GO TLOGA ka August 15-18, 1963, bagoeledi ba makgolo ba nageng ye le baeng ba 122 bao ba tšwago dinageng tše dingwe ba ile ba kopana toropong ya Bandung, ka Bodikela bja Java. Ba be ba tlile kopanong ya sehlogo se rego: “Ditaba tše Dibotse tša ka mo go sa Felego,” e lego kopano ya mathomo ya ditšhabatšhaba yeo e kilego ya swarwa kua Indonesia.

E le gore ba lokišetše kopano yeo, bana babo rena ba ile ba swanelwa ke go fenya mapheko a mmalwa. Lefelo la go swarela kopano le ile la swanelwa ke go fetošwa gararo ka baka la ge setšhaba se be se keteka Letšatši la Tokologo. Go ya ga ditheko godimo go ile gwa dira gore balaodi ba hlatloše ditefo tša dinamelwa ka 400 lekgolong, gomme baeng ba bangwe ba ile ba swanelwa ke go diriša dinamelwa tše dingwe. Ngwanabo rena yo mongwe o ile a sepela matšatši a tshela gore a fihle kopanong. Baeng ba 70 bao ba tšwago Sulawesi ba ile ba sepela matšatši a mahlano ka dikepe tšeo di tletšego wa go falala go ya kopanong yeo.

Kopanong ye, batlakopanong ba Maindonesia ba be ba thabetše go kopana le bana babo bona ba Bakriste go tšwa dinageng tše dingwe, go akaretša le ditho tše pedi tša sehlopha se bušago, e lego Frederick Franz le Grant Suiter. Yo mongwe wa baeng bao o itše: “Bana babo rena mo ba bonagala ba thabile; ba dula ba sega le go myemyela.”

Batho ba ka godimo ga ba 750 ba ile ba ba gona kopanong yeo gomme gwa kolobetšwa ba 34. Ronald Jacka o itše: “Tiragalo ye ya bohlokwa e ile ya tutuetša batho ba bantši bao ba thabelago gore ba amogele therešo. E ile ya tutuetša bana babo rena ba lefelong leo gore ba tšwele pele ba hlankela Modimo ka mafolofolo.”