Ekišang Tumelo ya Bona

O Ile a Bulela Jehofa Pelo ya Gagwe ka Thapelo

HANNA o be a swaregile kudu ka go lokišetša leeto, a leka go se nagane ka mathata a gagwe. E be e swanetše go ba nako e thabišago; Elikana, monna wa gagwe, o be a tlwaetše go sepela le lapa la gagwe ka moka maetong a a ngwaga le ngwaga a go ya go rapela tabarenakeleng kua Šilo. Jehofa o be a rerile gore dinako tšeo e be tše thabišago. (Doiteronomio 16:15) Le gona ga go pelaelo gore Hanna o ile a thabela menyanya yeo go tloga bjaneng. Eupša nywageng ya morago-bjale maemo a ile a fetoga.

O be a šegofaditšwe ka monna yo a mo ratago. Lega go le bjalo, Elikana o be a e-na le mosadi yo mongwe. Leina la gagwe e be e le Penina gomme go bonagala a be a ikemišeditše go dira gore Hanna a se ke a thabela bophelo. Penina o be a bile a hweditše tsela ya go dira gore dinako tše tša ngwaga le ngwaga e be tšeo di kwešago Hanna bohloko kudu. Bjang? Se bohlokwa kudu, tumelo ya Hanna go Jehofa e ile ya mo thuša bjang go lebeletšana le boemo bjoo gantši bo bonagalago bo sa laolege? Ge e ba o lebeletšana le ditlhohlo tšeo di go amogago lethabo bophelong, o ka lemoga gore pego ya Hanna ke e kgomago kudu.

“Pelo ya Xaxo e Šulafetše’ng?”

Beibele e utolla mathata a mabedi a magolo bophelong bja Hanna. O be a se na taolo e kaalo bothateng bja mathomo gomme a se na taolo ka mo go feletšego bothateng bja bobedi. Bja mathomo, o be a le lenyalong la segadikane, a e-na le mogaditšong yo a mo hloilego. Bja bobedi, e be e le moopa. Boemo bjoo ke bjo thata go mosadi le ge e le ofe yo a nyakago go ba le bana; eupša mehleng ya Hanna le go ya ka setšo sa gabo, e be e le mothopo wa manyami a magolo. Lapa le lengwe le le lengwe le be le ithekgile ka ditlogolwana gore le tšwetše pele leina la lapa. Boopa bo be bo bonagala e le thogako e kgolo le selo seo se lešago dihlong kudu.

Hanna o be a ka kgotlelela boemo ka katlego ge nkabe Penina a be a sa mo tshwenye. Lenyalo la segadikane e be e se boemo bjo bo kgahlišago. Le be le tletše diphadišano, ditshele le pelo e bohloko. Mokgwa wo o be o fapane kudu le tekanyetšo ya go nyalana le molekane o tee yeo Modimo a e hlomilego tšhemong ya Edene. * (Genesi 2:24) Ka go rialo Beibele ga e bolelele lenyalo la segadikane ka tsela e kgahlišago, gomme kanegelo ya lapa la Elikana ke mohlala o bontšhago gore lenyalo le bjalo le be le se botse.

Taba ke gore, Elikana o be a rata Hanna kudu. Go ya ka Sejuda, o be a nyetše Hanna pele gomme a nyala Penina nywaga ka morago. Go sa šetšwe gore boemo e be e le bofe, Penina, yoo a bego a tloga a hufegela Hanna, o ile a hwetša ditsela tše dintši tša go tlaiša mophenkgišani wa gagwe. Seo Penina a bego a phala Hanna ka sona e be e le pelego. Penina o ile a belega bana a sa tšo ba belega gomme go ipona ga gagwe a le kaone go be go gola ge a e-ba le ngwana yo mongwe. Go e na le go kwela Hanna bohloko le go mo homotša bakeng sa go palelwa ga gagwe, Penina o ile a diriša boemo bjoo gampe. Beibele e re Penina o ile a lwa lehufa le Hanna e le “xore a mo hlohlê.” (1 Samuele 1:6) Ditiro tša Penina e be e le tša ka boomo. O  be a nyaka go kweša Hanna bohloko gomme o be a atlega.

Sebaka seo Penina a bego a rata go se diriša go bonagala se be se fihla nakong ya leeto la ngwaga le ngwaga la go ya Šilo. Elikana o be a nea bana ba Penina ba bantši—“barwa ba xaxwe, le barwedi ba xaxwe ka moka”—dikabelo e le gore ba di nee Jehofa e le dihlabelo. Lega go le bjalo, Hanna yo a se nago bana o be a hwetša kabelo ya gagwe feela. Ka gona, Penina o ile a dira dilo eka o phagametše Hanna e bile a mo gopotša gore ke moopa moo mosadi yo a ilego a lla a ba a felelwa ke kganyogo ya go ja. Elikana o ile a lemoga gore Hanna wa gagwe yo a rategago o be a gateletšegile e bile a sa je, ka gona o ile a leka go mo homotša. O ile a botšiša a re: “Hanna, O llêla’ng? O re’ng O sa je selô? Pelo ya xaxo e šulafetše’ng? A nna xa ke a Xo lekana ka fetiša barwa ba lesome?”—1 Samuele 1:4-8.

Se se kgahlišago ke gore Elikana o ile a lemoga gore go gateletšega ga Hanna go be go sepedišana le boopa bja gagwe. Le gona, ga go pelaelo gore Hanna o ile a tšeela godimo kgonthišetšo ya gagwe ya gore o a mo rata. * Eupša Elikana ga se a bolela selo ka lehloyo la Penina, le gona pego ga e bolele gore Hanna o ile a mmotša ka lona. Mohlomongwe o ile a bona gore go bolela seo Penina a se dirilego go be go tla mpefatša boemo. Na ruri Elikana o be a ka fetoša dilo? Na Penina o be a ka se hloye Hanna le go feta, gona na bana le bahlanka ba mosadi yoo yo a nago le lehloyo ba be ba ka se mo ekiše? Hanna o be a tlo no ikwa a sa amogelege ka lapeng la gagwe.

Go sa šetšwe gore Elikana o ile a bona goba a se bone go hloka botho ga Penina, Jehofa Modimo o ile a go bona. Lentšu la gagwe le bontšha taba ka moka, ka go rialo le nea temošo e kwagalago go motho le ge e le ofe yo a nago le lehufa leo le bonagalago e le le lenyenyane goba ditiro tša lehloyo. Ka lehlakoreng le lengwe, ba se nago molato le ba nago le khutšo, go swana le Hanna, ba ka homotšwa ke go tseba gore Modimo wa toka o lokiša ditaba ka moka ka nako ya gagwe le ka tsela ya gagwe. (Doiteronomio 32:4) Mohlomongwe Hanna o be a tseba seo, ka gobane o ile a tsoma thušo go Jehofa.

“Sefahloxô sa Xaxwe sa se ke sa Etša sa Bô-malôba”

Mesong ke ge lapa le šetše le swaregile. Yo mongwe le yo mongwe o be a itokišeletša leeto, go akaretša le bana. Leeto la go ya Šilo le be le tla dira gore lapa le tle ka tsela ya naga ya meboto ya Efuraimi. * Ge ba sepela ka dinao, leeto leo le be tla tšea letšatši goba a mabedi. Hanna o be a tseba gore mogaditšong wa gagwe o be a tlo itshwara bjang. Lega go le bjalo, Hanna ga se a ka a šala gae. Ka go rialo, o beetše barapedi ba Modimo mohlala o mobotse go fihla le lehono. Le ka mohla ga go bohlale go dumelela go hloka boitshwaro ga batho ba bangwe go šitišana le borapedi bja rena go Modimo. Ge re ka dira bjalo, re tla hlaelwa ke ditšhegofatšo tšeo di re matlafaletšago go kgotlelela.

Ka morago ga letšatši le letelele ditseleng tša manyokenyoke tša dithabeng, lapa le le legolo mafelelong le batametše Šilo. Ke yela mola godimo ga mmoto woo o nkego o dikologilwe ke meboto e megolo. Ge ba dutše ba batamela, Hanna o swanetše go ba a ile a nagana kudu ka seo a tlago go se bolela thapelong ya gagwe go Jehofa. Ge ba se na go fihla, lapa le ile la thabela dijo le le gotee. Hanna o ile a tloga moo sehlopheng gatee-tee ge go tšwelela sebaka gomme a leba tabarenakeleng ya Jehofa. Moperisita yo a phagamego Eli o be a le moo, a dutše kgaufsi le mojako wa tempele. Eupša tlhokomelo ya Hanna e be e lebišitšwe go Modimo. Mo tabarenakeleng, o ile a ikwa a kgodišegile gore o tla kwewa. Ge e ba go se na motho yo a ka kwešišago boemo bjo bo gateletšago, Tatagwe wa legodimong o be a tla bo kwešiša. O ile a aparelwa ke manyami gomme a thoma go lla.

Ge mmele wa gagwe o thothomela ka baka la go lla gabohloko, Hanna o ile a bolela le Jehofa ka pelo. Melomo ya gagwe e be e ema-ema ge a dutše a hlalosa bohloko bja gagwe ka pelo. Le gona o ile  a rapela nako e telele, a tšhollela Tatagwe sa mafahleng a gagwe. Lega go le bjalo, o ile a dira se se fetago go fo kgopela Modimo go phethagatša kganyogo ya gagwe ya go ba le bana. Hanna o be a e-na le kganyogo e matla ya go fa Modimo seo a ka se kgonago, e sego feela ya go amogela ditšhegofatšo tša Gagwe. Ka go rialo o ile a ena ka gore ge a ka ba le morwa, o tla mo neela gore a hlankele Jehofa bophelo bja gagwe ka moka.—1 Samuele 1:9-11.

Ka go rialo, Hanna o ile a beela bahlanka ba Modimo ka moka mohlala ge go tliwa tabeng ya thapelo. Jehofa ka botho o laletša batho ba gagwe gore ba bolele le yena ka bolokologi, ntle le tika-tiko, ba mmotše dilo tšeo ba tshwenyegilego ka tšona go swana le ngwana yo a botago motswadi wa gagwe yo lerato. (Psalme 62:8; 1 Bathesalonika 5:17) Moapostola Petro o ile a budulelwa go ngwala mantšu a a homotšago mabapi le go rapela Jehofa: “[Lahlelang] dipelaelo tša lena ka moka go yena, gobane o a le hlokomela.”—1 Petro 5:7.

Lega go le bjalo, batho ga ba na kwešišo le kwelobohloko tšeo di lekanago le tša Jehofa. Ge Hanna a be a lla e bile a rapela, o ile a makatšwa ke go kwa lentšu. E be e le Eli, moperisita yo a phagamego, yoo a bego a mo šeditše. O ile a re: “O tlo kxaotša neng xo dira tša botaxwa? Thôma x’o tloxwa ke kxang.” Eli o be a bone melomo ya Hanna ge e ema-ema, ge a lla gotee le boitšhišinyo bja gagwe bja mmele bja go nyama. Go e na le go botšiša gore molato ke eng, o ile a kitimela go dira phetho ya gore o be a tagilwe.—1 Samuele 1:12-14.

Hanna o swanetše go ba a ile a kwešwa bohloko, mo nakong ya manyami, ke go latofatšwa ntle le lebaka—e bile a latofatšwa ke monna yo a nago le boemo bjo bo hlomphegago ka tsela ye! Lega go le bjalo, o ile a bea mohlala wa tumelo gape. Ga se a ka a dumelela go se phethagale ga monna yo go šitišana le borapedi ga gagwe go Jehofa. O ile a araba Eli ka tlhompho gomme a mo hlalosetša boemo bja gagwe. Eli o ile a araba, mohlomongwe ka go lemoga gore o be a fošitše e bile a bolela ka segalo se bonolo, a re: “Sepela Ò rotše pelo; Modimo wa Isiraele O tlo Xo nea tše O di kxopetšexo xo Yêna.”—1 Samuele 1:15-17.

Hanna o ile a kgomega bjang ge a be a tšhollela Jehofa sa mafahleng le go mo rapela a le moo tabarenakeleng ya gagwe? Pego e balega ka gore: “Mosadi eo a ikêla ka tsela ya xaxwe, a ja; xomme sefahloxô sa xaxwe sa se ke sa etša sa bô-malôba.” (1 Samuele 1:18) Ka go The Jerusalem Bible e balega ka gore: “Sefahlego sa gagwe se ile sa se sa bontšha go nyama.” Hanna o ile a ikwa a imologile. Ka tsela e itšego, o be a tšere morwalo wa boima bja maikwelo a gagwe a o beile magetleng ao e lego a magolo kudu le a tiilego go feta a gagwe, e lego a Tatagwe wa legodimong. (Psalme 55:22) Na go na le bothata bjoo bo ka Mo imelago kudu? Aowa—ga se bja ka bja ba gona, ga bo gona ga bjale e bile bo ka se tsoge bo bile gona!

Ge re ikwa re imelwa ke manyami, re dira gabotse ge re latela mohlala wa Hanna gomme re bolela ka bolokologi le Yoo Beibele e mmitšago “Mokwi wa dithapêlô.” (Psalme 65:2) Ge e ba re dira bjalo ka tumelo, le rena re ka lemoga gore manyami a rena a tšeelwa legato ke “khutšo ya Modimo ye e fetago kgopolo yohle.”—Bafilipi 4:6, 7.

“Xa xo na Lentswê Le-ka-Modimo wa Rena”

Mesong e latelago, Hanna o ile a boela tabarenakeleng le Elikana. O swanetše go ba a be a boditše  monna wa gagwe ka kgopelo ya gagwe le keno ya gagwe, ka gobane Molao wa Moše o re monna o be a e-na le tshwanelo ya go hlanoša keno yeo mosadi wa gagwe a e dirilego ntle le tumelelo ya gagwe. (Numeri 30:10-15) Eupša monna yoo yo a botegago ga se a ka a hlanoša keno yeo. Go e na le moo, yena le Hanna ba ile ba rapela Jehofa ba le gotee tabarenakeleng pele ga ge ba e-ya gae.

 Bjale ke neng moo Penina a ilego a lemoga gore o be a feletšwe ke matla a go hlohla Hanna? Pego ga e bolele selo ka taba yeo, eupša polelo e rego “sefahloxô sa xaxwe sa se ke sa etša sa bô-malôba” e šišinya gore moya wa Hanna o ile wa kaonefala ga e sa le go tloga ka nako yeo go ya pele. Go sa šetšwe gore boemo e be e le bofe, go se go ye kae Penina o ile a lemoga gore boitshwaro bja gagwe bjo bobe bo be bo sa hole selo. Beibele ga se ya ka ya bolela ka leina la gagwe gape.

Ge dikgwedi di dutše di feta, khutšo ya Hanna ya monagano e ile ya feleletša ka go mo tlišetša lethabo le legolo kudu. O be a imile! Lethabong la gagwe, Hanna le ka mohla ga se a ka a lebala moo tšhegofatšo yeo e tšwago gona. Ge mošemane a belegwe, o ile a kgetha go mo reela leina la Samuele, leo le bolelago gore “Leina la Modimo” e bile go molaleng gore le šupa taba ya go bitša leina la Modimo, bjalo ka ge Hanna a ile a dira. Ngwageng woo, ga se a ya le Elikana gotee le lapa ka moka Šilo. O ile a dula gae nywaga e meraro, go fihlela ge ngwana a tshwešwa. Ke moka o ile a itokišeletša letšatši leo ka lona a bego a tla kgaogana le morwa wa gagwe yo a rategago.

Go kgaogana le morwa wa gagwe go swanetše go ba go be go se bonolo. Ke therešo gore Hanna o be a tseba gore Samuele o be a tlo hlokomelwa gabotse kua Šilo, mohlomongwe a hlokomelwa ke ba bangwe ba basadi bao ba bego ba hlankela tabarenakeleng. Lega go le bjalo, e be e sa le yo monyenyane gomme ke mma ofe yo a sa hlologelego go ba le ngwana wa gagwe? Go dutše go le bjalo, Hanna le Elikana ba ile ba tliša mošemanyana yoo, ba sa gapeletšwe, eupša ba bontšha tebogo. Ba ile ba neela dihlabelo ngwakong wa Modimo, gomme ba tšea Samuele ba mo nea Eli, ba mo gopotša keno yeo Hanna a e dirilego moo nywaga pejana.

Ke moka Hanna o ile a rapela thapelo yeo Modimo a ilego a bona go le bohlokwa gore e dirwe karolo ya Lentšu la gagwe le le buduletšwego. Ge o dutše o bala mantšu a gagwe a begilwego go 1 Samuele 2:1-10, o tla lemoga gore bogolo bja tumelo ya gagwe bo bonagala lefokong le lengwe le le lengwe. O ile a reta Jehofa bakeng sa go diriša matla a gagwe ka tsela e kgahlišago—bakeng sa bokgoni bja gagwe bjoo bo sa bapišwego bja go kokobetša baikgogomoši, bja go šegofatša ba gateletšwego le bja go fediša bophelo goba gaešita le go bo phološa lehung. O ile a reta Tatagwe bakeng sa bokgethwa bja gagwe bja moswana-noši, toka le potego ya gagwe. Ka mabaka a kwagalago, Hanna o be a ka bolela gore: “Xa xo na lentswê le-ka-Modimo wa rena.” Jehofa ke yo a ka botwago e le ka kgonthe, ga a fetoge le gona ke setšhabelo sa bohle ba gateletšwego bao ba tsomago thušo go yena.

Ka ntle le pelaelo Samuele yo monyenyane o be a e-na le tokelo ya go ba le mma yo a nago le tumelo e tiilego go Jehofa. Gaešita le ge a ile a mo hlologelwa ge a be a dutše a gola, ga se a ka a ikwa a lebetšwe. Ngwaga le ngwaga, Hanna o be a e-ya Šilo, a mo tlišetša kobjana bakeng sa go hlankela ga gagwe tabarenakeleng. Moroko o mongwe le o mongwe wa yona e be e le bohlatse bja lerato la gagwe le tlhokomelo ya gagwe bakeng sa morwa wa gagwe. (1 Samuele 2:19) Re ka akanya ka yena a apeša mošemanyana kobjana ya gagwe e mpsha gomme a mo lebelela ka lerato ge a dutše a bolela mantšu a botho le a kgothatšago. Samuele o be a šegofaditšwe ka go ba le mma yo bjalo, gomme o ile a gola a ba tšhegofatšo go batswadi ba gagwe le go Baisiraele ka moka.

Ge e le Hanna, le yena ga se a ka a lebalwa. Jehofa o ile a šegofatša matla a gagwe a go belega bana gomme o ile a belegela Elikana bana ba bangwe ba bahlano. (1 Samuele 2:21) Lega go le bjalo, mohlomongwe tšhegofatšo e kgolo ya Hanna e be e le tlemagano magareng ga gagwe le Tatagwe, Jehofa, yeo e ilego ya matlafala kudu ge nywaga e dutše e e-ya. Eka le wena o ka diragalelwa ke se swanago, ge o dutše o ekiša tumelo ya Hanna.

[Mengwalo ya tlase]

[Lepokisi go letlakala 17]

Dithapelo tše Pedi tše Kgahlišago

Dithapelo tše pedi tša Hanna, tšeo di begilwego go 1 Samuele 1:11, NW, le 2:1-10, di na le dintlha tše mmalwa tše kgahlišago. Ela hloko tše dingwe tša tšona:

▪ Hanna o ile a lebiša ya mathomo ya dithapelo tša gagwe tše pedi go “Jehofa wa madira.” Ke motho wa mathomo ka Beibeleng yoo a tsopolwago a diriša sereto seo. Se tšwelela ka makga a 285 ka Beibeleng gomme se šupa go laola ga Modimo madira a mantši a barwa ba moya.

▪ Ela hloko gore mantšu ao Hanna a a boletšego thapelong ya gagwe ya bobedi, e sego ge morwa wa gagwe a belegwa, eupša ge yena le Elikana ba be ba mo neela go Jehofa kua Šilo. Ka gona, lethabo le legolo la Hanna ga se la ithekga ka go tswalela molomo wa mophenkgišani wa gagwe yo mogolo, Penina, eupša le ithekgile ka go šegofatšwa ke Jehofa.

▪ Ge Hanna a be a re, “’Naka la-ka le eme ka Yêna [Jehofa],” a ka fo ba a be a naganne ka pholo, phoofolo e matla ya go rwala merwalo e diriša dinaka tša yona tše matla. Hanna, ka tsela e itšego, o be a re: ‘Jehofa, o a mmatlafatša.’—1 Samuele 2:1.

▪ Mantšu a Hanna a mabapi le “motlotšwa” wa Modimo a lebelelwa e le a boporofeta. Lentšu leo ke leo le fetolelwago e le “mesia,” gomme Hanna ke motho wa mathomo ka pegong ya Beibele yo a le dirišago bakeng sa go bolela ka kgoši e tloditšwego ya ka moso.—1 Samuele 2:10.

▪ Mo e ka bago nywaga e 1 000 ka morago, mmago Jesu, e lego Maria, o boletše mantšu a swanago le a Hanna ge a be a reta Jehofa.—Luka 1:46-55.

[Seswantšho go letlakala 16]

Hanna o be a tshwenywa kudu ke boopa bja gagwe, gomme Penina o ile a dira sohle seo a bego a ka se kgona go dira gore Hanna a se ke a thaba

[Seswantšho go letlakala 16, 17]

Na o ka ekiša mohlala wa Hanna wa go rapela go tšwa pelong?

[Seswantšho go letlakala 17]

Gaešita le ge Eli a mo ahlola ka mo go fošagetšego, Hanna ga se a ka a kgopišega