Kgaolo 25

Na Nka Thaba ka Lapeng la Motswadi o Tee?

“Bana bao ba nago le batswadi ka bobedi ba ka ba le diphapoši tša bona gomme ba reka diaparo tše difsa. Eupša nna ke swanetše go robala ka phapošing e tee le motho yo mongwe, e bile ke ka sewelo moo ke hwetšago mohuta wa diaparo tšeo ke di ratago. Mma o re ga a na tšhelete ya go di reka. Ka ge ke swanetše go dira mediro ka moka ya ka gae ge yena a ile mošomong, ke ikwa eka ke lekgoba—ke ikwa eka ke tingwa tše dingwe tša dilo tšeo bana ba di thabelago.”—Shalonda wa nywaga e 13.

GA GO na pelaelo gore ge ka lapeng go na le batswadi ba babedi bao ba nago le lerato e ba gae ga mahlaku. Tate le mma bao ba lego gotee gantši ba ka nea tlhahlo e oketšegilego, tšhireletšo le thekgo. Beibele e re: “Ba babedi ba phala o tee, ka gobane ba  hwetša moputso o mobotse ka go itapiša ga bona.”—Mmoledi 4:9.

Gaešita le ge seo se boletšwego ka mo godimo e le therešo, ge e ba lapa la batswadi ba babedi e be e le phoofolo, ga go na pelaelo gore le be le tla wela legorong la diphoofolo tšeo di lego kgauswi le go hwelela. Ka mohlala, bana ba kua United States ba ka godimo ga seripagare ba tla fetša nako e itšego ba dula ka lapeng la motswadi o tee pele ba ka ba le nywaga e 18.

Lega go le bjalo, bafsa ba bangwe bao ba dulago ka malapeng a motswadi o tee ba lešwa dihlong ke maemo a bona. Ba bangwe ba ikwa ba imelwa ke dikgateletšo le mathata ao ba lebanago le ona bophelong. Ge e ba o dula ka lapeng la motswadi o tee, ke dikgateletšo dife tšeo o lebanago le tšona? Mothalading wo o lego ka mo tlase, ngwala bothata bjo bo go tshwenyago kudu.

․․․․․

Ka baka la ge o sa hwetše lerato ka mehla le tlhokomelo ya yo mongwe wa batswadi ba gago, na se se ra gore o ka se thabe bophelong? Aowa. Mo gontši go ithekgile ka tsela yeo o lebelelago boemo bja gago ka yona. Diema 15:15 e re: “Matšatši ka moka a mohlaki ke a mabe; eupša wa pelo e lokilego o dula a le monyanyeng.” Go etša ge seema se se bontšha, tsela yeo motho a ikwago ka yona gantši e laolwa kudu ke boemo bja gagwe bja kgopolo go feta maemo a gagwe. O ka dira’ng go ithuša gore o be le “pelo e lokilego” go sa šetšwe maemo a gago?

Seo o ka se Dirago go Lwantšha Maikwelo a Fošagetšego

Sa pele, leka gore o se ke wa dumelela mantšu ao a sego botho a batho ba bangwe a go dira gore o ikwe o gateletšegile. Ka mohlala, barutiši ba bangwe ga ba na kwelobohloko ge ba bolela le barutwana bao ba tšwago malapeng a motswadi o tee. Ba bangwe e bile ba bolela gore go hloka boitshwaro le ge e le gofe moo barutwana ba ba go bontšhago go bakwa ke gore ba tšwa malapeng a motswadi o tee. Eupša ipotšiše gore: ‘Na batho bao ba bolelago mantšu ao ba tloga ba tseba nna le ba lapa lešo gabotse? Goba na ba fo ba ba boeletša seo ba kwelego batho ba bangwe ba se bolela ka malapa a motswadi o tee?’

 Re swanetše go lemoga gore lentšu “tšhiwana” le tšwelela ka makga a mantši ka Mangwalong. Ga go na lekga le letee moo lentšu le le dirišitšwego ka tsela ya lenyatšo. Ge e le gabotse, mo e nyakilego go ba dipegong tšeo ka moka, Jehofa o bontšha go tshwenyega ga gagwe ka tsela e kgethegilego ka bana bao ba godišetšwago ka malapeng a motswadi o tee. *

Ka lehlakoreng le lengwe, batho ba bangwe bao ba nago le maikemišetšo a mabotse ba ka ba šedi ka mo go feteletšego ge ba bolela le wena. Ka mohlala, ba ka dikadika go diriša mantšu a bjalo ka “tate,” “lenyalo,” “tlhalo” goba “lehu,” ba boifa gore mantšu a bjalo a ka go kgopiša goba a go leša dihlong. Na mokgwa wa mohuta wo o a go tshwenya? Ge e ba go le bjalo, ka bohlale ba bontšhe gore ga go hlokagale gore ba be šedi ka mo go feteletšego ge ba bolela le wena. Tony wa nywaga e 14 ga a tsebe tatagwe wa kgonthe. O re batho ba bangwe ba itoma maleme ge ba swanetše go bolela mantšu a itšego. Lega go le bjalo, ka boomo Tony o diriša ona mantšu ao ge a bolela le bona. O re: “Ke nyaka ba tsebe gore ga ke lešwe dihlong ke boemo bja ka.”

Phema go hlwa o re “Nkabe”

Go ba gona, ke ga tlhago go ikwa o nyamile e bile o lahlegetšwe ge e ba batswadi ba gago ba hlalane goba ge e ba motswadi yo o mo ratago a hwile. Lega go le bjalo, mafelelong o swanetše go amogela boemo bja gago. Beibele e nea keletšo ye: “O se ke wa re: ‘Go re’ng mehla ya pele e be e phala ya bjale?’” (Mmoledi 7:10) Tabeng ye, Sarah wa nywaga e 13 yoo batswadi ba gagwe ba ilego ba hlalana ge a be a na le nywaga e 10 o nea kgothatšo ye: “O se ke wa dulela go nagana ka boemo bja gago, o gateletšegile ka baka la go hlwa o nagana ka seo nkabego e bile boemo bjo bokaone, goba o  nagana gore mathata ao o nago le ona a bakwa ke gore o tšwa ka legaeng la motswadi o tee goba gore bana bao ba dulago ka magaeng ao a nago le batswadi ka bobedi ba phela manobonobong.” Ye ke keletšo e botse. Ge e le gabotse, gaešita le malapa ao a nago le batswadi ka bobedi a lebeletšana le mathata.

Ke ka baka la’ng o sa akanye ka lapa leno le le bjalo ka sehlopha sa basesiši bao ba sesišago seketswana ka mahuduo? Ge nkabe go kgonega, seketswana se be se tla ba le basesiši ka moka. Ka lapeng la motswadi o tee, yo mongwe wa basesiši ga a gona gomme sehlopha ka moka se swanetše go šoma ka thatanyana. Na se se bolela gore lapa leo le paletšwe? Aowa! Ge feela sehlopha ka moka se dirišana, seketswana seo se tla dula se sesa gomme sa fihla mo se yago gona.

Na o Kgatha Tema ya Gago?

Ke’ng seo ka go lebanya o ka se dirago go kgonthišetša gore o kgatha tema ya gago o dirišana le ba lapa leno ka moka?  Ela hloko ditšhišinyo tše di latelago tše tharo:

Ithute go seketša. Tšhelete ke bothata bjo bogolo malapeng a mantši a motswadi o tee. O ka dira’ng gore o thuše? Tony yo go boletšwego ka yena pejana o re: “Bana bao ke tsenago le bona sekolo ba gapeletša batswadi ba bona gore ba ba rekele diteki le diaparo tša maina a go tuma. Ba gana go ya sekolong ge ba sa di hwetše. Ga ke na diaparo tša moragorago tša fešene, eupša ke dula ke apere diaparo tša bothakga le tšeo di hlwekilego, le gona ke a di hlokomela. Mma o dira sohle seo a ka se kgonago; ga ke nyake go mo imetša le go feta.” Ka go dira boiteko bjo itšego, o ka ekiša moapostola Paulo yoo a itšego: “Ke ithutile go kgotsofalela seo ke nago le sona . . . , e le gore kae le kae, ka nako le ge e le efe, ke kgotsofale.”—Bafilipi 4:11, 12, TEV.

Tsela e nngwe ya go seketša ke go phema go senya dilo. (Johane 6:12) Mofsa yo a bitšwago Rodney o re: “Ka gae ke leka go ba šedi gore ke se ke ka thuba dilo goba ka di timetša, ka ge go nyakega tšhelete go di lokiša goba go reka tše dingwe. Ke leka go tima didirišwa tša mohlagase goba mabone ge e ba a sa hlokagale. Se se thuša go fokotša tšhelete yeo e swanetšego go lefelela mohlagase.”

Gata mogato wa pele. Batswadi ba bantši bao ba se nago balekane ba dikadika go bea melao ya ka gae goba go kgopela bana ba bona gore ba thuše ka mediro ya ka gae. Ka baka la’ng? Ba bangwe ba nagana gore ba swanetše go tswalela sekgoba sa go se be gona ga motswadi yo mongwe ka gore ba nolofaletše bana ba bona bophelo. Ba ka nea mabaka ka gore: ‘Ga ke nyake gore bana ba ka ba se ke ba ipshina.’

 Ka gona o ka lekega go ikhola ka maikwelo a motswadi wa gago a go ikwa a le molato. Eupša go dira bjalo go tla fo okeletša motswadi wa gago morwalo, go ka se mo fokoletše wona. Go e na le moo, ke ka baka la’ng o sa gate mogato wa pele ka gore o thuše ka mediro ya ka gae? Ela hloko seo Tony a bego a ikemišeditše go se dira. O re: “Mma o šoma sepetlele gomme diaparo tša gagwe tša go ya mošomong di swanetše go aenwa. Ka gona ke mo aenela tšona.” Na woo ga se mošomo wa basadi? Tony o araba ka gore: “Ba bangwe ba nagana bjalo. Eupša seo se thuša mma, ka gona ke a se dira.”

Bontšha tebogo. Ka ntle le go thuša motswadi wa gago ka mediro ya ka gae, o ka dira mo gontši go mo kgothatša ka gore o mmontšhe tebogo. Motswadi yo mongwe yo a se nago molekane o ngwadile gore: “Gantši ke hwetša gore ge ke tloga ke gateletšegile goba ke tenegile ka ge ke bile le letšatši le thata mošomong  gomme ke boa ka gae—ke lona letšatši leo ke hwetšago morwedi wa ka a nthušitše go lokišetša dijo tša go lalela.” O oketša ka gore: “Morwa wa ka o tla go nna gomme a nkgokarela.” Mma yo o ikwa bjang ka ditiro tše bjalo tša go bontšha go mo naganela? O re: “Maikwelo a ka a a fetoga gomme ka ikwa ke le kaone gape.”

Gare ga dintlha tše tharo tšeo re sa tšwago go di ahlaahla, ngwala yeo o nyakago go šomela go yona kutšwanyana. ․․․․․

Go dula ka legaeng la motswadi o tee go go nea sebaka sa go hlagolela dika tše bjalo ka kwelobohloko, go se be le boithati gotee le go ba motho yo a ka botwago. Go oketša moo, Jesu o itše: “Go na le lethabo le legolo go neeng go feta go amogeleng.” (Ditiro 20:35) O ka thaba kudu ge e ba o ikgafela go thuša motswadi wa gago yo a se nago molekane.

Ke therešo gore ka dinako tše dingwe o tlo kganyoga ge nkabe batswadi ba gago ka bobedi ba be ba le gona ka gae. Lega go le bjalo, o ka ithuta go diriša boemo bja gago ka tsela e holago. Se ke seo ngwanenyana yo a bitšwago Nia a se lemogilego. O re: “Ka morago ga gore tate a hwe, motho yo mongwe o ile a mpotša gore ‘bophelong dilo tše dibotse motho o itirela tšona,’ ka gona ke ile ka dula ke gopola mantšu ao. A ile a nkgopotša gore ga go hlokagale gore ke dumelele boemo bja ka bo nthibela go thaba.” Le wena o ka ba le pono e swanago. Gopola gore ga se maemo a gago ao a go dirago gore o thabe goba gore o se ke wa thaba. Seo se laolago dilo ke tsela yeo o a lebelelago ka yona le seo o se dirago ka ona.

BALA KA MO GO OKETŠEGILEGO MABAPI LE TABA YE GO BOLUMO 1, KGAOLO 4

[Mongwalo wa tlase]

KEY SCRIPTURE

“Le se ke la kgahlegela ditaba tša lena feela, eupša le kgahlegele le tša ba bangwe.”—Bafilipi 2:4.

KELETŠO

Ge e ba o nagana gore o neilwe boikarabelo bjo bontši go feta bjo o ka kgonago go bo rwala, ka bohlale šišinya gore motswadi wa gago a leke se se latelago:

● A dire lelokelelo la mešomo ka moka ya ka gae yeo setho se sengwe le se sengwe sa lapa se swanetšego go e dira.

● Ge e ba go kgonega, a abe mešomo lefsa go ditho tša lapa tšeo di ka kgonago go e dira.

NA O BE O TSEBA . . . ?

Go rwala boikarabelo ka gae go ka go thuša gore o gole tsebong kapejana go feta bafsa bao ba dulago ka malapeng ao a nago le batswadi ka bobedi, bao gantši ba se nago boikarabelo bjo bogolo.

KGATO YEO KE TLAGO GO E TŠEA!

Ke tla lwantšha maikwelo a ka a fošagetšego ka go ․․․․․

Ge e ba batho ba eba šedi ka mo go feteletšego ge ba bolela le nna, ke tla re ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng batho ba bangwe ba tšeela fase bana bao ba tšwago malapeng a motswadi o tee?

● Ke ka baka la’ng motswadi wa gago a ka dikadika go go kgopela gore o thuše ka mediro ya ka gae?

● O ka leboga bjang motswadi wa gago?

[Ntlhakgolo go letlakala 211]

“Ga e sa le batswadi ba ka ba hlalane, nna le mma re tloga re kgona go boledišana; re monwana le lenala.”—Melanie

[Seswantšho go letlakala 210, 211]

Lapa la motswadi o tee le swana le seketswana seo se sesišwago ka mahuduo seo go sona mosesiši o tee a sego gona—sehlopha ka moka se tla swanelwa ke go šoma ka thatanyana, eupša se ka atlega ge e ba se dirišana