Na o rapela ka mehla? Batho ba bantši, gaešita le bailaModimo ba bangwe, ba a rapela. Eupša ke ka baka la’ng batho ba rapela? Go ya ka nyakišišo yeo e dirilwego kua Fora, seripagare sa badudi ba Fora se a rapela goba go naganišiša ka dinako tše dingwe “feela gore se ikwe bokaone.” Go swana le Mayuropa a mantši, batho ba ga ba rapele ka maikemišetšo a go rapela Modimo. Go e na le moo, ba tsoma “go fodiša ga thapelo.” Ka lehlakoreng le lengwe, badumedi ba bangwe ba rapela Modimo ge feela ba le mathateng, ba letetše gore a arabe dikgopelo tša bona gateetee.—Jesaya 26:16.

Go thwe’ng ka wena? Na o nagana gore thapelo e fo ba tsela ya go go thuša gore o nagane gabotse? Ge e ba o dumela go Modimo, na o kgona go bona gore thapelo e a šoma bophelong bja gago? Goba na o bona eka dithapelo tša gago ga di arabje? Beibele e ka go thuša gore o se ke wa lebelela thapelo e le sehlare sa gore motho a ikwe gabotse, eupša o e lebelele e le tsela e bohlokwa ya go go batametša go Modimo.