“Go bo-radifilosofi ka moka ba Segerika sa bogologolo, yoo a bego a e-na le tutuetšo e kgolo kudu diponong tše tlwaetšwego tša Dihele ke Plato.”—Histoire des enfers (Histori ya Dihele), ka Georges Minois, letlakala 50.

“Go tloga magareng a lekgolo la bo-2 la nywaga AD, Bakriste bao ba tlwaeditšwego ka tsela e itšego ka filosofi ya ba-Gerika ba ile ba thoma go bona go nyakega ga gore ba bolele tumelo ya bona ka mokgwa wa filosofi wa go bewa ga mantšu . . . Filosofi yeo e bego e ba swanela kudu e be e le ya Plato.”—The New Encyclopædia Britannica (1988), Bolumo 25, letlakala 890.

“Thuto ya Kereke e tiiša go ba gona ga dihele le go ba ga tšona ka mo go sa felego. Gatee-tee ka morago ga lehu meoya ya batho ba sebe e theogela diheleng, moo ba tlaišwago ka dikotlo tša dihele, ‘mollo wa ka mo go sa felego.’ Kotlo e kgolo ya dihele ke go aroganywa le Modimo ka mo go sa felego.”—Catechism of the Catholic Church, tokollo ya 1994, letlakala 270.

“Gobane ba ba phelago ba tseba gore ba tlo hwa, eupša bahu ga ba tsebe selo, . . . gobane kua Sheole moo o yago gona, ga go na modiro goba kgopolo goba tsebo goba bohlale.”—Mmoledi 9:5, 10, Revised Standard Version.

Lentšu la Seheberu la Sheol, leo le bolelago “bodulabahu,” le fetoletšwe e le “hele” ka diphetolelong tše dingwe tša Beibele. Ditemana tše di utolla’ng ka boemo bja bahu? Na ba tlaišega Sheole e le go lefelela diphošo tša bona? Ga go bjalo, ka gobane “ga ba tsebe selo.” Ke ka baka leo mopatriareka Jobo, ge a be a tlaišega kudu ka baka la bolwetši bjo šoro, a ilego a lopa Modimo ka gore: “O ntšhireletše kua diheleng [Seheberu, Sheol].” (Jobo 14:13; Douay-Rheims Version) Topo ya gagwe e be e tla bolela’ng ge nkabe Sheole e be e le lefelo la tlaišo ya ka mo go sa felego? Go ya ka kgopolo ya Beibele, hele e fo ba e šupa go bodulabahu, moo modiro ka moka o felago.

Na tlhaloso ye ya dihele ga se yeo e kwagalago kudu le yeo e dumelelanago le Mangwalo? Ke bosenyi bofe bjoo, go sa šetšwego bogolo bja bjona, bo ka dirago gore Modimo yo lerato a tlaiše motho ka mo go sa felego? (1 Johane 4:8) Eupša ge e ba mollo wa dihele e le nonwane, go thwe’ng ka legodimo?

Bapiša ditemana tše tša Beibele: Psalme 146:3, 4; Ditiro 2:25-27; Baroma 6:7, 23