NGWAGA wa 1909 e be e le o bohlokwa kudu kua New York City. Go ile gwa bulwa Leporogo la Queensboro, leo le kgokaganyago motse wa Queens le wa Manhattan, gomme gwa bulwa le Leporogo la Manhattan, leo le dirilego gore go be le kgokagano magareng ga Manhattan le Brooklyn.

Gape e be e le ngwaga o bohlokwa kudu go Dihlatse tša Jehofa. Pejana, Charles Taze Russell, mopresidente wa Watch Tower Bible and Tract Society, e lego mokgatlo wa molao wa Dihlatse tša Jehofa, o ile a bona kgonagalo ya koketšego ya modiro wa boboledi bja ditaba tše dibotse tša Mmušo wa Modimo. (Mateo 24:14) O be a dumela gore go huduša ntlo-kgolo ya Mokgatlo Pittsburgh, Pennsylvania, go ya Brooklyn, New York, e be e tla ba mogato o bohlokwa wa go dira bjalo. Ditokišetšo tša go huduga di thomile ka 1908, gomme go huduga go diregile mathomong a ngwaga o latelago.

Bao ba bego ba etelela pele modirong wa boboledi morago kua ba be ba tseba gore go nea bohlatse  ka dithero tšeo di gatišitšwego dikuranteng e be e le tsela e atlegago ya go phatlalatša therešo ya Beibele. Ge e le gabotse, ka ngwaga wa 1908, dithero tša Beibele tša beke le beke tša Russell di tšweletše dikuranteng tše 11 tše fapa-fapanego gomme di bile le kabo e kopanego ya dikopi tše 402- 000.

Lega go le bjalo, Russell o ngwadile gore: “Bana babo rena bao ba tlwaelanego le mekgwa ya go phatlalatša ka dikuranta . . . ba re kgonthišetša gore ge e ba dithero tša beke le beke di e-tšwa motseng o mogolo, di be di ka feleletša ka go gatišwa ga dithero karolong ka moka ya United States, le gore ka ngwaga di be di ka gatišwa dikuranteng tše makgolo ka mehla.” Ka gona, ba ile ba thoma go nyaka lefelo le kaone bakeng sa go oketša modiro wa boboledi.

Ke ka baka la’ng Brooklyn e be e le lefelo leo le swanetšego? Russell o itše: “Ka moka re ile ra phetha ka morago ga go tsoma tlhahlo ya Modimo gore Brooklyn, N.Y., yeo e nago le palo e kgolo ya badudi . . . le yeo e bego e tsebja e le ‘Motse wa Dikereke,’ ka mabaka a e be e ka ba lefelo la rena le le swanetšego kudu bakeng sa modiro wa go buna.” Mafelelo a bontšha gore ye e be e le phetho e bohlale. Ka nako e nyenyane feela, dikuranta tše 2 000 di be di gatiša dithero tša Russell.

Go na le lebaka le lengwe le lebotse bakeng sa go kgetha gore e hudušetšwe New York. Ka 1909, diofisi tša makala di ile tša hlongwa kua Great Britain, Jeremane le Australia, kgaufsinyana go be go tla latela tše oketšegilego. Ka gona, e be e le mo go kwagalago go dira gore ntlo-kgolo ya lefase e be motseng wa boemakepe woo gape o bego o e-na le ditsela tše dintši le diporo tšeo di bego di o kgokaganya le mafelo a mangwe.

Ntlo-kgolo ya mathomo ya Watch Tower Bible and Tract Society e be e hlomilwe ka bo-1880, kua Allegheny (yeo bjale e lego karolo ya Pittsburgh), Pennsylvania. Ka nako yeo, e be e bitšwa Ntlo ya Beibele. Ka 1896, batho bao ba bego ba šoma moo e be e le ba 12.

 Lega go le bjalo, ge go se na go hudugelwa Brooklyn ka 1909, meago e mefsa ya bodulo yeo bašomi ba dulago go yona e ile ya bitšwa Bethele. * Ke ka baka la’ng e bitšwa Bethele? Moago wo o rekilwego ke Mokgatlo wa Watch Tower o be o le 13-17 Hicks Street gomme e be e le wa moruti yo a tumilego Henry Ward Beecher gomme o be o tsebja e le Bethele ya Beecher. Beecher o be a dula meagong yeo e lego 124 Columbia Heights, yeo le yona e ilego ya rekwa. Tokollo ya Morokami wa March 1, 1909, e begile gore: “Ka ntle le pelaelo, go bonagala go makatša kudu gore re hwetše Bethele ya kgale ya Beecher, gotee le lefelo leo a bego a dula go lona go sa letelwa. . . . Legae le lefsa re tla le bitša ‘Bethele,’ gomme diofisi tše difsa le holo, re tla re ke ‘Tabarenakele ya Brooklyn’; maina a a tla tšeela legato polelwana e rego ‘Ntlo ya Beibele.’”

Lehono, meago e katološitšwego kudu kua Brooklyn le mafelong a mangwe a mabedi a lego New York State, e lego la Wallkill le la Patterson, go akaretša le lefelo la bodulo, bogatišetšo gotee le diofisi a bitšwa Bethele. Ge e le gabotse, gona bjale go na le malapa a Bethele dinageng tše 113 lefaseng ka bophara. A na le badiredi ba fetago 19 000 bao ba thušago go phatlalatša tsebišo ya Beibele.

Meago yeo e ile ya neelwa ka January 31, 1909. Mošupologo wa September 6, 1909, e ile ya ba Letšatši la go Amogela Baeng kua Bethele. Barutwana ba makgolo ba Beibele, go etša ge Dihlatse tša Jehofa di be di tsebja bjalo ka nako yeo, ba etetše lefelo leo. Ba bantši ba bona ba be ba e-tšwa kopanong ya Bokriste yeo e bego e swaretšwe kua Saratoga Springs, yeo e ka bago dikhilomithara tše 320 ka leboa la New York City. Charles Taze Russell o ile a amogela le go dumediša baeng. *

Baeng ba sa dutše ba amogelwa Bethele. Ge e le gabotse, ngwaga le ngwaga batho ba fetago 40 000 ba etela meago ya Brooklyn. Bethele ya Brooklyn e sa dutše e kgatha tema e bohlokwa go katološweng ga dikgahlego tša Mmušo wa Jehofa, e le gore go šegofatšwe batho ba dimilione tše di sa balegego.