Motho o Bopilwe e le Morwa wa Modimo

JEHOFA Modimo o bopile motho wa mathomo ka lerole la lefase, dinkong tša gagwe a budulela moya wa bophelo, “motho a napa a ba môya o phelaxo.” (Genesi 2:7; 1 Bakorinthe 15:45) Ka morago ga ge Adama a bopilwe le ka morago ga ge a file diphoofolo maina, Jehofa o ile a mo robatša boroko bjo bogolo; gomme ge a sa robetše, Modimo a ntšha e nngwe ya dikgopo tša Adama gomme a bopa mosadi ka yona. Ka baka leo, ge a be a tlišwa go motho, Adama o ile a re: “Byalo xomme šó, e lexo lešapô la mašapô a-ka, le nama ya nama ya-ka.” O ile a mmitša Mosadi, “xobane ké yêna e a nthšitšwexo monneng.” (Genesi 2:21-23) Adama ka morago o ile a mo reela leina la Efa (leo le bolelago “Yo a Phelago”).—Genesi 3:20.

Ge a be a hlatsela gore motho o bopilwe ke Jehofa Modimo, moapostola Paulo o ile a botša Baathene gore: “Go tšwa mothong o tee o dirile setšhaba se sengwe le se sengwe sa batho, gore ba dule godimo ga lefase ka moka.” (Ditiro 17:26) Ka go rialo, ditšhaba ka moka le merafo di tšwa mothong o tee.

Monna le Mosadi ba Mathomo

Adama le Efa ba bopilwe go ya bofelong bja “letšatši” la botshelela la tlholo. (Genesi 1:24-31) Ga go na pego ya mabapi le batho ba bogologolo, dilo tšeo ba di ngwadilego, tša temo le dilo tše dingwe tšeo ba bego ba di phegelela, yeo e fetelago nywageng ya ka pele ga 4026 B.C.E., e lego letšatši-kgwedi leo Adama a bopilwego ka lona. Ka ge Mangwalo a lokeletša histori ya motho go tloga nakong ya go bopša ga batho ba pele ba babedi, ga go na seo go thwego ke motho wa pele ga histori. Dipego tša mešaletša (fossil) ga di bontšhe gore batho ba tšwa diphoofolong. Le gona go tloga go se na tšhupetšo le ge e le efe ya mabapi le dika-batho dipegong tša mathomo-thomo tša batho, e ka ba e le dingwalwa, diswantšho tšeo di thadilwego ka maweng, matlapa a betlilwego, bjalo-bjalo.

Mangwalo a gatelela se se fapanego, gore motho mathomong e be e le morwa wa Modimo le gore ga a sa amogelega. (Mmoledi 7:20; 1 Johane 1:8-10) Moepi wa marope O. D. Miller o boletše gore: “Ka gona, taba ya ‘mehla ya lethabo le legolo’ ga se nonwane. Thuto ya kgale ya go onala mo go tšweletšego, ya poelomorago e nyamišago ya morafo wa batho go tloga boemong bja mathomo bja lethabo le tshekego, ga go pelaelo gore e akaretša therešo e kgolo eupša e le e nyamišago. Difilosofi tša rena tša histori tša mehleng yeno, yeo e thomago ka moloko wa batho o sehlogo, go molaleng gore di nyaka matseno a mafsa. . . . Aowa; batho ba mehleng ya bogologolo e be e se ba sehlogo.”—Har–Moad, 1892, ;letlakala 417.

Beibele e utolla gore legae la motho la mathomo e be e le “thšemo ya Edene.” (Genesi 2:8) Moo e bego e le gona go bonagala e be e le kgaufsi le moo batho ba bego ba dula gona ka morago ga Meetsefula. Pono yeo e amogelwago ke diithuti e hlaloswa ke P. J. Wiseman ka tsela ye: “Bohlatse ka moka bjo re nago le bjona, bja Genesi, bja boepi bja marope le bja ditšo tša batho, bo šupa molaleng wa Mesopotamia e le legae la kgale-kgale la batho. Dinaga tša Bohlabela bja Kgole, e ka ba tša ma-China goba ma-India, ga di fete naga ye ka bokgale bja batho ba gona, ka gobane e ka kgona go thekga boipolelo bja yona bja gore batho ba tšwa go yona.”—New Discoveries in Babylonia About Genesis, 1949, letlakala 28.

Motho o Bopilwe ka ‘Seswantšho sa Modimo’

Ge a be a utollela “mohlankana w’axwe” morero wa Gagwe wa go hlola batho, Modimo o itše: “A re direng motho ka xo swanthša ka rena, a swanê le rena.” (Genesi 1:26, 27; Diema 8:30, 31; bapiša le Bakolose 1:15-17.) Ela hloko gore Mangwalo ga a re Modimo o hlodile motho ka seswantšho sa sebata goba sa seruiwa goba sa hlapi. Motho o bopilwe ka ‘seswantšho sa Modimo’;  e be e le “morwa wa Modimo.” (Luka 3:38) Ge e le mabapi le sebopego goba ponagalo ya mmele wa Modimo, “ga go motho yo a kilego a bona Modimo le ka mohla.” (1 Johane 4:12) Ga go motho mo lefaseng yoo a tsebago gore mmele wa Modimo wa letago, wa legodimong, wa moya o bjang, ka go rialo re ka se swantšhe mmele wa motho le wa Modimo. “Modimo ke Moya.”—Johane 4:24.

Lega go le bjalo, motho o ka ‘seswantšho sa Modimo’ ka kgopolo ya gore o bopilwe a e-na le dika tša boitshwaro tše swanago le tša Modimo, e lego lerato le toka. (Bapiša le Bakolose 3:10.) Le gona, o na le matla le bohlale bja go feta bja diphoofolo, e le gore a ka kgona go lemoga dilo tšeo Modimo a di thabelago le go di tšeela godimo, tše bjalo ka bobotse le bokgabo, go bolela, go nea mabaka gotee le tshepedišo e swanago ya monagano le pelo yeo diphoofolo di se nago le yona. Go oketša moo, motho o na le senyakwa sa moya, tsebo le bokgoni bja go boledišana le Modimo. (1 Bakorinthe 2:11-16) Ka mabaka a bjalo motho o be a swanelegela go ba moemedi wa Modimo le go buša mehuta ka moka ya diphedi tša sebaka-bakeng, tša lefaseng le tša ka lewatleng.

Ka ge e le tlholo ya Modimo, motho mathomong o be a phethagetše. (Doiteronomio 32:4) Ka baka leo, Adama a ka ba a ile a fetišetša baneng ba gagwe phethagalo le sebaka sa go phela ka mo go sa felego lefaseng. (Jesaya 45:18) Yena le Efa ba be ba laetšwe gore: “Tswalang Le atê, tlalang lefase, Le le fenyê.” (Genesi 1:28) Ge lapa la bona le be le gola, ba be ba tla lema le go botsefatša lefase go ya ka thulaganyo ya Mmopi.

Motho yo a Nago le Tokologo ya Boikgethelo

Ka ge a bopilwe ka seswantšho sa Modimo, go ya ka go swana le Yena, motho o be a e-na le tokologo ya boikgethelo. O be a e-na le tokologo ya go kgetha go dira se se lokilego goba se se sa lokago. Go kwa ga gagwe le go ikokobeletša Mmopi ka go rata, o be a e-ba boemong bja go hlompha le go nea Modimo letago go feta diphoofolo kgole. Ka bohlale o be a ka reta Modimo bakeng sa dika tša Gagwe tše di kgahlišago le go thekga bogoši bja Gagwe.

Eupša tokologo ya Adama e be e lekanyeditšwe; e be e se e feletšego. O be a ka tšwela pele a phela a thabile ge feela a lemoga bogoši bja Jehofa. Se se ile sa bontšhwa ke sehlare sa go tseba botse le bobe, seo Adama a bego a ileditšwe go se ja. Go se ja e be e tla ba tiro ya go se kwe, borabele kgahlanong le bogoši bja Modimo.—Genesi 2:9, 16, 17.

Ka ge Adama e be e le “morwa wa Modimo,” tswalano ya gagwe le Modimo e be e swana le ya morwa le tatagwe, gomme o be a swanetše go ba a ile a kwa. (Luka 3:38) Go oketša moo, Modimo o ile a dira gore motho ka tlhago a be le kganyogo ya borapedi. Kganyogo ye, ge e ba e fapošwa, e be e tla timetša motho gomme ya senya tokologo ya gagwe, ya mo dira lekgoba la selo seo se bopilwego go e na le go ba lekgoba la Mmopi. Ka morago, se se be se tla dira gore a se sa amogelwa ke Modimo.

Morwa wa lerabele wa Modimo wa moya o ile a dira gore Efa mosadi wa Adama a dire sebe, gomme mosadi a leka Adama, yoo ka boomo a ilego a rabela kgahlanong le Jehofa. (Genesi 3:1-6) Ka go dira sebe se Adama o ile a se sa ba morwa e bile a se sa ba yo a phethagetšego gomme a dira gore bana ba gagwe, e lego moloko ka moka wa batho, ba be le sebe, e lego go se phethagale le lehu. Go tloga ge ba belegwa, ba ba ka seswantšho sa tatago bona Adama, ba se ba phethagala, ba e-na le tebelelo ya go hwa.—Genesi 3:17-19; Baroma 5:12.

Jehofa o dirile tokišetšo e lerato ya go lokolla batho bokgobeng bja sebe le lehu. E le gore go kgotsofatšwe molao wa Modimo o phethagetšego, motho yo a phethagetšego o be a swanetše go dirwa sehlabelo e le gore a lopolle seo motho yo a phethagetšego, Adama, a se lahlilego ka go se kwe. (1 Bakorinthe 15:22) Modimo o rometše morwa wa gagwe yo a tswetšwego a nnoši, Jesu Kriste, gore a belegwe e le motho yo a phethagetšego mo lefaseng. O ile a amogela kabelo ya gagwe ka boikokobetšo gomme ka lehu la gagwe le le kwešago bohloko koteng ya tlhokofatšo, o ile a lokolla batho, a ba a dira gore go kgonege gore batho ba sa phethagalago ba lebelele pele bokamosong bja letago e le bana ba Modimo ba phethagetšego.—Baroma 8:20, 21.