Ke belegetšwe motsaneng wo o lego Poland, wo o sego kgole le mollwane wa Jeremane. Ka ge ke be ke dikologilwe ke dipolasa le dithokgwa, ke be ke phela ka khutšo. Batswadi ba ka bao ba nthatago ba be ba nkgothaletša gore ke be motho yo botho, ke atlege sekolong gaešita le go phegelela mošomo wa maemo.

Mathata a ka a ile a thoma ge ke eya go ithutela tša molao yunibesithing yeo e lego motseng wa Wrocław. Ka ge ke be ke le kgole le batswadi ba ka, ke ile ka ikgethela bagwera ba babe. Ke be ke dutše ke rata kgwele ya maoto, eupša ka baka la tutuetšo ya bagwera ba ka ba bafsa, ke ile ka thoma go e fišegela. Sehlopha seo ke bego ke se rata se be se etšwa Warsaw, gomme mafelobekeng ke be ke se latelela go sa šetšwe gore se yo bapala kae. Maetong ao go be go nwewa kudu, go dirišwa diokobatši gampe gomme ka dinako tše dingwe go lwewa o šoro le bathekgi ba dihlopha tše dingwe. Ke be ke lebelela se e le tsela ya go itebatša dikgateletšo tša bophelo bja letšatši le letšatši, le ge ke be ke tseba gore ge maphodisa a ka ntshwara ke be ke tla senyegelwa ke mošomo.

Nna le bagwera ba ka re be re rata go etela di-club le mafelo a go bina. Ge re fihla moo, gantši re be re elwa ditarateng. Ke ile ka swarwa ke maphodisa gantšinyana, eupša ke be ke dula ke efoga go tsena mathateng a magolo le ba molao—ka dinako tše dingwe ka go ntšha letsogo-le-kobong. Ke be ke tloga ke nagana gore ke thabela bophelo bja ka ka botlalo. Lega go le bjalo, pelong ya ka ke be ke tseba gore seo ke bego ke se dira se fošagetše. Ke be ke eya kerekeng Sontaga se sengwe le sengwe e le ge ke leka go efoga go ikwa ke na le molato.

Ka 2004, Dihlatse tše pedi tša Jehofa di ile tša kokota mojakong wa ka gomme ka dumela go boledišana le tšona ka Beibele. Ge ke dutše ke ithuta mo go oketšegilego ka seo se bolelwago ke go ba Mokriste wa kgonthe, letswalo la ka le ile la thoma go ntshwenya e le ruri. Ke be ke tseba gore ke swanetše go tlogela go nwa kudu, go diriša diokobatši le go gwerana le batho bao ba bego ba sa phele ka ditekanyetšo tša Beibele. Le gona ke ile ka bona gore ke swanetše go fetoša semelo sa ka se šoro. Le ge ke be ke lemogile gore ke swanetše go fetoša tsela ya ka ya go phela, go ile gwa se be bjalo.

Phetogo e kgolo e bile bošegong bjo bongwe moo ke ilego ka thoma ntwa le banna ba seswai. Ke gopola ke rapaletše setarateng, ke otlwa ka difeisi le go ragwa hlogong. Ge ke be ke ikwa eka ke kgauswi le go hwa, ke ile ka rapela ka re: “Ke kgopela tshwarelo, Jehofa, ka ge ke se ka tšeela  Lentšu la gago godimo. Ge nka phologa, ke go holofetša gore ke tla ithuta Beibele le Dihlatse gomme ka lokiša bophelo bja ka.” Ke ile ka makatšwa ke gore ke ile ka phologa. Ke ile ka phetha kholofetšo ya ka ya go ithuta Beibele.

Ka 2006, ke ile ka hudugela Engelane. Pakane ya ka e be e le gore ke hwetše tšhelete e lekanego gore ke boele Poland gomme ke hwetše degree ya ka godingwana ya tša molao. Ge ke dutše ke ithuta Beibele, lengwalo le lengwe le ile la nkgoma kudu. Moapostola Paulo o ngwadile gore: “Ruri ke sa dutše ke tšea dilo tšohle e le go loba ka baka la mohola o phalago tšohle wa tsebo ka Kriste Jesu Morena wa ka. Ka baka la gagwe ke amogetše go loba dilo tšohle gomme ke di tšea e le maudi e le gore ke rue Kriste.” (Bafilipi 3:8) Go swana le nna, moapostola Paulo o be a ithutetše tša molao—gomme le yena o be a kile a ba motho yo šoro kudu. (Ditiro 8:3) Lega go le bjalo, o ile a lemoga gore go be go na le tsela e kaone ya go phela: e lego ya go hlankela Modimo le go dira sohle seo a ka se kgonago go ekiša Jesu. Ge ke be ke naganišiša ka mohlala wa Paulo, ke ile ka lemoga gore mošomo wa maemo le boitshwaro bjo šoro ga se tsela ya go hwetša lethabo. Ke ile ka kgodišega gore ge e ba Paulo a kgonne go fetoga, gona le nna nka fetoga. Ka gona ke ile ka phetha ka gore ke dule Engelane gomme ke lebale ka go phegelela degree e nngwe ya tša molao.

Ge ke dutše ke ithuta ka Jehofa, ke ile ka ikwa ke batametše kgauswi le yena. Ke ile ka kgongwa ke kholofetšo ya gagwe ya go lebalela bao ba nyakago go dira diphetogo e le ka kgonthe. (Ditiro 2:38) Le gona ge ke be ke naganišiša ka lengwalo la 1 Johane 4:16 leo le bolelago gore “Modimo ke lerato,” ke ile ka thoma go lemoga lebaka leo ka lona a hloilego bošoro.

Ke ile ka kgahlwa gape ke boitshwaro bja Dihlatse. Ke be ke bona gore di leka go phela ka ditekanyetšo tše phagamego tša boitshwaro tša Beibele. Ke be ke nyaka go ba karolo ya borwarre bjo bo thabilego bjoo di bo thabelago. Ka morago ga ditlhohlo le go dira diphetogo tše mmalwa bophelong bja ka, ke ile ka kolobetšwa ka ba yo mongwe wa Dihlatse tša Jehofa ka 2008.

Beibele e ile ya mphetoša ka se sa ba motho yo a fišegelago kgwele ya maoto wa go rata maemo, yo šoro, wa go diriša diokobatši gampe le wa go nwa kudu eupša ka ba mohlanka wa Modimo yo a thabelago go ruta ba bangwe ka Beibele. Ke sa dutše ke rata go bogela kgwele ya maoto, eupša ke ikemišeditše go bea boithabišo bjo bjalo boemong bja bjona bjo bo swanetšego.

Bjale ke thabela lenyalo le molekane wa ka Esther, e lego morapedigotee le nna yo mobotse wa Jehofa. Re tloga re thabela go ruta batho bao ba bolelago Sepolishi Beibele mo leboabodikela bja Engelane. Ke mathomo bophelong bja ka ke ikwa ke kgotsofetše e le ka kgonthe. Ke na le letswalo le le hlwekilego le bophelo bjo bo nago le morero.