Vatican e Nyaka go Fediša go Dirišwa ga Leina la Modimo
Vatican e Nyaka go Fediša go Dirišwa ga Leina la Modimo
SEHLOPHA sa baruti seo se nago le taolo ka Kerekeng ya Katholika se nyaka go fediša go dirišwa ga leina la Modimo ditirelong tša bona tša kereke. Ngwagola, Phuthego ya Vatican ya Borapedi bja Modimo le Tayo ya Ditirelo (Vatican Congregation for Divine Worship and the Discipline of the Sacraments) e ile ya romela ditaelo tša mabapi le taba ye dikopanong tša bapišopo ba Katholika lefaseng ka bophara. Mopapa ke yena a ilego “a laela” gore go gatwe mogato wo.
Lengwalo le leo le ngwadilwego ka June 29, 2008, le bolela gore go sa šetšwe gore ditaelo tšeo di be di laela seo se fapanego, “nywageng ya morago bjale go tšweletše mokgwa wa go bitša leina le le swanetšego la Modimo wa Isiraele, leo le tsebjago e le tetragrammaton e kgethwa goba ya Modimo, yeo e ngwadilwego ka ditumammogo tše nne tša ditlhaka tša Seheberu ka sebopego sa יהוה, YHWH.” Lengwalo le le bontšha gore leina la Modimo le fetoletšwe ka makga a mmalwa a fapa-fapanego e le “Yahweh,” “Yahwè,” “Jahweh,” “Jahwè,” “Jave,” “Jehofa,” bjalo bjalo. * Lega go le bjalo, taelo ya Vatican e nyaka go tsošološa boemo bja kgale bja Katholika. Seo se bolela gore Tetragrammaton e tla tšeelwa legato ke “Morena.” Go oketša moo, ditirelong tša bodumedi tša Katholika, dikopelong le dithapelong, leina la Modimo la “YHWH ga se la swanela go dirišwa goba la bitšwa.”
Go thekga taba ye, lengwalo la Vatican le “ tsopola mokgwa wa kgale” wa Katholika. Taelo ye e bolela gore ka phetolelong ya Septuagint ya Mangwalo a Seheberu a ngwadilwego pele ga mehla ya Bokriste, leina la Modimo ka mehla le be le fetolelwa e le Kyʹri·os, e lego lentšu la Segerika bakeng sa “Morena.” Ka gona, taelo yeo e ile ya gapeletša gore, “Bakriste le bona go tloga mathomong, ga se ba ka ba bitša tetragrammaton ya Modimo.” Lega go le bjalo, pego ye e hlokomologa bohlatse bjo bo lego molaleng bja seo se fapanego. Dikgatišo tša pejana tša Septuagint di be di se na leina la Kyʹri·os, eupša di be di e-na le leina la Modimo ka sebopego sa יהוה. Balatedi ba Kriste ba lekgolong la pele la nywaga ba be ba tseba e bile ba diriša leina la Modimo. Jesu o boletše se ge a be a bolela le Tatagwe thapelong: “Ke ba tsebišitše leina la gago.” (Johane 17:26) Le gona thapelong ya gagwe e tsebegago ya mohlala, Jesu o re rutile go rapela ka gore: “Tatago rena wa magodimong, leina la gago a le kgethagatšwe.”—Mateo 6:9.
Bakriste ka moka ba swanetše go kganyoga gore leina la Modimo le kgethagatšwe. Maiteko a Vatican a go se le diriše a bontšha go se hlomphe Jehofa, yena yoo a boletšego gore: “Le ke leina la-ka la neng le neng; ka leina le ke tlo bitšwa ke meloko ka moka e sa tlago.”—Ekisodo 3:15, The Jerusalem Bible.
[Mongwalo wa tlase]
^ ser. 2 Malemeng a mantši, leina la “Jehofa” le be le dutše le tsebja ka nywaga-kgolo gomme le dirišwa ka diphetolelong tše dintši tša Beibele.
[Ntlhakgolo go letlakala 30]
“Le ke leina la-ka la neng le neng.”—Ekisodo 3:15, JB
[Seswantšho go letlakala 30]
Seripa sa sengwalwa sa “Septuagint” seo se ngwadilwego lekgolong la pele la nywaga C.E. Leina la Modimo leo le emelwago ke ditlhaka tše nne tša Seheberu leo gantši le fetolelwago e le YHWH, le swailwe
[Mothopo]
Courtesy of the Egypt Exploration Society