“KE A LEBOGA.” Ke mang yo a sa thabišwego ke go kwa mantšu a tebogo bakeng sa mošomo o dirilwego gabotse goba mpho yeo e neilwego go tšwa pelong? Ka moka ga rena re nyaka go tseba gore maiteko a rena a tšewa e le a bohlokwa, kudukudu ke bao re ba ratago. Go ba gona, re rata Modimo wa rena Jehofa go feta tšohle. Na Jehofa o lebelela maiteko a rena a go mo hlankela e le a bohlokwa? Anke re hlahlobeng ditirišano tša gagwe le Ebede-meleke, monna yo a ilego a bea bophelo bja gagwe kotsing gore a phološe yo mongwe wa baporofeta ba Modimo.—Bala Jeremia 38:7-13 le 39:16-18.

Ebede-meleke e be e le mang? Go bonagala e be e le molaki kgorong ya Kgoši Tsedekia wa Juda. Ebede-meleke o phetše nakong e tee le Jeremia, yoo Modimo a ilego a mo roma go yo lemoša Juda yeo e sa botegego ka phedišo ya yona yeo e tlago. Le ge a be a dikologilwe ke dikgošana tše di sa dumelego go Modimo, Ebede-meleke o be a boifa Modimo e bile a hlompha Jeremia kudu. Dika tša moya tša Ebede-meleke di ile tša bewa tekong ge dikgošana tše mpe di be di latofatša Jeremia ka maaka ka gore o be a lwantšha mmušo, gomme di mo lahlela ka petseng e tletšego leraga, tša mo tlogela gore a hwe. (Jeremia 38:4-6) Ke eng seo Ebede-meleke a bego a tla se dira?

Ebede-meleke o ile a gata mogato ka sebete le ka go tia, a sa tšhoge go itefeletša ga dikgošana. O ile a ya go Tsedekia phatlalatša gomme a ganetšana le go swarwa ka go hloka toka ga Jeremia. Mohlomongwe a šupa badiri bao ba bobe, o boditše kgoši gore: “Banna ba ba dirile bobe . . . [go] Jeremia.” (Jeremia 38:9) Ebede-meleke o ile a atlega, gomme ka taelo ya Tsedekia, a tšea banna ba 30 ba ya go hlakodiša Jeremia.

Ebede-meleke bjale o ile a bontšha seka se sengwe se se rategago: botho. A tšea “mašela a hlagetšego le ditsekana tše hlagetšego tša mašela a di theošetša ka dithapo go Jeremia.” Ke ka baka la’ng a mo theošeditše mašela le ditsekana tša mašela? E le gore Jeremia a ka šireletša mahwafa a gagwe, a fokotša go gohlwa le ge e le gofe ge a be a gogwa go tšwa petseng e tletšego leraga.—Jeremia 38:11-13.

Jehofa o ile a bona seo Ebede-meleke a se dirilego. Na O ile a se tšeela godimo? Modimo o boditše Ebede-meleke ka Jeremia gore go fedišwa ga Juda go be go le kgauswi. Ke moka Modimo o ile a kgonthišetša Ebede-meleke ka go tia ka phološo. Jehofa o itše: “Ke tla go hlakodiša . . . O ka se gafelwe seatleng sa batho . . . Ruri ke tla go phološa, o ka se bolawe ka tšhoša; o tla ithopela moya wa gago bjalo ka dithebola.” Ke ka baka la’ng Jehofa a ile a holofetša go šireletša Ebede-meleke? Jehofa o mmoditše gore: “Ka gobane o mpotile.” (Jeremia 39:16-18) Jehofa o be a tseba gore Ebede-meleke ga se a gata mogato feela ka gobane a be a tshwenyega ka Jeremia eupša gape e be e le ka baka la go bota ga gagwe Modimo le go ba le tumelo go yena.

Thuto e molaleng: Jehofa o leboga seo re se dirago ge re mo hlankela. Beibele e re kgonthišetša gore o gopola gaešita le tiro e nyenyane ya borapedi ye e tutuetšwago ke pelo e tletšego tumelo. (Mareka 12:41-44) Na o ikwa o tutueletšega go batamela kgauswi le Modimo yo yo a nago le tebogo? Ge e ba go le bjalo, o ka kgodišega gore O tla phelela seo Lentšu la gagwe le mmitšago sona: “Moputsi wa bao ba mo tsomago ka phišego.”—Baheberu 11:6.

Mmalo wa Beibele o šišintšwego bakeng sa May:

▪ Jeremia 32-50