Na Bana ba Swanetše go Ithuta ka Modimo?

“Re na le bodumedi bjo bo tlogago bo lekane go re dira gore re be le lehloyo, eupša ga re na bjo bo lekanego bakeng sa go re dira gore re ratane.”—JONATHAN SWIFT, MONGWADI WA LEISEMANE.

SWIFT o boletše mantšu ao lekgolong la bo-18 la nywaga, eupša ba bantši lehono ba ka dumelelana le yena. Ge e le gabotse, ba bangwe ba dumela gore batswadi ga se ba swanela go ba le tshwanelo ya go ruta bana ba bona ka Modimo. Ba bona eka bana bao ba godišeditšwego ka malapeng a bodumedi ba fokola ka tsela e itšego.

O nagana’ng? Ke efe ya dipolelo tše di latelago yeo e kwagalago kudu?

● Batswadi ga se ba swanela go dumelelwa go ruta bana ba bona ka Modimo.

● Batswadi ba swanetše go letela gore bana ba bona ba gole pele ba ka ahlaahla ditaba tša bodumedi le bona.

● Batswadi ba swanetše go ruta bana seo ba se dumelago ka Modimo e sa le ba banyenyane. Eupša ge bana ba gola, batswadi ba swanetše go ba kgothaletša gore ba naganišiše ka taba yeo ka bobona.

● Bana ba swanetše go amogela seo batswadi ba bona ba se dumelago ka Modimo ntle le dipelaelo.

Na Bodumedi bo Gobatša Bana?

Ga go motswadi yo a nago le tlhokomelo yoo a ka nyakago go gobatša ngwana wa gagwe. Eupša na ditherešo di thekga dipolelo tša bao ba thibelago bana go ithuta ka Modimo? Banyakišiši ba na le nywagakgolo ga bjale ba ithuta ka mo go tseneletšego mabapi le tsela yeo ditumelo tša batswadi tša bodumedi di kgomago bana ba bona. Ba hweditše’ng?

Banyakišiši ba hweditše gore bodumedi bo ka kgoma kgolo ya ngwana gabotse go e na le go ba tutuetšo e mpe. Ka 2008, pego yeo e gatišitšwego ka makasineng wa Social Science Research * e itše: “Bodumedi bo bontšhitšwe bo kaonefatša tlemagano magareng ga batswadi le bana bobedi bakeng sa bomma le botate.” Pego ye gape e boletše gore: “Bodumedi le bomoya di bonagala e le karolo e bohlokwa kudu maphelong a bana ba bantši e bile di bohlokwa ditswalanong tša lapa.” Ela hloko kamoo kutollo yeo e swanago ka gona le seo Jesu Kriste a se boletšego ge a re: “Go thaba bao ba lemogago gore ba nyaka dilo tša moya.”—Mateo 5:3.

Go thwe’ng ka kgopolo ya gore bana ba swanetše go gola pele ba ka ithuta ka Modimo le bodumedi? Kgopolo yeo e hlokomologa therešo ye: Monagano wa ngwana o bjalo ka pakete yeo e sego ya tšhelwa selo. Ruri batswadi ba swanetše go dira kgetho; ba ka tlatša pakete yeo ka gae ka melao ya motheo ya boitshwaro le ditumelo tšeo ba bonago di swanetše goba ba dumelela dikgopolo tše dintši tša ka ntle di tlatša menagano le dipelo tša bana ba bona.

Sephiri ke Sefe?

Histori e hlatsela gore bodumedi bo ka kgona go kgothaletša kgethollo le lehloyo. Bjale batswadi ba ka phema bjang ditlamorago tšeo di hlalositšwego ke Jonathan Swift? Ba ka ruta bana ba bona bjang ditumelo tšeo di ba thušago go rata batho ba bangwe?

Sephiri sa go dira bjalo se ka tsebja ge go hwetšwa dikarabo tša dipotšišo tše tharo tše rego: (1) Bana ba swanetše go ithuta eng? (2) Ke mang yo a swanetšego go ba ruta? (3) Ke mekgwa efe ya go ruta yeo e šomago gakaonekaone?

[Mongwalo wa tlase]