Mohlala​—Josefa

Josefa o lebeletšane le boemo bjo thata. Mosadi wa mong wa gagwe o mo kgopetše leboelela gore a robale le yena. Le gona bjale o sa mo kgopela gape! Eupša Josefa ga a lekege. Ge e le gabotse, karabo ya gagwe e bontšha gore o tiišitše. O re go mosadi yoo: “Nka dira bjang bobe bjo bjo bogolo gakaakaa gomme ka direla Modimo sebe?” Ge mosadi yo a sa dumelelane le yena—a bile a mo swara—Josefa ga a hlabišwe dihlong ke go tšhaba. Ge e le gabotse, o tšhabela ka ntle! Josefa o ipontšha e le yo a botegago boitshwarong.—Genesi 39:7-12.

Le wena o ka kopana le boemo bjoo go bjona motho yo a itšego a nyakago o ineela dikganyogong tša gago tša botona le botshadi. Go gana ga se taba ya go fo ba le boitshwaro. Sa pele o swanetše go kganyoga go thabiša Mmopi wa gago e lego Jehofa Modimo. Josefa o be a na le dikganyogo tša botona le botshadi go fo swana le wena. Lega go le bjalo, o be a bona e le gabošilo gore a kgotsofatše dikganyogo tšeo ka tsela yeo e bego e tla galefiša Mmopi wa gagwe. Ka mo go swanago, o swanetše go kgodišega gore go se hlweke boitshwarong go galefiša Modimo le gore mafelelong go baka masetlapelo. Ka gona katanela go hlagolela le go kgomarela go botega boitshwarong go etša Josefa.