TABA YA LETLAKALA LA KA NTLE | NA GO RAPELA GO A HOLA?
Na go na le Motho yo a Theetšago?
Batho ba bangwe ba nagana gore go rapela e fo ba go senya nako le gore ga go motho yo a theetšago. Ba bangwe ba lekile go rapela eupša ba nagana gore ga ba arabje. Moilamodimo yo mongwe o ile a ikgopolela gore Modimo e ka ba e le motho wa mohuta mang ke moka a rapela ka gore: “E fo ntshebela go se nene.” Eupša o ile a bolela gore Modimo o ile a “homola a re tuu!”
Lega go le bjalo, Beibele e re kgonthišetša gore go na le Modimo le gore o theetša dithapelo. Beibele e na le mantšu ao a ilego a botšwa batho ba bogologolo, a rego: “O [Modimo] tla le gaugela ge a ekwa le goeletša; ge a ekwa le lla o tla le araba.” (Jesaya 30:19) Temana e nngwe ya Beibele e re: “Thapelo ya ba botegago e a mo kgahla.”—Diema 15:8.
Jesu o ile a rapela Tatagwe, “gomme kgopelo ya gagwe ya kwewa.” —Baheberu 5:7
Beibele gape e bolela ka mehlala ya batho bao dithapelo tša bona di ilego tša kwewa. Temana e nngwe e bolela gore Jesu o ile a “kgopela Yo a ilego a kgona go mo phološa” le gore “kgopelo ya gagwe [e ile] ya kwewa.” (Baheberu 5:7) Mehlala e mengwe e ka hwetšwa go Daniele 9:21 le go 2 Dikoronika 7:1.
Gona ke ka baka la’ng batho ba bangwe ba nagana gore dithapelo tša bona ga di arabje? E le gore dithapelo tša rena di kwewe, re swanetše go rapela Modimo yoo go bolelwago ka yena ka Beibeleng feela, e lego Jehofa, * e sego modimo yo mongwe goba badimo. Modimo gape o nyaka gore re ‘kgopele go ya ka thato ya gagwe’—re kgopele dilo tšeo a di amogelago. Modimo o re kgonthišetša gore ge re rapela ka tsela ye, “o a re kwa.” (1 Johane 5:14) Ka gona, e le gore dithapelo tša rena di kwewe, re swanetše go tseba Modimo yoo go bolelwago ka yena ka Beibeleng le go ithuta ka thato ya gagwe.
Batho ba bantši ba dumela gore thapelo ga e fo ba tirelo ya bodumedi eupša ba gatelela gore Modimo o kwa dithapelo le go di araba. Isaac, wa kua Kenya, o re: “Ke ile ka rapelela thušo ya gore ke kwešiše Beibele. Ka moragonyana ga moo, motho yo mongwe o ile a tla go nna gomme a ithaopela go nthuša.” Kua Philippines, Hilda o be a nyaka go kgaotša go kgoga. Ka morago ga go palelwa gantši, monna wa gagwe o ile a mo eletša ka gore: “Ke ka baka la’ng o sa rapele Modimo gore a go thuše?” O ile a diriša keletšo yeo gomme o re: “Ke ile ka makatšwa ke kamoo [Modimo] a ilego a nthuša ka gona. Go be go le bjalo ka ge eka ga ke sa kganyoga go kgoga. Ke ile ka kgona go kgaotša go kgoga.”
Na Modimo a ka ba a nyaka go go thuša ka dilo tšeo o tshwenyegilego ka tšona tšeo di dumelelanago le thato ya gagwe?
^ par. 6 Jehofa ke leina la Modimo bjalo ka ge le utolotšwe ka Beibeleng.
