1 Timothy 2:1-15
2 Áko áłtséhé góneʼ nihá laanaa nisingo kótʼéego bee haasdziih: Diné tʼáá ałtso bá nídaʼoohkąąh, bá sodadołzin, ahá sodadołzin áádóó ahééh danohsin;
2 hashtʼedadíníitʼéego índa kʼé daniidzingo Diyin God kʼehgo índa tʼáá ałtsojįʼ nihił daʼílı̨́įgo dahiniiʼnáa doo biniyé aláahgo naatʼáanii índa bídahólníihii tʼáá ałtso bá sodadołzin.
3 Ákótʼéego sodadołzingo Diyin God Yisdánihiiníiłii bił yáʼátʼééh índa bił hóshǫ́.
4 Éí diné tʼáá ałtso yisdádookah índa tʼáá aaníinii bił béédahodoozįįł yóʼní.
5 Háálá Diyin God tʼááłáʼí, áádóó Diyin God índa diné yá ataʼ sizíinii ałdóʼ tʼááłáʼí, éí Christ Jesus, Diné Silı̨́įʼii.
6 Christ éí diné tʼáá ałtso bibąąhági átʼéii bikʼé ninályáii jidooleeł biniyé nináʼázhdeetʼą́, áko baa hoolzhiizh yę́ędą́ą́ʼ baa hóóneʼ.
7 Oodlą́ índa tʼáá aaníinii éí doo Jew dineʼé danilíinii bee nanishtin doo biniyé Diyin God yaa halneʼii índa yá yilʼaadii nishłı̨́į doogo nishiníłtı̨́. Christ bee tʼáá aaníí ádíshní, doo shiyoochʼíid da.
8 Áko diné dahodísinii tʼáá ałtsogóó tʼáadoo áháchįʼí índa tʼáadoo naʼahíyátiʼí Diyin God yichʼįʼ dah dadéelníihgo sodadilzin doo nisin.
9 Tʼáá ákótʼéego asdzání danilíinii ádaa ádahalyą́ągo, áádóó dahóyą́ągo ééʼ bidaałtʼéii áádóó tʼáá bitaʼígi ádaatʼéii yee háádadiitʼįįh dooleeł nisingo bee haasdziih, tʼáadoo bitsiiʼ nideichʼąąhgo deibizhí, índa óola áádóó diichiłí tʼáadoo yee nidaʼádíchʼąąhígo yáʼátʼééh, índa ééʼ tʼáá íiyisí daʼílíinii tʼáadoo yee háádadiitʼįįhígóó yáʼátʼééh.
10 Nidi asdzání éí Diyin God deidísinii yáʼátʼéehgo óʼooʼníiłii bee béédahoʼdílzin doo.
11 Asdzání jílíinii jidéesxéelgo tʼáá aaníí óhojíłníihgo íhwiizhdoołʼááł.
12 Asdzání éí diné nazhnitin dooleełgi áádóó binazhnitʼáa dooleełgi doo bee hadiʼdeeshʼáał da; tʼóó jidéesxéel doo.
13 Háálá Ádam áłtsé ályaa, áádóó índa Íiv.
14 Áádóó Ádam doo biʼdeesdloʼ da, nidi asdzání éí biʼdeesdloʼgo Diyin God yee hasʼáanii doo yikʼeh hóółʼįįd da.
15 Ákondi asdzání jílíinii, tʼáá áłahjįʼ oodlą́ bee dzizı̨́įgo, áádóó ayóóʼíʼjóʼníigo, índa diyingo jiináago, ádaa áhojilyą́ągo éí niʼjiiłchíihgo yisdájiigháah doo.*
Footnotes
^ Kójítʼı̨́įgo nizhʼníłdįįd bijı̨́įjįʼ biniyé ájítʼíinii bizhʼdoolííł.
