Ga re na baruti bao ba lefšago mokgatlong wa rena. Go e na le moo, go etša ge go be go dirwa ge phuthego ya Bokriste e be e thoma, go kgethwa balebeledi bao ba swanelegago gore ba “diše phuthego ya Modimo.” (Ditiro 20:28) Bagolo ba ke banna bao ba gotšego moyeng bao ba etelelago pele ka phuthegong gomme ba diša, ‘e sego ka go gapeletšwa, eupša ka go rata; le gona e sego ka go rata leruo la go se botege, eupša ka go fišega.’ (1 Petro 5:1-3) Ke mošomo ofe wo ba re direlago wona?

Ba a re hlokomela le go re šireletša. Bagolo ba hlahla phuthego le go e šireletša moyeng. Ka ge ba lemoga gore Modimo o ba neile boikarabelo bjo bjo bohlokwa, bagolo ga ba buše batho ba gagwe, eupša go e na le moo, ba re thuša go iketla le go thaba. (2 Bakorinthe 1:24) Go fo etša ge modiši a hlokomela nku e nngwe le e nngwe ya gagwe gabotse, bagolo ba leka go tseba setho se sengwe le se sengwe sa phuthego.—Diema 27:23.

Ba re ruta kamoo re ka dirago thato ya Modimo ka gona. Bekeng e nngwe le e nngwe, bagolo ba okamela diboka tša phuthego bakeng sa go matlafatša tumelo ya rena. (Ditiro 15:32) Banna ba bao ba ineetšego gape ba etelela pele modirong wa boebangedi, ba šoma le rena le go re tlwaetša dikarolong ka moka tša bodiredi.

Ba a re kgothatša. Bakeng sa go re thuša go matlafatša tswalano ya rena le Jehofa, bagolo ba diphuthegong tša gabo rena ba ka boledišana le rena magaeng a rena goba Holong ya Mmušo bakeng sa go re thuša le go re homotša go tšwa Mangwalong.—Jakobo 5:14, 15.

Go tlaleletša mošomong wa bona ka phuthegong, bagolo ba bantši ba na le mešomo ya boiphedišo le boikarabelo bja lapa tšeo di nyakago tlhokomelo le nako ya bona e ntši. Re swanetše go hlompha bana ba babo rena bao ba šomago ka thata.—1 Bathesalonika 5:12, 13.

• Bagolo ba phuthego ba kgatha tema efe?

• Bagolo ba re bontšha ka ditsela dife gore ba a re kgahlegela?