Ditaba tše Dibotse ka Maleme a 500

GE NTWA ya selegae e dutše e tšwela pele kua Rwanda, sehlopha se senyenyane sa bafetoledi se tšhaba magaeng a sona gomme se tlogela dithoto tša sona. Lega go le bjalo, se kgona go tšea dikhomphutha tša sona tša go šikarwa gomme se ya le tšona dikampeng tša bafaladi. Ka baka la’ng? E le gore se ka tšwela pele se fetolela dikgatišo tše theilwego Beibeleng ka se-Kinyarwanda.

Kgarebe e nngwe kua Borwa-bohlabela bja Asia e tlanya khomphutha ya yona go fihla bošego kudu, e lebeletšana le go lapa, phišo gotee le go kgaoga ga mohlagase kgafetša-kgafetša moo go šitišanago le mošomo wa yona wa bofetoledi. Pakane ya yona ke efe? Ke go fihlelela nako yeo e beilwego ya go gatiša.

Bafetoledi ba ke karolo ya baithapi ba ka bago ba 2 300 bao ba šomago mafelong a fetago a 190 lefaseng ka bophara. Ba na le nywaga ya magareng ga e 20 le e nyakilego go ba e 90 gomme ba šoma ka thata e le gore batho ba ka hwetša khomotšo e tšwago molaetšeng wa Beibele ka maleme a 500.—Kutollo 7:9.

Go Fihlelela Badudi ba Bolelago Maleme a Mantši

Nywageng ya morago bjale, modiro wa bofetoledi wa Dihlatse tša Jehofa o oketšegile ka tekanyo e sa kago ya bonwa. Ka mohlala, ka 1985, Morokami o ile wa tšweletšwa sammaletee ka maleme a 23—modiro o kgahlišago woo o fihleletšwego ka nako yeo. Lehono, Morokami o hwetšagala ka maleme a 176 gomme ditokollo ka moka di tšweletšwa sammaletee e le gore babadi lefaseng ka bophara ba kgone go ithuta tsebišo e swanago ka nako e tee.

Morokami ke makasine feela woo o gatišwago ka mehla ka maleme a ka bago a 50. Ka baka la’ng? Dikhamphani tšeo di gwebago ka go gatiša ga di na mo gontši mo di ka go gatišago ka maleme a lefelong leo. Eupša Dihlatse tša Jehofa lefaseng ka bophara di neela ka go rata bakeng sa go leka-lekanya dilo tša tšona e le gore Lentšu la Modimo le dikgatišo tše theilwego Beibeleng di ka hwetšagala moo di nyakegago gona.—2 Bakorinthe 8:14.

Batho ba tšeela godimo kudu molaetša wa Beibele ka leleme la bona. Ka mohlala, dikgatišo tša Beibele morago bjale di tšweletšwa ka se-Miskito, e lego leleme leo le bolelwago ke batho ba e ka bago ba 200 000 kua Nicaragua. Mosadi yo mongwe o ile a kgopela kopi ya Puku Ya-ka ya Ditaba tša Beibele * ka se-Miskito gomme moruti wa lefelong leo o be a le gona ge e be e tlišwa. Ka morago ga go bona puku yeo e botse, moruti o be a nyaka gore e be ya gagwe. Mosadi o ile a gana go mo nea yona, gaešita le ge moruti a be a nyaka go mo nea dinawa tša kofi tša dikhilograma tše 20 bakeng sa puku yeo!

 Nywageng e lesome e fetilego, dikgatišo tše theilwego Beibeleng di ile tša fetolelwa ka maleme a fetago a 12 a fapa-fapanego a kua Mexico, go akaretša le se-Maya, se-Nahuatl le se-Tzotzil. Ka nywaga ya ka tlase ga e lesome, diphuthego tša Dihlatse tša Jehofa tša maleme a fapa-fapanego le tša polelo ya diatla di oketšegile go tloga go tše 72 go ya go tše fetago tše 1 200 lefelong leo. Dihlatse tša Jehofa di ka bjala molaetša wa Beibele dipelong tša batho, eupša di tlogelela Modimo gore a mediše peu ya therešo.—1 Bakorinthe 3:5-7.

Phetolelo ya Mehleng Yeno ya Beibele ka Maleme a 80

Nywageng ya morago bjale, Dihlatse tša Jehofa di ile tša šoma ka thata go tšweletša New World Translation of the Holy Scriptures e feletše goba ka karolo ya yona ka maleme a 80. Ka mafelelo afe? Hlatse e nngwe ya Afrika Borwa e boletše ka Beibele ya Setswana gore: “Ruri se ke sedirišwa se sebotse. E tla oketša tebogo ya-ka ya Lentšu la Modimo. Leleme leo le dirišitšwego le balega gabonolo e bile le a kgahliša.” Mmadi wa leleme la Setsonga go tšwa Mozambique o ngwadile gore: “Gaešita le ge re be re e-na le dikgatišo tšohle tše dingwe tšeo di theilwego Beibeleng, go hloka Beibele go be go swana le go ba le diaduma le magadima eupša go se na pula! Lega go le bjalo, pula e ile ya na ge go lokollwa New World Translation ya Setsonga.”

Ka tsela e makatšago, bao ba fetolelago le go phatlalatša ditaba tše dibotse tšeo di huperwego ke Beibele ba phethagatša boporofeta bja bogologolo. Jesu Kriste ke yena a boletšego gore: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.”—Mateo 24:14.

[Mongwalo wa tlase]

[Kerafo go letlakala 25]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

NEW WORLD TRANSLATION DIKGATIŠO TŠE DINGWE

E hwetšagala e feletše goba

ka karolo ya yona

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

PALO YA MALEME

[Diswantšho go letlakala 24, 25]

Baithapi ba ka bago ba 2 300 ba fetolela dikgatišo tše theilwego Beibeleng ka maleme a 500

BENIN

SLOVENIA

ETHIOPIA

BRITHANIA