa ba e-na le tebogo e tseneletšego bakeng sa seo Jesu a ba diretšego sona ka botho, ba ile ba palelwa ke go mmontšha tebogo yeo. Boitshwaro bja bona bo ile bja nyamiša Kriste. Go thwe’ng ka rena? Ge motho yo mongwe a re swara gabotse, na re akgofela go mo leboga gomme ge e ba go swanetše, ra bontšha tebogo ka go mo ngwalela lengwalwana?

Beibele e re “lerato ga le itshware gampe e bile ga le na boithati.” (1 Bakorinthe 13:5, Today’s English Version) Ka gona, go bontšha tebogo ka go tšwa pelong ga se feela leswao la mekgwa e mebotse eupša gape ke bohlatse bja lerato. Bjalo ka ge tiragalo yeo e akaretšago balephera e re ruta, bao ba nyakago go thabiša Kriste ba swanetše go bontšha batho bohle lerato le bjalo le tebogo, go sa šetšwe gore ba tšwa setšhabeng sefe, morafo goba bodumedi.

Ipotšiše gore, ‘Ke neng la mafelelo moo ke ilego ka leboga moagišani wa-ka, mošomi-gotee le nna, motho yoo ke tsenago sekolo le yena, mošomi wa sepetlele, ra-lebenkele goba motho yo a itšego yo a ilego a nthuša?’ Ke ka baka la’ng ka letšatši le tee goba a mabedi o sa ngwale makga ao ka ona o tlogago o leboga goba o ngwalago lengwalana la tebogo? Go ngwala ka tsela yeo go ka go thuša go bona moo o ka kaonefatšago gona go bontšheng ga gago tebogo.

Ke therešo gore yoo re swanetšego go mo leboga kudu ke Jehofa Modimo. Ke Monei wa “mpho e nngwe le e nngwe e botse le neo e nngwe le e nngwe e phethagetšego.” (Jakobo 1:17) O feleleditše neng go leboga Modimo e le ka kgonthe bakeng sa dilo tše itšego tšeo a go diretšego tšona?—1 Bathesalonika 5:17, 18.

Ke ka Baka La’ng o Swanetše go Leboga Mola ba Bangwe ba sa Leboge?

Go ka direga gore ba bangwe ba se leboge ge re ba direla dilo tše itšego. Ka gona, ke ka baka la’ng re swanetše go bontšha tebogo gaešita le ge ba bangwe ba sa e bontšhe? Ela hloko lebaka le tee feela.

Ka go dira botse go bao ba se nago tebogo, re tla ba re ekiša Mmopi wa rena yo a nago le kgaugelo, Jehofa Modimo. Taba ya gore ba bantši ga ba leboge lerato leo Jehofa a ba bontšhago lona ga e mo thibele go ba direla botse. (Baroma 5:8; 1 Johane 4:9, 10) O “hlabišetša ba kgopo le ba bolo letšatši la gagwe gomme a nešetša ba lokilego le ba sa lokago pula.” Ge e ba re katanela go bontšha tebogo go sa šetšwe go phela ga rena lefaseng le se nago tebogo, re tla ba re itlhatsela re le “barwa ba Tatago [rena] yo a lego magodimong.”—Mateo 5:45.

[Mongwalo wa tlase]

[Ntlhakgolo go letlakala 15]

Ka letšatši le tee goba a mabedi ngwala makga ao ka ona o tlogago o leboga

[Seswantšho go letlakala 15]

Beela bana ba gago mohlala wa go bontšha tebogo

[Seswantšho go letlakala 15]

Gaešita le bana ba banyenyane ba ka tlwaetšwa go bontšha tebogo