O NAGANA eng ge go bolelwa ka Letšatši la Kahlolo? Ba bantši ba nagana gore batho ba dimilione tše dikete ba tla tlišwa pele ga sedulo sa bogoši sa Modimo ka o tee ka o tee. Ge ba le moo, yo mongwe le yo mongwe wa bona o tla ahlolwa. Ba bangwe ba bona ba tla putswa ka paradeise ya legodimong gomme ba bangwe ba tla ahlolelwa tlhokofatšo ya ka mo go sa felego. Lega go le bjalo, Beibele e hlalosa taba e fapanego kudu ya lebaka le la nako. Lentšu la Modimo le hlalosa letšatši le e se nako e tšhošago, eupša e le nako ya kholofelo le tsošološo.

Go Kutollo 20:11, 12, re bala tlhaloso ya moapostola Johane ya Letšatši la Kahlolo ge a re: “Ka bona sedulo sa bogoši se segolo se sešweu le yo a dutšego go sona. Lefase le legodimo tša tšhaba pele ga gagwe, gwa se be le bodulo bjo bo hwetšwago bakeng sa tšona. Ka bona bahu ba bagolo le ba banyenyane ba eme pele ga sedulo sa bogoši, gomme mangwalo a go phuthwa a bulwa. Eupša lengwalo le lengwe la go phuthwa la bulwa; ke lengwalo la go phuthwa la bophelo. Bahu ba ahlolwa ka dilo tšeo di ngwadilwego mangwalong a go phuthwa go ya ka ditiro tša bona.” Moahlodi yo go bolelwago ka yena mo ke mang?

Jehofa Modimo ke yena Moahlodi yo a phagamego wa batho. Lega go le bjalo, ga se yena a dirago modiro wa go ahlola. Go  ya ka Ditiro 17:31, moapostola Paulo o boletše gore Modimo “o beile letšatši leo ka lona a rerago go ahlola ka toko lefase leo go agilwego go lona a diriša motho yo a mmeilego.” Jesu Kriste yo a tsošitšwego ke yena Moahlodi yo a beilwego. (Johane 5:22) Lega go le bjalo, Letšatši la Kahlolo le thoma neng? Le tlo tšea nako e kaaka’ng?

Puku ya Kutollo e bontšha gore Letšatši la Kahlolo le thoma ka morago ga ntwa ya Haramagedone, ge tshepedišo ya Sathane lefaseng e tla be e fedišitšwe. * (Kutollo 16:14, 16; 19:19–20:3) Ka morago ga Haramagedone, Sathane le batemona ba gagwe ba tla tswalelelwa sekoting ka nywaga e sekete. Ka nako yeo, baja-bohwa ba legodimong ba 144 000 e tla ba baahlodi gomme ba tla buša “e le dikgoši le Kriste ka nywaga e sekete.” (Kutollo 14:1-3; 20:1-4; Ba-Roma 8:17) Letšatši la Kahlolo ga se tiragalo feela e fetago ka lebelo e tšeago feela diiri tše 24. Le tšea nywaga e sekete.

Nakong yeo ya nywaga e sekete, Jesu Kriste o tla “ahlola ba ba phelago le ba ba hwilego.” (2 Timotheo 4:1) “Ba ba phelago” e tla ba “lešaba le legolo” leo le phologago Haramagedone. (Kutollo 7:9-17) Moapostola Johane le yena o bone “bahu . . . ba eme pele ga sedulo sa bogoši” sa kahlolo. Go etša ge Jesu a holofeditše, “bao ba lego mabitleng a kgopotšo ba [tla] kwa lentšu la [Kriste] gomme ba tšwa,” ka tsogo. (Johane 5:28, 29; Ditiro 24:15) Eupša bohle ba tla ahlolwa motheong ofe?

Go ya ka pono ya moapostola Johane, ‘mangwalo a go phuthwa a ile a bulwa’ gomme “bahu ba ahlolwa ka dilo tšeo di ngwadilwego mangwalong a go phuthwa go ya ka ditiro tša bona.” Na mangwalo a a go phuthwa ke pego ya mediro ya batho ya nakong e fetilego? Aowa, kahlolo e ka se lebiše tlhokomelo go seo batho ba se dirilego pele ba e-hwa. Re tseba seo bjang? Beibele e re: “Yo a hwilego o hunologile sebeng sa gagwe.” (Ba-Roma 6:7) Ge re bolela ka tsela ya seswantšhetšo, bao ba tsošitšwego ba tla boela bophelong dibe tša bona tša nakong e fetilego di lebetšwe. Ka gona mangwalo a go phuthwa a swanetše go ba a emela dilo tše di oketšegilego tšeo Modimo a di nyakago. E le gore ba phele ka mo go sa felego, baphologi ba Haramagedone le bao ba  tsošitšwego ba tla swanelwa ke gore ba kwe ditaelo tša Modimo, go akaretša dinyakwa le ge e le dife tše difsa tšeo Jehofa a ka di utollago nakong ya nywaga e sekete. Ka gona, batho ba tla ahlolwa motheong wa seo ba se dirago nakong ya Letšatši la Kahlolo.

Letšatši la Kahlolo le tla nea batho ba dimilione tše dikete sebaka sa bona sa pele sa gore ba ithute ka thato ya Modimo le gore ba dumelelane le yona. Se se bolela gore go tla dirwa modiro o mogolo kudu wa go ruta. Ka kgonthe, ‘ba ba agilego mo lefaseng ba tla rutwa toko.’ (Jesaya 26:9) Lega go le bjalo, ga se bohle bao ba tlago go ikemišetša go phela ka go dumelelana le thato ya Modimo. Jesaya 26:10 e re: “Yo mobe—le xo setšwa—xa a ithute tokô; le mo naxeng ya mekxwa e mebotse ó fo senya; boxolo bya Morêna xa’ bo bône.” Batho ba ba babe ba tla fedišetšwa sa ruri nakong ya Letšatši la Kahlolo.—Jesaya 65:20.

Mafelelong a Letšatši la Kahlolo, batho bao ba phologilego ba tla “phela” ka mo go feletšego e le batho ba phethagetšego. (Kutollo 20:5) Ka gona Letšatšing la Kahlolo batho ba tla tsošološetšwa boemong bja bona bja mathomong bjo bo phethagetšego. (1 Ba-Korinthe 15:24-28) Ke moka go tla ba le teko ya mafelelo. Sathane o tla lokollwa moo a bego a tswaleletšwe gona gomme a dumelelwa gore a leke go fora batho la mafelelo. (Kutollo 20:3, 7-10) Bao ba mo ganetšago ba tla bona go phethagala ka mo go feletšego ga kholofetšo ya Beibele e rego: “Baloki e ba beng ba naxa, ba dula mo xo yôna ka mehla le ka mehla.” (Psalme 37:29) Ee, Letšatši la Kahlolo e tla ba tšhegofatšo bathong bohle bao ba botegago!