Jehofa Modimo o bopile barongwa ba dimilione kgalekgale pele a ka bopa batho. (Jobo 38:4, 7) Barongwa ba ke diphedi tša moya tše matla tirelong ya Modimo, ka dinako tše dingwe ba rongwa gore ba hlahle le go šireletša bahlanka ba gagwe mo lefaseng. (Psalme 91:10, 11) Lehono, barongwa ba thuša batho go holwa ke ditaba tše dibotse tšeo balatedi ba Jesu ba di tsebatšago.—Bala Kutollo 14: 6, 7.

Na re swanetše go rapela barongwa gore ba re thuše? Aowa. Thapelo ke tirelo ya borapedi yeo e newago Modimo feela. (Kutollo 19:10) Ka ge barongwa e le bahlanka ba Modimo, ba theetša ditaelo tša gagwe go e na le go theetša tša batho. Ka gona, re swanetše go lebiša dithapelo tša rena ka mehla go Modimo ka Jesu.—Bala Psalme 103:20, 21; Mateo 26:53.

Go swana le batho, barongwa ba bopilwe ba na le tokologo ya boikgethelo, ka gona ba ka kgetha go dira se se nepagetšego goba se se fošagetšego. Ka manyami, barongwa ba bantši ba ile ba rabela kgahlanong le Modimo. (2 Petro 2:4) Wa pele gare ga bona e be e le Sathane; ba bangwe ba ile ba latela gomme ba fetoga batemona. Morago bjale, Sathane le batemona ba gagwe ba rakilwe legodimong gomme ba lahletšwe mo lefaseng.—Bala Kutollo 12: 7-9.

Go ata mo gontši le mo go makatšago ga bokgopo le bošoro ga e sa le go tloga ka 1914, ke pontšho ya gore Modimo kgauswinyane o tla fediša Sathane le batemona ba gagwe. Ke moka Modimo o tla bušetša lefase boemong bja lona bjo bo lokilego.—Bala Kutollo 12:12; 21: 3, 4.