Jesu o be a tla Araba Bjang?

Batho ba bantši bao ba boifago Modimo ba nagana gore bodumedi bo swanetše go akaretšwa dipolitiking. Ba dumela gore bodumedi bo ka kgatha tema e bohlokwa go rarolleng mathata a batho. Lega go le bjalo, badumedi ba bangwe ba botegago ba nagana gore bodumedi le dipolitiki di swanetše go arogana. Wena o nagana’ng ka tema yeo bodumedi bo e kgathago dipolitiking? Na mekgatlo yeo e matla e swanetše go šoma gotee?

JESU KRISTE o hlalositšwe e le motho “yo a tutuetšago kudu historing ya bodumedi ya batho.” Ka gona, akanya re be re ka mmotšiša potšišo ye, Na bodumedi bo swanetše go akaretšwa dipolitiking? O be a tla re’ng? Ge a be a le lefaseng, o ile a araba potšišo yeo ka mantšu le ka ditiro. Ka mohlala, Thutong ya gagwe e tumilego ya Thabeng, Jesu o neile ditaelo tšeo di thušitšego balatedi ba gagwe go lemoga tema yeo ba swanetšego go e kgatha bathong. Anke re hlahlobeng dintlha tše dingwe go tšwa thutong yeo ye e tumilego.

 Kgoma Maphelo a Batho ba Bangwe

Jesu o hlalositše boemo bja kgopolo bjoo balatedi ba gagwe ba swanetšego go ba le bjona ka lefase. O boletše gore: “Lena le letswai la lefase, eupša ge letswai le felelwa ke matla a lona, go toka ga lona go tla tsošološwa bjang? Ga le sa dirišetšwa selo le ge e le sefe ge e se go lahlelwa ka ntle gore le gatakelwe ke batho. Lena le seetša sa lefase. . . . Seetša sa lena a se bonege pele ga batho, e le gore ba bone mediro ya lena e mebotse gomme ba nee Tatago lena yo a lego magodimong letago.” (Mateo 5:13-16) Ke ka baka la’ng Jesu a ile a bapiša balatedi ba gagwe le letswai le seetša?

Mantšu a Jesu a umaka gore balatedi ba gagwe ba swana le letswai go batho ka moka, e sego feela go sehlopha se senyenyane. Ba swana le seetša go bohle bao ba nyakago go bona gabotse, e sego go palo e lekanyeditšwego ya batho. A diriša dipapišo tšeo, Jesu o bontšhitše ka mo go kwagalago gore o be a sa nyake gore balatedi ba gagwe ba ikarole ka mo go feletšego setšhabeng. Ka baka la’ng?

Ela hloko se se latelago: Letswai le ka se boloke dijo di le boemong bjo bobotse ge e ba le sa tswakwe le tšona. Lebone le ka se tloše leswiswi ka phapošing ge e ba le beilwe kgole le yona. Ka gona, ga go makatše gore Jesu ga se a ka a laela barutiwa ba gagwe gore ba hudugele karolong e itšego ya lefase e le gore ba ipopele ditšhaba tša badumedi. E bile ga se a ka a kgothaletša balatedi ba gagwe gore e be ditšhikanoši tšeo di phelago meagong ya bodumedi. Go e na le moo, bjalo ka ge letswai le swanetše go tswakwa le dijo gomme seetša se swanetše go tloša leswiswi, Bakriste le bona ba swanetše go ba le tutuetšo maphelong a ba bangwe.

“Ga se karolo ya lefase”

Lega go le bjalo, ditaelo tša Jesu tša gore balatedi ba gagwe ba swanetše go dirišana le batho ba bangwe, di rotoša potšišo e bohlokwa mabapi le pono ya Mokriste ka dipolitiki. Ka baka la’ng? Pejana ga lehu la gagwe, Jesu o rapeletše balatedi ba gagwe ka gore: “Ga ke go kgopele gore o ba tloše lefaseng, eupša gore o ba šireletše ka baka la yo kgopo. Bona ga se karolo ya lefase go etša ge nna ke se karolo ya lefase.” (Johane 17:15, 16) Ka gona, go kgonega bjang gore Bakriste e se be karolo ya lefase eupša, ka nako e swanago, ba tšee karolo ditšhabeng tša gabo bona? Go hwetša karabo, anke re eleng hloko dipotšišo tše tharo tše oketšegilego:

• Jesu o be a lebelela dipolitiki bjang?

• Bakriste ba swanetše go dira’ng lehono?

• Dithuto tša Bokriste di kgoma batho bjang?

[Ntlhakgolo go letlakala 4]

Jesu o bontšhitše ka mo go kwagalago gore o be a sa nyake gore balatedi ba gagwe ba ikarole ka mo go feletšego setšhabeng