Akanya ka tate yoo a boledišanago le morwa wa gagwe wa nywaga e šupago. Tate yo o re: “Kgalekgale Modimo o ile a bopa lefase le dilo ka moka tšeo di lego go lona, a ba a bopa le letšatši, ngwedi le dinaledi.” Mošemanyana yo o nagana ka se ka metsotswana e sego kae ke moka o botšiša tatagwe gore: “Tate, Modimo o bopilwe ke mang?”

Tate o mo araba ka gore: “Ga go na motho yo a bopilego Modimo, ke kgale a dutše a le gona.” Karabo yeo e bonolo e kgotsofatša ngwana yoo gona bjale. Lega go le bjalo, ge a gola potšišo ye e sa dutše e mo tshwenya. O sa thatafalelwa ke go kwešiša gore motho a ka ba gona bjang a se na moo a tšwago gona. Legohle le lona le bile le mathomo. O sa dutše a ipotšiša gore: ‘Modimo o tšwa kae?’

Beibele e araba ka go re’ng? E fo araba go swana le tate yoo go boletšwego ka yena mohlaleng wa ka mo godimo. Moshe o ngwadile gore: “Wena Jehofa, . . . . pele ga ge dithaba ka botšona di belegwa, goba pele ga ge o tšweletša lefase le naga bjalo ka ge eka ke ka mahloko a pelego, Wena o Modimo go tloga mehleng ya neng le neng go iša mehleng ya neng le neng.” (Psalme 90:1, 2) Ka mo go swanago, moporofeta Jesaya o ile a makala ka gore: “Na ga se la tšwa le tseba goba ga se la tšwa le ekwa? Jehofa, Mmopi wa lefase go fihla magomong a lona, ke Modimo wa neng le neng”! (Jesaya 40:28) Ka mo go swanago, lengwalo la Juda le bolela ka Modimo e le yo a lego gona “lebakeng la bosafelego bjohle.”—Juda 25.

Mangwalo a a re bontšha gore Modimo ke “Kgoši ya bosafelego,” go etša ge moapostola Paulo a mo hlalositše. (1 Timotheo 1:17) Se se bolela gore Modimo ke kgale a le gona, go sa šetšwe bokgale bjoo re ka naganago ka bjona. Yena o tla dula a le gona le nakong e tlago. (Kutollo 1:8) Ka go rea’lo, go ba gona ga gagwe ka bosafelego ke gona go mo dirago gore e be Ramatlaohle.

Ke ka baka la’ng re palelwa ke go kwešiša taba ye? Ka baka la gore bophelo bja rena bjo bokopana bo dira gore re fapane le kamoo Jehofa a lebelelago nako ka gona. Ka ge Modimo e le wa bosafelego, go yena nywaga e sekete e lekana le letšatši letee. (2 Petro 3:8) Ka mohlala: Na tšie, yeo e phelago matšatši a 50 feela e ka kwešiša bophelo bja rena bja nywaga e 70 go ya go e 80? Le gatee! Lega go le bjalo, Beibele e bolela gore re swana le ditšie ge re bapetšwa le Mmopi wa rena yo Mogolo. Gaešita le bokgoni bja rena bja go nagana ga se selo ge bo bapetšwa le bja Modimo. (Jesaya 40:22; 55:8, 9) Ka gona ga go makatše gore go na le dikarolo tše dingwe tša Jehofa tšeo re ka se kego ra di kwešiša.

Le ge taba ya go ba gona ga Modimo ka mo go sa felego e ka ba thata go e kwešiša, re kgona go bona gore e a kwagala. Ge e ba motho yo mongwe a bopile Modimo, gona motho yo ke yena Mmopi. Lega go le bjalo, go etša ge Beibele e hlalosa, Jehofa ke yena a ‘bopilego dilo ka moka.’ (Kutollo 4:11) Go oketša moo, re a tseba gore legohle nakong e nngwe le kile la se be gona. (Genesi 1:1, 2) Le tšwa kae? Mmopi wa lona o swanetše gore a be gona pele. O ile a ba gona pele diphedi tše dingwe tše bohlale di ka ba gona, go swana le Morwa wa gagwe yo a tswetšwego a nnoši le barongwa. (Jobo 38:4, 7; Bakolose 1:15) Ka gona, go molaleng gore o bile gona a nnoši la mathomo. Ga go na gore o bopilwe; ga go na selo seo se bego se ka mmopa ka ge go be go se na selo seo se bego se le gona.

Go ba gona ga rena gotee le legohle ka moka ke bohlatse bja gore Modimo ke wa bosafelego. Yena yo a dirago gore legohle la rena le legologolo le be le mosepelo, A thea melao ya go le laola, o swanetše go ba a be a le gona. Ke yena a buduletšego bophelo dilong tšohle.—Jobo 33:4.