Na o ka Bota Bodumedi Tabeng ya Ntwa?
Alberto o hlanketše go tša bohlabani nywaga e nyakilego go ba e lesome. O gopola ka gore: “Moruti wa rena o be a re šegofatša, a re, ‘Modimo o na le lena.’ Eupša ke be ke nagana gore, ‘Ke ya go bolaya, mola Beibele e re, “o se ke wa bolaya.”’”
Ray o be a šoma go tša bohlabani nakong ya Ntwa ya II ya Lefase. Ka lekga le lengwe o kile a botšiša moruti gore: “O namela ka sekepeng gomme wa rapelela madira gore a fenye. Na manaba a rena le ona ga a na thulaganyo e swanago?” Moruti o ile a araba ka gore Morena o šoma ka ditsela tšeo di sa kwešišegego.
Ge e ba karabo yeo e sa go kgotsofatše, ga se wena o nnoši.
KE ENG SEO BEIBELE E SE RUTAGO?
Jesu o itše e nngwe ya ditaelo tše dikgolo tša Modimo ke gore “o rate moagišani wa gago ka mokgwa wo o ithatago ka wona.” (Mareka 12:31) Na Jesu o ile a bea tekanyetšo tabeng ya go rata moagišani wa rena go ithekgile ka gore moagišani o dula kae goba gore ke wa setšhaba sefe? Aowa. O ile a botša balatedi ba gagwe gore: “Bohle ba tla tseba ka se gore le barutiwa ba ka, ge e ba le ratana.” (Johane 13:34, 35) Go ratana ga bona e be e tla ba mo go makatšago kudu mo e lego gore e be e tla ba leswao. Ba be ba ka upša ba hwelana go e na le go bolayana.
Bakriste ba pele ba be ba phela ka go dumelelana le mantšu a Jesu. The Encyclopedia of Religion e re: “Botate ba kereke ya pele, go akaretša Tertullian le Origen ba ile ba dumela gore Bakriste ba be ba thibetšwe go tšea bophelo bja motho, e lego molao wa motheo wo o ilego wa ba thibela go tšea karolo madireng a Roma.”
DIHLATSE TŠA JEHOFA DI ŠOMA BJANG TABENG YE?
Ka ge Dihlatse tša Jehofa di dula mo e nyakilego go ba dinageng ka moka, ditho tša tšona di ikhwetša di le mahlakoreng ka bobedi a dinaga tšeo di lwago. Lega go le bjalo, di dira sohle seo di ka se kgonago go boloka leswao la lerato.
Na baetapele ba bodumedi ba rutile ka lerato la kgonthe la Bokriste?
Ka mohlala, ntweng ya 1994 ya semorafo ya magareng ga Mahutu le Matutsi kua Rwanda, Dihlatse tša Jehofa di ile tša se tšee lehlakore ka mo go feletšego. Dihlatse tša merafo ka bobedi di be di šireletšana, gantši di bea maphelo a tšona kotsing kudu. Nakong ya ge Dihlatse tše pedi tša Mahutu tšeo di bego di širileditše bana babo tšona ba Matutsi di be di swarwa, bahlabani ba mokgatlo wa Mahutu wa Interahamwe ba itše: “Le swanetše go hwa ka gobane le thušitše Matutsi gore a phonyokge.” Ka manyami, Dihlatse tšeo tše pedi tša Mahutu di ile tša bolawa ka nako yeo.—Johane 15:13.
O nagana’ng: Na ditiro tša Dihlatse tša Jehofa di dumelelana le seo Jesu a se boletšego ka lerato la boikgafo?
