NA O kile wa bona batho ba bangwe ba dira dilo tše mpe?— * Samuele o ile a ba bona. O be a dula lefelong leo o bego o ka se letele gore go direge dilo tše bjalo. E be e le tabarenakeleng ya Modimo goba lefelong la borapedi, motseng wa Silo. Anke re bone kamoo tabarenakele e ilego ya ba legae la Samuele nywageng e fetago 3 000 e fetilego.

Pele Samuele a belegwa, mmagwe e lego Hanna, o be a tloga a nyaka ngwana. Nakong ya ge a be a etetše tabarenakeleng, Hanna o ile rapela Modimo ka taba ye. O be a rapela ka go tšwa pelong moo molomo wa gagwe o bego o thothomela. Se se ile sa dira gore moperisita yo mogolo e lego Eli, a nagane gore o tagilwe. Ge a lemoga gore ga se a tagwa eupša o gateletšegile kudu, Eli o ile a mo šegofatša a re: “Modimo wa Isiraele O tlo Xo nea tše O di kxopetšexo xo Yêna.”—1 Samuele 1:17.

Ka morago, Samuele o ile a belegwa gomme Hanna a thaba kudu moo a ilego a botša monna wa gagwe Elikana gore: ‘Gatee-tee ge ke kgaotša go nyantšha Samuele, ke tla mo iša tabarenakeleng gore a yo hlankela Modimo moo.’ Ka gona, o ile a dira seo! Ka nako yeo, Samuele a ka ba a be a e-na le nywaga e mene goba e mehlano.

Eli o be a tšofetše gomme barwa ba gagwe e lego Hofini le Pinease ba be ba sa rapele Jehofa ka tsela e swanetšego. E bile ba be ba itshwara ka tsela e gobogilego le basadi bao ba bego ba e-tla tabarenakeleng! O nagana gore ke’ng seo tatago bona a ka bego a ile a se dira?— Ee, a ka be a ile a ba kgalemela gomme a se ba dumelele go dira dilo tšeo tše mpe.

Samuele yo monyenyane o be a gola a le moo tabarenakeleng gomme mohlomongwe o be a tseba ka boitshwaro bjo bobe bja barwa ba Eli. Na Samuele o ile a latela mohlala wa bona o mobe?— Aowa, o ile a tšwela pele a dira seo se nepagetšego, go etša ge batswadi ba gagwe ba be ba mo rutile go dira bjalo. Lega go le bjalo, ga go makatše ge Jehofa a ile a galefela Eli. O ile a ba a romela moporofeta gore a yo botša Eli kamoo A bego a tla otla lapa la Eli ka gona, kudu-kudu barwa ba gagwe ba babe.—1 Samuele 2:22-36.

Samuele o ile a tšwela pele a hlankela le Eli tabarenakeleng. Ke moka, bošegong bjo bongwe ge Samuele a be a robetše, o ile a kwa lentšu le bitša leina la gagwe. Ka gona, Samuele o ile a kitimela go Eli, eupša Eli o ile a mmotša gore ga se a ka a mmitša. Selo se se swanago se ile sa direga gape. Ge e le gabotse, ka morago ga gore selo se se swanago se direge ka lekga la boraro, Eli o ile a botša Samuele gore a re: “Morêna, bolêla; mohlanka wa xaxo ó theeditše.” Ge Samuele a boletše seo, Jehofa o ile a bolela le yena. Na o tseba seo Jehofa a ilego a se botša Samuele?—

Bjale Modimo o ile a botša Samuele ka morero wa Gagwe woo a bego a o boletše e sa le pele wa go otla lapa la Eli. Mesong e latetšego, Samuele o ile a boifa go botša Eli seo Jehofa a mmoditšego sona. Eupša Eli o ile a lopa Samuele ka gore: “Hlê O se mphihlêlê selô.” Ka gona, mafelelong Samuele o ile a botša Eli dilo ka moka tšeo Jehofa a boletšego gore O tla di dira—go etša ge moporofeta wa Jehofa a be a boditše Eli pejana. Eli o ile a araba ka gore: “Morêna, a a dirê tše a bônaxo è le botse.” Mafelelong, Hofini le Pinease ba ile ba bolawa gomme Eli le yena o ile a hwa.—1 Samuele 3:1-18.

Kgabagareng, “Samuele, yêna a xola. Morêna a êma le yêna.” Ka nako yeo, mohlomongwe Samuele e be e le mofsa yo a lego mahlalagading e lego nako ya bohlokwa bophelong bja bafsa. Na o nagana gore go be go le bonolo bakeng sa Samuele go tšwela pele a dira seo se nepagetšego gaešita le ge ba bangwe ba be ba sa dire bjalo?— Gaešita le ge go be go se bonolo, Samuele o ile a hlankela Jehofa ka potego bophelo bja gagwe ka moka.—1 Samuele 3:19-21.

Go thwe’ng ka wena? Na o tla swana le Samuele ge o gola? Na o tla tšwela pele o dira seo se nepagetšego? Na o tla tšwela pele go kgomarela dithuto tša Beibele le seo batswadi ba gago ba go rutilego sona? Ge e ba o dira bjalo, o tla thabiša Jehofa le batswadi ba gago.