Ngwaga le ngwaga bodiidi bjo bo feteletšego bo bolaya dimilione tša batho ka baka la phepompe le bolwetši. Le ge dikarolo tše dingwe tša lefase di humile kudu, batho ba bantši ba sa phela ka bodiidi bjo bo feteletšego. Beibele e bontšha gore bodiidi ke kgale e le bothata gare ga batho.—Bala Johane 12:8.

Go tla nyakega mmušo wo o bušago lefase ka moka gore bodiidi bo fele. Mmušo woo o tla swanelwa ke go ba le matla a go aba ditšweletšwa tša lefase ka tekatekano gotee le go fediša le dintwa, e lego tšeo di bakago bodiidi kudu. Modimo o holofeditše mmušo o bjalo wo o bušago lefase ka moka.—Bala Daniele 2:44.

Modimo o kgethile Morwa wa gagwe e lego Jesu gore a buše batho ka moka. (Psalme 2:4-8) Jesu o tla hlakodiša badiidi le go fediša kgatelelo le bošoro.—Bala Psalme 72:8, 12-14.

Ka ge Jesu e le “Kgošana ya Khutšo” yeo go boletšwego ka yona e sa le pele, o tlo tliša khutšo ya lefase le tšhireletšego. Ka gona bohle bao ba lego lefaseng ba tla dula magaeng a bona, ba thabela mošomo o kgotsofatšago le mokhora wa dijo.—Bala Jesaya 9:6, 7; 65:21-23.