Bontši bja batho bao re badilego ka bona matlakaleng ao a fetilego ke bafsa bao ba ilego ba ‘gopola Mmopi wa bona yo Mogolo matšatšing a bofseng bja bona.’ (Mmo. 12:1) Ge e le gabotse, mmulamadibogo o tee go ba bararo palong ya babulamadibogo ba 3 197 ba kua Georgia o na le mengwaga e 25 goba ka tlase ga moo. Ke ka baka la’ng bafsa ba bantši gakaaka ba dira tšwelopele moyeng?

Go bonala go na le mabaka a mmalwa ao a dirilego gore se se kgonege. Lebaka le lengwe ke gore gantši malapa a kua Georgia a a ratana. Konstantine, yo a godišeditšego bana ba bahlano therešong, o hlalosa ka gore: “Selo seo se nkgogetšego therešong ke go bona gore Jehofa ke Tate yo lerato. Ge ke be ke e ba tate, ke be ke ikemišeditše go thuša bana baka gore ba ikwe ba lokologile ge ba na le nna.”

Malkhazi le mosadi wa gagwe, bao ba nago le bana ba bararo, ba dira sohle seo ba ka se kgonago gore ba dule ba ratana  bjalo ka lapa. O re: “Nako le nako re kgopela bana ba rena gore ba nagane ka selo seo ba se ratago ka rena le ka baratho le bagolo ba bona. Ke moka ra ba kgopela gore ba abelane le rena dintlha tšeo ba di nagannego borapeding bja rena bja lapa. Ka baka la seo, bana ba rena ba ithutile go bona dika tše dibotse go ba bangwe le go di tšeela godimo.”

E le go thekga tlwaetšo ya batswadi, bagolo ba akaretša bafsa medirong ya phuthego e sa le ba banyenyane. Nestori, yo a kolobeditšwego a na le mengwaga e 11, o re: “Bagolo ba be ba nnea dikabelo tše di fapafapanego tše dinyenyane ge ke be ke sa le yo monyenyane. Seo se nthušitše gore ke ikwe ke le setho sa phuthego.”

Go ba le batho bao e lego mehlala e mebotse le go hwetša thekgo ya bagolo go bohlokwa. Koba, e lego yo mongwe wa bana babo Nestori o hlalosa gore: “Mengwaga ya ka ya mahlalagading e be e se bonolo ge e bapetšwa le  ya bana bešo. Mogolo yo mongwe yo e sa lego mofsa yo gape a bego a mpeela mohlala, ka mehla o be leka go nkwešiša e bile a sa nkahlole. O bapetše karolo e bohlokwa go boeleng ga ka go Jehofa.”

Lehono, Nestori, Koba gotee le kgaetšedi ya bona Mari, ba hlankela gotee tšhemong yeo e lego lekatana. Koba o re: “Ga bjale ke phela bophelo bjo bo kgotsofatšago!”

Ofisi ya lekala e dira sohle go thekga maiteko a batswadi a go tlwaetša bana ba bona ka go akaretša Bakriste ba bafsa medirong e mengwe ya pušo ya Modimo. Setho se sengwe sa Komiti ya Lekala se re: “Re tšeela godimo bafsa ba rena, ka gona re leka go ba thekga ge ba dutše ba katanela go fihlelela dipakane tša bona tša moya.”

Go šoma le go gwerana le bana babo rena le dikgaetšedi bao ba godilego tsebong, go dira gore bafsa ba dule ba na le dilo tše dibotse tšeo ba ka naganago ka tšona. Mamuka, yo a šomilego kgauswi kudu le bahlanka ba ditšhabatšhaba modirong wa go aga Holo ya Kopano kua Tbilisi, o re: “Mediro ye ya ditšhabatšhaba e nneile dibaka tše dibotse tša go ithuta go ba bangwe. Ka ntle le go ithuta mošomo wa matsogo, ke ithutile dilo tše dintši tša moya.”

Botee bja malapa, kgothatšo ya bagolo le go beelwa mehlala e mebotse ke ba bangwe go bile le tutuetšo e botse go bafsa ba bantši ba Georgia. Batswadi ba bona ba na le maikwelo a swanago le a moapostola Johane, yo a ngwadilego gore: “Ga ke na lebaka le legolo la go thaba go feta le, la gore ke kwe gore bana ba ka ba tšwela pele ba sepela therešong.”—3 Joh. 4.

Ka 2013, Sehlopha se Bušago se ile sa kgopela makala ka moka gore a nyakišiše ge e ba go ka nyakega dikgatišo ka maleme a mangwe ao a bolelwago ditšhemong tša ona. Morero e be e le go fihlelela batho ba bantši ka ditaba tše dibotse.

Ka baka la seo, lekala la Georgia le ile la phetha ka gore le fetolele dikgatišo tše dingwe ka leleme la Sesvan le Semingrelia, e lego maleme ao a sa fapanego kudu le Segeorgia ao batho ba bangwe ba naganago gore ke mebolelo yeo e welago legorong la Segeorgia.

Babulamadibogo bao ba fišegago bao ba tšwago tikologong ya Svaneti ba ngwadile gore: “Masvan ke batho bao ba ratago dilo tša moya e bile ba hlompha Beibele kudu. Gaešita le batho bao mathomong ba bego ba dikadika go amogela  dikgatišo tša rena ba ile ba tutueletšega go tšea tšeo di bego di fetoletšwe ka segagabo bona.”

Bagoeledi ka moka bao ba bolelago Semingrelia ba ile ba kgomega kudu ge ba be ba thoma go ba le diboka ka leleme la gabo bona. Mmulamadibogo wa mofsa yo a bitšwago Giga, o dumela ka gore: “Ga bjale ke kgona go araba ka mantšu a ka dibokeng. Ga go sa nyakega gore ke fetolele karabo ka monaganong pele nka araba.”

Zuri, yo e le go mogolo phuthegong ya Semingrelia kua Tkaia, o hlalosa maikwelo a gagwe ka gore: “Go bile le ditiragalo tše di thabišago le tšeo di nyamišago bophelong bja ka. Lega go le bjalo, ga se tša ka tša ntira gore ke lle. Eupša ge dikopelo tša Mmušo di be di opelwa la mathomo dibokeng ka Semingrelia, ka moka re ile ra lla.”

Selo sa bohlokwa kudu historing ya Dihlatse tša Georgia se diregile ka Mokibelo wa di-6 tša April 2013, ge David Splane  wa Sehlopha se Bušago a be a nea polelo ya go neela meago ya lekala yeo e lokišitšwego le go katološwa, Holo ya Kopano, le moago o mofsa wa sekolo sa Beibele. Dihlatse tše dintši tša Georgia di ile tša bula magae a tšona le dipelo go amogeleng baeng ba 338 go tšwa dinageng tše 24.

Letšatšing le le latelago, batho ba 15 200 ba ile ba thabela polelo e kgethegilego ya Ngwanabo rena Splane. Diphuthego ka moka nageng ya Georgia di be di kgokagantšwe ka Inthanete bakeng sa go bona le go kwa polelo yeo. Ye e bile tiragalo e kgolo kudu ya ditšhabatšhaba yeo e kilego ya ba gona nageng ya Georgia. Ruri ye e bile tiragalo e thabišago yeo e dirilego gore bana babo rena le dikgaetšedi ba kgothatšane. Ngwanabo rena yo mongwe wa mofsa o boletše gore: “Ga bjale ke a tseba gore lefaseng le lefsa go tlo ba bjang.”

Sekolo sa Beibele sa Banyalani ba Bakriste seo ga bjale se bitšwago Sekolo sa Baebangedi ba Mmušo, e bile tšhegofatšo e kgolo go batho ba Jehofa kua Georgia. Ga e sa le tloga ka 2013, go alogile barutwana ba fetago 200. Ka ge barutwana ba ba leboga thuto yeo ba e hweditšego, ba ikemišeditše go hlankela ka mafolofolo mo go nago le tlhokagalo.

Ka baka la bagoeledi ba pele ba Mmušo bao ba bilego le sebete, ditaba tše dibotse di fihlile dikarolong ka moka tša Georgia. Jehofa o šegofaditše kudu maiteko a bona, go rata ga bona Modimo le moagišani, go ba le sebete gotee le go ba le tumelo.

Bana babo rena le dikgaetšedi ba kua Georgia bao ba fetago 18 000, ba thabela go tšwetša pele mošomo wo o thomilwego ke bana babo bona ba pele, wa go thuša baagišani ba bona go iponela ka bo bona matla a Lentšu la Modimo.—Bafil. 3:13; 4:13.