Babadi ba Rena ba a Botšiša

Na Lefase le tla Phologa?

Lefase la rena le ka se senywe ke kotsi le ge e le efe. Ke ka baka la’ng re ka kgodišega ka seo? Ka gobane Modimo o holofetša gore lefase “Le ka se tsoge le thekesetše go iša mehleng ya neng le neng, le ka mo go sa felego.” (Psalme 104:5, NW) Beibele e re gaešita le ge ‘moloko o ile go tla o mongwe, lefase lona le dula le le gona.’—Mmoledi 1:4.

Go Psalme 104:5, go ba gona ga lefase ka mo go sa felego go gatelelwa ke mantšu a mabedi ao a dirišitšwego tabeng ya mathomo e ngwadilwego ya Seheberu temaneng yeo—ʽoh lamʹ bakeng sa “neng le neng” le ʽadh bakeng sa “ka mo go sa felego.” ʽOh lamʹ e ka fetolelwa e le “nywaga e mentši” goba “ka mehla.” Go ya ka Harkavy ’s Students’ Hebrew and Chaldee Dictionary, ʽadh e bolela “lebaka la nako, go se felele, ka mo go sa felego, sa ruri.” Mantšu a a mabedi a Seheberu a bontšha go ba gona ka mo go sa felego ga lefase e le ka kgonthe. Ela hloko mabaka a mararo a oketšegilego ao a theilwego Beibeleng a go dumela gore lefase le tla dula le le gona ka mo go sa felego.

La pele, Modimo o dirile lefase gore le dulwe ke batho—e be le le tšweletšago, e be paradeise ya lefase ka bophara yeo e kgahlišago, e sego lefelo le le senyegilego leo go sa kgonegego gore batho ba dule go lona. Jesaya 45:18 e hlalosa Jehofa e le “Morêna Mo-hlôla-maxodimo, Yêna Modimo-dimo Mmopi wa lefase, a le dira a le thêkxa, a se le bope ya ba la lefêla, a le dirêla xo dulwa ke batho.”

La bobedi, Modimo o holofeditše kgale gore batho bao ba kgethago go mo kwa ba tla dula ka mo go sa felego mo lefaseng ka khutšo. Mika 4:4 e holofetša gore: “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo; ka xobane xo boletše molomo wa Morêna wa mašaba.” Ka go realo, go ya ka morero wa Modimo, lefase le swanetše go dula le le gona ka mo go sa felego e le legae la batho, ge e ba go be go se bjalo dikholofetšo tša gagwe e be e tla ba tša lefeela.—Psalme 119:90; Jesaya 55:11; 1 Johane 2:17.

La boraro, Modimo o neile batho boikarabelo bja go hlokomela lefase le. Lentšu la Modimo le re “Maxodimo ké maxodimo a Morêna; ’me lefase ó le neetše bana ba batho.” (Psalme 115:16) Na o ka akanya ka tate yo lerato yo a neago ngwana wa gagwe mpho e botse gomme ka morago a e senya? Le gatee! Ka mo go swanago, Jehofa le yena a ka se dire selo le ge e le sefe se se swanago le seo ka lefase le badudi ba lona, ka gobane “Modimo ke lerato.”—1 Johane 4:8.

Jesu Kriste o neile kgonthišetšo ya se mabapi le Tatagwe ge a be a re: “Lentšu la gago ke therešo.” (Johane 17:17) Le gona, Modimo, yo a ka se kego a aketša, o holofetša gore: “Baloki e ba beng ba naxa, ba dula mo xo yôna ka mehla le ka mehla.”—Psalme 37:29; Tito 1:2.

[Mothopo wa Seswantšho go letlakala 31]

Globe: Based on NASA photo