Proverbs 20:1-30
20 Wáin éí ánahałtʼiʼ; tó tsiʼnaʼiiłáii éí tsiʼnaʼiiłá, áko tʼáá háiida díí bee ádinjidloʼgo doo hojíyą́ą da.
2 Aláahgo naatʼáanii bee bikʼeʼíyéeʼii éí náshdóítsoh bitsiijįʼ ditłʼooígíí biyiʼ nahodiʼniʼgo ánínígíí bił ałkʼeh; tʼáá háiida aláahgo naatʼáanii báhojííłchįįdígíí tʼáá hó hweʼiinaʼ atínízhdoodlííł.
3 Diné ahiníʼdiiltłáád yąąh ádítʼíinii éí diné baa haʼniih, nidi diné doo ádahalyáanii éí saad dahółǫ́ǫ doo.
4 Hakʼaz biniinaa bił hóyéeʼii doo nihwiiłdlaad da; éí bąą daʼagizhjįʼ ahalzhishgo azhdókeed łeh, nidi tʼáadoo hailyéhí da.
5 Diné bijéí biyiʼdę́ę́ʼ yáʼátʼéehgo naʼnitinii éí níléí wóyahdę́ę́ʼ tó yáʼátʼéehii hahadleehígíí nahalin, nidi diné bee akʼiʼdiitįįh bee hólóonii éí hayiileeh.
6 Diné kʼasdą́ą́ʼ tʼáá ałtso tʼááłáʼí nítínígo dajoobaʼígíí yaa dahalneʼ, nidi diné baʼahódlíii bídin hóyééʼ.
7 Diné tʼáá ákogi átʼéii doo binaʼadloʼgóó naagháii bikéédę́ę́ʼ háánootʼáanii bikʼidahojidlíi doo.
8 Aláahgo naatʼáanii tʼáá ákogi átʼéii bibikááʼdóó nahatʼáii yikááʼ dah sidáago haʼasídígíí yee doo yáʼádaatʼéehii ałtso nahjįʼ kóyiiłʼįįh.
9 Baaʼihii shijéí biiʼ ádingo áshłaa; ádił niʼiidzííh shąąh ádingo yáʼáníshtʼééh. Háishąʼ ákódidooniiłgo yíneelʼą́?
10 Bóhólníihii éí béésh nídaazbąsii bikʼehgo dah adiyiidleehígíí bindaʼadloʼii índa bee ídaʼneelʼąąhí bee haʼiikaahii binaʼadloʼii éí tʼáá áłah doo yíłdin da.
11 Azhą́ áłchíní nidi, áyoolíłígíí bee bééhózin; binaanish daatsʼí yáʼátʼééh, índa binaanish daatsʼí tʼáá daʼáko.
12 Ajaaʼ adiitsʼaʼii índa anááʼ ooʼíinii éí tʼáá áłah Bóhólníihii ábiilaa.
13 Doo téʼéʼı̨́ nidíʼnóołhéłígíí biniyé bił tʼáadoo nił łikaní, chʼéénídzííd, áko bááh bee hwiih nílı̨́į doo.
14 Naʼiiłniihí ání, Ayóo ílínéii, ayóo ílínéii, áko baa naʼiinihdóó bikʼijįʼ nílááhgóó iigháahgo yee ádaa haʼniih łeh.
15 Óola hólǫ́, áádóó nitłʼiz ałtaasʼéí daʼílíinii tʼóó ahayóí, nidi bił éédahózingo yádaałtiʼii éí naadeełí ílíinii nidahalin.
16 Ayóní bá sézı̨́į dooleeł níigo naaltsoos bikááʼ bízhiʼ áyiilaii ííshją́ą́ biʼéétsoh nídidííłtsos, áádóó ałjiłnii bá ákódziidzaago bee nihozhníʼánígíí binahjįʼ hwíínítąʼ doo.
17 Naʼadloʼ bee bááh shóotʼeehii diné bił łikan, nidi áádóó bikʼijįʼ bizééʼ góneʼ tsézéí hadeezbin nahalin łeh.
18 Nahatʼá baa hwiinítʼı̨́įgo hazhóʼó hashtʼedaalneʼ, áádóó kótʼéego nidiʼníigo anaaʼ áníłʼı̨́.
19 Diné łaʼ aseezı̨́ nidzinii nidanilʼinii nidi yaa halneʼ łeh; éí bąą ákótʼéego binaʼadloʼgo yáłtiʼii tʼáadoo béédiilwoʼí.
20 Tʼáá háiida bizhéʼé, doodaiiʼ bimá yiyíídzíiʼgo éí bee hoolʼiní nitsisgo chahałhiłígíí nahalingo hweʼiinaʼ nidooltʼih.
21 Chʼóóshdą́ądi naalyeʼé ííʼ dooleełii tsxı̨́įłgo shóotʼeeh, nidi nihoolzhíishdi doo bee akʼihwiizhdoodliił da.
22 Shichʼįʼ doo ákǫ́ǫ́ ájíítʼįįdii kʼééhodideeshdlííł, tʼáadoo diníní, nidi Bóhólníihii bibaʼ ánítʼé, háálá tʼáá bí yisdándoołtééł.
23 Bóhólníihii éí béésh nídaazbąsii bikʼehgo dah adiyiidleehígíí bindaʼadloʼii doo yíłdin da, índa dah naʼaloʼí biyoochʼíidii doo yáʼátʼéeh da.
24 Diné joogáłígíí éí Bóhólníihii bee bóhólnííh. Ákoshąʼ haʼátʼéego diné tʼáá hó bikʼehgo joogáłígíí bikʼizhdiʼdootı̨́ı̨́ł?
25 Díí dólzinii átʼé, jiníigo tʼáadoo tsíhodeeskézí ádee hadzoodzíiʼgo áádóó bikéédę́ę́ʼ tʼáá hó nináʼízhdílkid, Tʼáá daatsʼí ákǫ́ǫ́ ásdzaa, jinínígíí bee tsistłʼajiyá.
26 Aláahgo naatʼáanii hóyáanii éí doo yáʼádaashóonii ąąh yoołchʼííh, áádóó tsinaabąąs bijáád bee haʼéʼélʼéés nahalingo hayéʼéłʼéés.
27 Diné níłchʼi biiʼ sizíinii éí Bóhólníihii bibee hoolʼiní átʼéego diné biiʼ nahaztʼiʼgi tʼáá ałtso haisííd.
28 Aa aʼááh hasin índa tʼáá aaníinii bee aláahgo naatʼáanii nehedzííh, áádóó bee bóhólníihii aa aʼááh hwiindzin yee bidziil.
29 Dinééh danilíinii yee dabidziilii yee ayóó ádaatʼé, áádóó hastóí bitsiiʼ deibaʼígíí bee baa dadzólní.
30 Náhodiʼniltsxisgo hakʼi nidziskʼą́ągo éʼéłʼínígíí áádóó náhodiʼniltsxisgo ayiʼ góneʼ baa ahiłchʼiihígíí éí doo yáʼáshóonii ałtso nahjįʼ kwííłʼı̨́.
