Go Ikona​—Dijo Na go go Batametša Kgaufsi le Modimo?

‘Go ikona dijo ke selo seo se go thušago go naganišiša ka tswalano ya gago le Modimo le go go gopotša gore dilo tše di bonagalago ga se tše bohlokwa kudu bophelong.’—MOSADI WA MOKATHOLIKA.

‘Go ikona dijo go go thuša gore o be le kgokagano le Modimo.’—RABI WA MOJUDA.

‘Tumelong ya-ka, go ikona dijo ke senyakwa, selo seo se bontšhago boineelo bja-ka le tebogo ya-ka go Modimo. Ke ikona dijo ka gobane ke rata Modimo.’—MOLATEDI WA TUMELO YA BAHA’I.

GO IKONA dijo ke mokgwa wo o tlwaelegilego madumeding a mantši a lefase, go akaretša le a Bobuddha, Bohindu, Bomoseleme, bo-Jain le Bojuda. Batho ba bantši ba dumela gore go ikona dijo lebaka le itšego la nako go ba batametša kgaufsi le Modimo.

Wena o nagana’ng? Na o swanetše go ikona dijo? Lentšu la Modimo, Beibele, le bolela’ng ka taba ye?

Dinako tša go Ikona Dijo Mehleng ya Beibele

Mehleng ya Beibele, batho ba be ba ikona dijo ka mabaka a fapa-fapanego ao Modimo a bego a a amogela. Ba bangwe ba be ba ikona dijo bakeng sa go bontšha gore ba nyamišitšwe kudu ke dibe tša bona goba gore ba itshola (1 Samuele 7:4-6), go kgopela kamogelo ya Modimo goba go tsoma tlhahlo ya gagwe (Baahlodi 20:26-28; Luka 2:36, 37), goba go kaonefatša bokgoni bja go tsepamiša kgopolo ge go naganišišwa.—Mateo 4:1, 2.

Lega go le bjalo, Beibele gape e bolela ka go ikona dijo moo Modimo a bego a sa go amogele. Kgoši Saulo o ile a ikona dijo pele a ka ya go senoge. (Lefitiko 20:6; 1 Samuele 28:20) Batho ba kgopo, bjalo ka Isebele gotee le batho bao ba bego ba fišegela go bolaya moapostola Paulo, ba ile ba beela nako ka thoko bakeng sa go ikona dijo. (1 Dikxoši 21:7-12; Ditiro 23:12-14) Bafarisei ba be ba tsebja ka mokgwa wa bona wa ka mehla wa go ikona dijo. (Mareka 2:18) Lega go le bjalo, Jesu o ile a ba sola gomme ba ile ba palelwa ke go kgahla Modimo. (Mateo 6:16; Luka 18:12) Ka mo go swanago, Jehofa o ile a hlokomologa go ikona dijo ga Baisiraele ba bangwe ka baka la boitshwaro bja bona bjo bobe gotee le maikemišetšo a bona a fošagetšego.—Jeremia 14:12.

Mehlala ye e bontšha gore go ikona dijo ga se  gona mo go kgahlago Modimo. Lega go le bjalo, bahlanka ba bantši ba botegago ba Modimo bao ba kilego ba ikona dijo ba ile ba amogelwa ke Modimo. Ka gona, na Bakriste ba swanetše go ikona dijo?

Na Bakriste ba Swanetše go Ikona Dijo?

Molao wa Moše o ile wa nea Bajuda taelo ya gore ba “ikokobetšê,” ke gore, ba ikone dijo, gatee ka ngwaga ka Letšatši la Poelanyo. (Lefitiko 16:29-31; Psalme 35:13) Lebaka le e be e le lona feela leo ka lona Jehofa a ilego a laela batho ba gagwe gore ba ikone dijo. * Bajuda bao ba bego ba phela ka tlase ga Molao wa Moše ba swanetše go ba ba ile ba kwa taelo yeo. Eupša Bakriste ga ba ka tlase ga Molao wa Moše.—Baroma 10:4; Bakolose 2:14.

Gaešita le ge Jesu a be a ikona dijo bjalo ka ge Molao o be o laela, o be a sa tsebje ka mokgwa wo. O ile a botša barutiwa ba gagwe kamoo ba swanetšego go itshwara ka gona ge e ba ba kgetha go ikona dijo, eupša ga se a ka a ba laela gore ba ikone dijo. (Mateo 6:16-18; 9:14) Bjale, ke ka baka la’ng Jesu a ile a bolela gore barutiwa ba gagwe ba be ba tla ikona dijo ka morago ga lehu la gagwe? (Mateo 9:15) Se e be e se taelo. Mantšu a Jesu a šišinya gore ge a e-hwa barutiwa ba gagwe ba be ba tlo nyama kudu le gore ba be ba ka se dume dijo.

Dipego tše pedi tša Beibele tša Bakriste ba lekgolong la pele la nywaga bao ba ilego ba ikona dijo di bontšha gore ge e ba motho a kgetha go ikona dijo ka maikemišetšo a mabotse, Modimo o a mo amogela. (Ditiro 13:2, 3; 14:23) * Ka gona, Bakriste ga ba gapeletšege go ikona dijo. Lega go le bjalo, motho yo a kgethago go dira bjalo o swanetše go ela hloko dikotsi tše itšego.

Hlokomela Dikotsi

Kotsi e nngwe yeo e swanetšego go phengwa mabapi le go ikona dijo ke go itira moloki. Beibele e lemoša malebana le go ba le “boikokobetšo bja bofora.” (Bakolose 2:20-23) Papišo ya Jesu ya Mofarisei yo a bego a ipona a itshwere gabotse go phala ba bangwe ka baka la go ikona dijo ga gagwe ka mehla e bontšha gabotse gore Modimo ga a amogele boemo bjo bjalo bja kgopolo.—Luka 18:9-14.

Le gona, e ka ba phošo go bolela phatlalatša gore o ikona dijo goba go ikona dijo ka baka la gore motho yo mongwe a go botša gore o dire bjalo. Go ya ka Mateo 6:16-18, Jesu o file keletšo ya gore go ikona dijo e swanetše go ba taba ya ka sephiring, magareng ga motho le Modimo le gore ga se wa swanela go e tsebiša ba bangwe.

Motho ga se a swanela go nagana gore go ikona dijo go lefelela dibe ka tsela e itšego. Gore go ikona dijo ga gago go amogelwe ke Modimo, o swanetše go kwa melao ya gagwe. (Jesaya 58:3-7) Go itshola go tšwa pelong, e sego go ikona dijo, ke seo se lebišago go lebalelweng dibe.  (Joele 2:12, 13) Beibele e gatelela gore re lebalelwa ka baka la botho bjo bo sa swanelago bja Jehofa bjoo bo bontšhitšwego ka sehlabelo sa Kriste. Ga go kgonege gore motho a hwetše tebalelo e le moputso wa modiro le ge e le ofe, go akaretša le go ikona dijo.—Baroma 3:24, 27, 28; Bagalatia 2:16; Baefeso 2:8, 9.

Jesaya 58:3 e bontšha phošo e nngwe e tlwaelegilego. Baisiraele ba be ba šišinya gore Jehofa o be a ba kolota moputso ka baka la go ikona dijo ga bona, mo ekago go ikona dijo ga bona go be go hola Modimo. Ba ile ba botšiša gore: “O re’ng O sa re bône xe re ikôna dijô? O re’ng O sa re tsebe xe re ithsetla dipelo?” Ba bantši lehono le bona ba nagana gore Modimo o tla ba putsa ka baka la go ikona dijo. Anke le ka mohla re se ke ra ekiša boemo bjo bjalo bja kgopolo bjo bo hlokago tlhompho le bjo e sego bja Mangwalo!

Ba bangwe ba dumela gore go a kgonega gore motho a swanelwe ke moputso wa Modimo ka go ineela bohlokong bja go ikona dijo, ka go ikotla, bjalo-bjalo. Lentšu la Modimo le sola kgopolo e bjalo, e bile le bontšha gore “tshwaro e šoro ya mmele” ga e “na mohola go lwantšheng” dikganyogo tše di fošagetšego.—Bakolose 2:20-23.

Pono e Leka-lekanego

Go ikona dijo ga se kgapeletšo; e bile ga se mo go fošagetšego. Go ka ba le mohola maemong a mangwe ge e ba go phengwa dikotsi tše di hlalositšwego ka mo godimo. Lega go le bjalo, go ikona dijo ga go dire gore borapedi bja rena bo amogelege. Jehofa ke “Modimo yo a thabilego,” gomme o nyaka gore bahlanka ba gagwe ba thabe. (1 Timotheo 1:11) Lentšu la gagwe le re: “Xa xo se se botse mo xo bôná, xe e se . . . [gore] ké neô ya Modimo, xe motho a e-ja, a e-nwa, ’me a bôna tše di botse ka ’tapišô tš’axwe tšohle.”—Mmoledi 3:12, 13.

Borapedi bja rena e swanetše go ba bjo bo thabišago, eupša ga go moo Beibele e tswalanyago go ikona dijo le lethabo. Go oketša moo, ge e ba go ikona dijo go ka kgoma boemo bja rena bja tša maphelo gampe goba gwa re amoga matla a rena a go phetha modiro o thabišago woo Mmopi wa rena a o filego Bakriste ba therešo—e lego wa go bolela ditaba tše dibotse tša Mmušo—gona go molaleng gore re ka se fihlelele pakane ya rena.

Go sa šetšwe gore re kgetha go ikona dijo goba go se ikone dijo, re swanetše go phema go ahlola ba bangwe. Gare ga Bakriste ba therešo, ga se gwa swanela go ba le ngangišano ya mabapi le taba ye, “gobane mmušo wa Modimo ga se go ja le go nwa, eupša ke toko le khutšo le lethabo ka moya o mokgethwa.”—Baroma 14:17.

[Mengwalo ya tlase]

[Ntlhakgolo go letlakala 28]

Bafarisei ba be ba bonagatša boikokobetšo bja bofora ge ba be ba ikona dijo

[Ntlhakgolo go letlakala 29]

“Mmušo wa Modimo ga se go ja le go nwa, eupša ke toko le khutšo le lethabo”

[Lepokisi go letlakala 29]

Go Thwe’ng ka Lent?

Go ikona dijo matšatši a 40 ga Lent go thwe ke go keteka matšatši a 40 a go ikona dijo ga Kriste. Lega go le bjalo, Jesu ga se a ka laela barutiwa ba gagwe gore ba keteke go ikona dijo ga gagwe, e bile ga go na bohlatse bja gore ba ile ba dira bjalo. Tšhupetšo ya pele e ka botwago ya mabapi le go ikona dijo ka matšatši a 40 pele ga Easter go thwe e ka mangwalong a Athanasius a 330 C.E.

Ka ge Jesu a ile a ikona dijo ka morago ga kolobetšo ya gagwe e sego pele ga lehu la gagwe, taba ya gore madumedi a mangwe a keteka Lent dibekeng tša pele ga Easter e ka bonagala e makatša. Lega go le bjalo, go ikona dijo matšatši a 40 karolong ya pele ya ngwaga e be e tlwaelegile go Bababilona ba mehleng ya bogologolo, Baegipita le Bagerika. Go molaleng gore mokgwa wo woo go thwego ke wa Bokriste o tšerwe go bona.