Ditaba tše dibotse tša gore batho ba tla phela ka mo go sa felego lefaseng di ngwadilwe ka Beibeleng. (Psalme 37:29) Beibele e bopša ke dipuku tše 66 tše dinyenyane. Modimo o dirišitše banna ba e ka bago ba 40 ba botegago gore ba di ngwale. Tše hlano tša mathomo di ngwadilwe ke Moshe nywageng e ka bago e 3 500 e fetilego. Ya mafelelo e ngwadilwe ke moapostola Johane nywageng ya ka godimo ga e 1 900 e fetilego. Bangwadi ba Beibele ba ngwadile dikgopolo tša mang? Modimo o ikgokagantše le bangwadi ba Beibele ka moya wa gagwe o mokgethwa. (2 Samuele 23:2) Ba ngwadile dikgopolo tša Modimo, e sego tša bona. Ka baka leo, Jehofa ke Mongwadi wa Beibele.​—Bala 2 Timotheo 3:16; 2 Petro 1:20, 21.

Lebelela bidio Mongwadi wa Beibele ke Mang?

Re tseba gore Beibele e tšwa go Modimo ka gobane e bolela bokamoso e sa le pele ka nepo. Ga go motho yoo a ka dirago bjalo. (Joshua 23:14) Ke Modimo Ramatlaohle feela yo a ka bonago bokamoso bja batho e sa le pele ka nepo.​—Bala Jesaya 42:9; 46:10.

Re ka letela gore puku e tšwago go Modimo e be ya moswananoši, gomme e bjalo. Go phatlaladitšwe dikopi tše dimilione tše dikete tša Beibele ka maleme a makgolo. Gaešita le ge e le puku ya bogologolo, Beibele e dumelelana le thutamahlale yeo e hlatsetšwego. Le gona, bangwadi ba yona ba 40 ga ba ganetšane. * Go feta moo, Beibele e bonagatša gabotse lerato la Modimo, gomme e sa dutše e ena le matla a go kaonefatša maphelo a batho. Mabaka a a kgodiša batho ba dimilione gore Beibele ke Lentšu la Modimo.​—Bala 1 Bathesalonika 2:13.

Lebelela bidio Re ka Kgodišega Bjang Gore Seo Beibele e se Bolelago ke Therešo?

Beibele e lebiša tlhokomelo go ditaba tše dibotse tša gore Modimo o na le morero o lerato ka batho. Mangwalo a hlalosa kamoo motho a ilego a lahlegelwa ke tokelo ya go dula lefaseng la paradeise le kamoo paradeise e tlago go tsošološwa ka gona mafelelong.​—Bala Kutollo 21:4, 5.

Lentšu la Modimo gape le hupere melao, melao ya motheo le keletšo. Go oketša moo, Beibele e bega histori ya ditirišano tša Modimo le batho—histori yeo e utollago semelo sa Modimo. Ka baka leo, Beibele e ka go thuša go tseba Modimo. E hlalosa kamoo o ka bago mogwera wa gagwe ka gona.​—Bala Psalme 19:7, 11; Jakobo 2:23; 4:8.

Poroutšha ye e tla go thuša go kwešiša Beibele ka go diriša mokgwa woo Jesu a bego a o diriša. O be a bolela ka ditemana tše dintši tša Beibele gomme a hlalosa “seo se bolelwago ke Mangwalo.”​—Bala Luka 24:27, 45.

Ke dilo tše sego kae tšeo di kgahlišago go swana le ditaba tše dibotse tše tšwago go Modimo. Eupša batho ba bangwe ga ba di rate, gomme ba bangwe di a ba tena. O se ke wa nyama. Kholofelo ya gago ya go phela ka mo go sa felego e ithekgile ka gore o tsebe Modimo.​—Bala Johane 17:3.