Ditsebi tša monagano di re botša gore batho ba swanetše go kgotsofatša se se fetago dinyakwa tša bona tša nama e le gore ba thabe e le ka kgonthe. Re bona se tabeng ya gore batho ba nyaka go dira selo se itšego seo se nago le morero goba go hlankela selo se itšego se se phagamego. E le go kgotsofatša senyakwa se, ba bangwe ba itapološa ka go bogela tlhago, go dira tša bokgabo, go theetša mmino, le tše dingwe. Lega go le bjalo, ba bangwe ga ba tloge ba kgotsofatšwa ke dilo tše bjalo.

Taba ya gore batho ba na le kganyogo e ageletšwego ka go bona ya go kganyoga dilo tša moya ga e makatše babadi ba Beibele. Dikgaolo tša mathomo tša Genesi di bontšha gore ka morago ga ge Modimo a bopile batho ba babedi ba pele, o be a boledišana le bona ka mehla, e lego seo se bego se ba nea sebaka sa go ba le tswalano ya moya le yena. (Genesi 3:8-10) Modimo o be a sa bopela batho gore ba phele ka ntle le yena; ba nyaka go dula ba boledišana le Mmopi wa bona. Beibele e bolela ka senyakwa se gantši.

Ka mohlala, Jesu o itše: “Go thaba bao ba lemogago gore ba nyaka dilo tša moya.” (Mateo 5:3) Go tšwa mantšung ao, re ka phetha ka gore senyakwa sa bohlokwa sa bophelo bjo bo thabišago le bjo bo kgotsofatšago ke go kgotsofatša kganyogo ya rena ya go tseba Modimo. Re ka dira seo bjang? Jesu o ile a bolela karabo ya seo ge a be a re: “Motho a ka se phele ka senkgwa feela, eupša o tla phela le ka polelo e nngwe le e nngwe e tšwago molomong wa Jehofa.” (Mateo 4:4) Ke ka ditsela dife mantšu a Modimo, ke gore, dikgopolo le ditaelo tša Modimo tšeo di hwetšwago ka Beibeleng, di dirago gore re kgone go phela bophelo bjo bo thabišago le bjo bo nago le morero? Anke re eleng hloko dintlha tše tharo tša motheo.

Lehono, go na le ditsebi tše dintši kudu tšeo di dulago di loketše go nea keletšo mabapi le ditswalano, lerato, bophelo bja lapa, go rarolla diphapano, lethabo gaešita le ka morero wa bophelo ka bowona. Lega go le bjalo, ke mang yo a swanelegago kudu go ka nea tlhahlo e kwagalago le e lekalekanego dikarolong tše ka moka ge e se Mmopi wa batho, yena Jehofa Modimo?

Ka mohlala: Ge o reka sedirišwa se sefsa, se bjalo ka khamera goba khomphutha, o letetše gore se tle se  na le puku ya tlhahlo ya mong wa sona yeo e hlalosago kamoo o ka se dirišago gabotse ka gona le gore se go kgotsofatše. Beibele e ka swantšhwa le puku e bjalo ya tlhahlo. Ke puku ya tlhahlo bakeng sa bophelo bja batho bjoo Modimo, yoo go ka thwego ke mothopo wa bjona, a re neilego yona gore re e diriše. Selo se se go thwego ke puku ya tlhahlo se hlalosa seo setšweletšwa se hlametšwego go se dira le kamoo se swanetšego go dirišwa ka mo go holago kudu.

Go etša ge go le bjalo ka puku le ge le efe ya tlhahlo yeo e ngwadilwego gabotse, Beibele e lemoša babadi ka ditiro tšeo di ka senyago bophelo bja rena. Keletšo goba ditsela tša go kgaoletša tšeo ba bangwe ba di neago di ka kwagala e le tšeo di ipiletšago, gaešita le tšeo di šomago, eupša na ga se mo go kwagalago go nagana gore re tlo holega kudu le go phema mathata ge e ba re latela tlhahlo ya Mmopi?

Le ge Jehofa Modimo a nea ditaelo le tlhahlo, ga a re gapeletše gore re di amogele. Go e na le moo, ka ge e le Mogaugedi yo lerato, o ipiletša go rena ka borutho ka gore: “Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona. Ge feela le be le ka ela hloko ditaelo tša ka, gona khutšo ya lena e be e tla etša noka gomme go loka ga lena gwa etša maphoto a lewatle.” (Jesaya 48:17, 18) Ka boripana, ge e ba re latela tlhahlo ya Modimo, re tla phela gabotse. Ge re bea taba ka tsela e nngwe, re nyaka Modimo e le gore re phele gabotse le ka lethabo.

Ba bangwe ba nagana gore ga ba nyake Modimo ka gobane ba hwetša dikgang tše dintši tše di gakantšhago bophelong tšeo di sa sepedišanego le go dumela go Modimo yo lerato. Ka mohlala, ba ka botšiša gore: ‘Ke ka baka la’ng batho ba lokilego ba swanetše go tlaišega?’ ‘Ke ka baka la’ng masea a mangwe ao a se nago molato a belegwa e le digole?’ ‘Ke ka baka la’ng bophelo bo tletše go hloka toka gakaakaa?’ Tšeo e tloga e le dipotšišo tše bohlokwa kudu, gomme go hwetša dikarabo tša tšona tše di kgotsofatšago go ka kgoma bophelo bja rena kudu. Eupša go e na le go akgofela go phara Modimo molato ka mathata ao, anke re boneng kamoo Lentšu la Modimo, e lego Beibele, le ka re sedimošago ka taba ye.

Kgaolong ya boraro ya puku ya Genesi, re hwetša pego ya mabapi le Sathane, yoo, ka go diriša noga, a ilego a leka go dira gore batho ba babedi ba pele ba se ke ba kwa taelo ya Jehofa Modimo ya gore ba se ke ba ja dienywa tša sehlare sa go tseba botse le bobe. Sathane o ile a botša Efa gore: “Le ka se hwe lehu. Gobane Modimo o tseba gore ka lona letšatši leo le tlago go ja tša sona, mahlo a lena a tla bulega gomme la swana le Modimo, la tseba botse le bobe.”—Genesi 2:16, 17; 3:4, 5.

Ka mantšu ao, Sathane ga se a fo bolela gore Modimo ke moaketši, eupša o bontšhitše gore tsela ya Modimo ya go buša ga e na toka. Diabolo o ile a bolela gore ge batho ba be ba ka theetša yena, dilo di be di tla ba sepelela gabotse kudu. Dikgang tšeo di be di ka rarollwa bjang? Jehofa o ile a kgetha go dumelela gore ditiragalo tšeo di tšee nako e le gore a dire gore bohle  ba kgone go bona ge e ba ditatofatšo tšeo a be go a pharilwe ka tšona e be e le therešo goba maaka. Ge e le gabotse Modimo o be a nea Sathane le bao ba bego ba ema le yena sebaka sa gore ba bontšhe ge e ba batho ba ka kgona go phela gabotse ka ntle le Modimo.

O nagana gore karabo dipolelong tša Sathane ke efe? Na batho ba ka phela gabotse le go ipuša ka katlego ka ntle le Modimo? Tlaišego, go hloka toka, bolwetši le lehu gotee le bosenyi, go phuhlama ga boitshwaro, dintwa, dipolao tša molokwanarite gotee le ditiro tše dingwe tše sehlogo tšeo di tlaišitšego batho go theoša le nywagakgolo ke bohlatse bjo bo ka se kego bja ganetšwa bja gore maiteko a batho a go leka go ipuša ka ntle le Modimo a paletšwe o šoro. Go e na le go bontšha gore Modimo ke yena a bakilego masetlapelo a batho, Beibele e bolela ka sebaki se segolo sa ona ge e re: “Motho [o] buša yo mongwe gore a mo gobatše.”—Mmoledi 8:9.

Go ya ka se, na ga go molaleng gore go nyakega gore re retologele go Modimo e sego feela bakeng sa go hwetša dikarabo tša dipotšišo tšeo di hlobaetšago tšeo batho ba lebeletšanago le tšona eupša gape re retologele go yena bakeng sa tharollo? Modimo o tla dira’ng?

Ke kgale batho ba kganyoga go lokologa bolwetšing, botšofading le lehung. Ba feditše nako e ntši kudu, le go dira boiteko bjo bogolo gotee le go diriša dilo tše dintši ba leka go fihlelela seo eupša ba sa atlege. Ba bantši ba ile ba dumela gore ka go nwa metswako e fapafapanego, mohuta o itšego wa meetse goba ka go dula lefelong tsoko, ba be ba ka dula ba sa tšofale. Ditoro tše ka moka di foloditše.

Modimo o nyaka gore batho ba phele gabotse ba be ba thabe. Woo e be e le morero wa gagwe wa mathomong ge a be a bopa batho, gomme ga se a o lebala. (Genesi 1:27, 28; Jesaya 45:18) Jehofa Modimo o re kgonthišetša gore selo le ge e le sefe seo a rerago go se dira se tla atlega. (Jesaya 55:10, 11) Beibele e re botša ka kholofetšo ya Modimo ya go tsošološa maemo a Paradeise ao a lahlilwego ke batho ba babedi ba pele. Pukung ya mafelelo ya Beibele, re hwetša mantšu a ao a rego: “O [Jehofa Modimo] tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 21:4) Modimo o tla tliša bjang maemo a ao a kgahlišago, gomme re ka holwa bjang ke kholofetšo ye?

Morwa wa Modimo, Jesu Kriste, o rutile balatedi ba gagwe gore ba rapelele gore thato ya Modimo e dirwe. Batho ba bantši ba tlwaetše thapelo yeo goba ba fela ba e rapela gantši, e lego yeo ba bangwe ba e bitšago Thapelo ya Morena. Yona e re: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:9, 10) Ee, Mmušo wa Modimo ke sedirišwa seo ka sona Jehofa Modimo a tlago go fediša ditlamorago tše di kwešago bohloko tša pušo ya batho gomme a tliša lefase le lefsa la go loka leo a le holofeditšego. * (Daniele 2:44; 2 Petro 3:13) Re swanetše go dira’ng gore re holwe ke kholofetšo ya Modimo?

 Jesu Kriste o bontšha ka mogato o bonolo woo re swanetšego go o gata ge a re: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Ee, ka thušo ya Modimo go a kgonega go hwetša bophelo bjo bo sa felego lefaseng le lefsa leo le holofeditšwego. Tebelelo yeo e ka go nea lebaka le le kgodišago la go araba ka ee potšišong e rego, Na re nyaka Modimo?

Nywageng e dikete tše pedi e fetilego, kua Areopago goba Mmotong wa Mars kua Athene, moapostola Paulo o ile a botša Baathene bao ba bego ba na le dikgopolo tša bona e bile ba se na bothata bja go amogela tše dingwe se se latelago mabapi le Modimo: “Yena ka noši o nea batho ka moka bophelo le mohemo le dilo ka moka. Gobane ka yena re na le bophelo, re a sepela e bile re gona, go etša ge ba bangwe ba direti tša lena ba boletše gore: ‘Gobane re bile re bana ba gagwe.’”—Ditiro 17:25, 28.

Seo Paulo a se boditšego Baathene e sa dutše e le sa therešo. Mmopi wa rena o re nea moya wo re o hemago, dijo tšeo re di jago le meetse ao re a nwago. Ruri re be re ka se phele ntle le dilo tše dibotse tšeo Jehofa a re filego tšona bakeng sa gore re tšwele pele re phela. Eupša ke ka baka la’ng Modimo a tšwetše pele a dira ditokišetšo tše bjalo bakeng sa batho ka moka, go sa šetšwe gore ba nagana ka yena goba go se bjalo? Paulo o boletše gore ke bakeng sa gore “ba tsome Modimo ge e ba ba ka mo phopholetša gomme ba mo hwetša e le ka kgonthe, gobane ge e le gabotse ga a kgole le yo mongwe le yo mongwe wa rena.”—Ditiro 17:27.

Na o ka rata go tseba Modimo gabotse, ke gore, go ithuta mo go oketšegilego ka merero ya gagwe le keletšo ya gagwe ya gore re kgone go phela gabotse gona bjale le ka mo go sa felego? Ge e ba go le bjalo, o kgothaletšwa gore o boledišane le motho yo a go tlišeditšego makasine wo goba o ikgokaganye le bagatiši ba wona. Ba tla thabela go go thuša.