Lenyalo le bopa lapa le lefsa. Le ge o tla dula o rata le go hlompha batswadi ba gago, ga bjale molekane wa gago ke motho yo bohlokwa kudu go wena mo lefaseng. Ba bangwe ba leloko ba ka thatafalelwa ke go amogela seo. Eupša melao ya motheo ya Beibele e ka go thuša gore o be le tekatekano, e le gore o boloke khutšo le ba leloko ge o dutše o šoma ka thata go aga tswalano e mpsha ya lapa.

SEO BEIBELE E SE BOLELAGO: “Godiša tatago le mmago.” (Baefeso 6:2) Go sa šetšwe gore o na le nywaga e mekae, o swanetše go dula o godiša le go hlompha batswadi ba gago. Gopola gape gore ka ge molekane wa gago e ka ba e le morwa goba morwedi, o swanetše go šetša batswadi ba gagwe. “Lerato ga le hufege,” ka gona o se ke wa boifišwa ke tswalano yeo molekane wa gago a nago le yona le ba leloko.—1 Bakorinthe 13:4; Bagalatia 5:26.

SEO SE KA DIRWAGO:

• Phema dipolelo tša go feteletša, tše bjalo ka gore: “Ka mehla lapa la geno ga le ntšeele hlogong” goba “Mmago ga nke a rata seo ke se dirago”

• Leka go lebelela dilo ka leihlo la molekane wa gago

SEO BEIBELE E SE BOLELAGO: ‘Monna o tla tlogela tatagwe le mmagwe, a kgomarela mosadi wa gagwe gomme bona e tla ba nama e tee.’ (Genesi 2:24) Ge o tsena lenyalong, batswadi ba gago ba ka ikwa eka ba sa na le boikarabelo go wena, gomme ba ka nyaka go tsenatsena ditaba tša lenyalo la gago go sa hlokagale.

Go ithekgile ka wena le molekane wa gago gore le tla ba beela mellwane efe le go ba botša yona ka lerato. Le ka bolela ka bolokologi le ka go lebanya ntle le go ba hlaba ka mantšu. (Diema 15:1) Boikokobetšo, boleta le go se fele pelo, di tla le thuša gore le age tswalano e borutho le ba leloko gomme la tšwela pele le “kgotlelelana ka lerato.”—Baefeso 4:2.

SEO SE KA DIRWAGO:

• Ge e ba o tshwenywa ke kamoo ba leloko ba tsenatsenago ditaba tša lena ka gona, ahlaahla taba yeo le molekane wa gago ge le thekgile ditho

• Dumelelanang ka seo le tlago go se dira go rarolla taba yeo