Proverbs 29:1-27
29 Diné łaʼ tʼáá ahą́ą́h hachʼanáhodishkeehgo áádóó tʼóó tséʼédinda doo adzíistsʼą́ąʼ da dzizlı̨́įʼgo tʼáadoo hooyání atíhodiʼdoolnííł, áko éí tʼáadoo bidééłníní da.
2 Diné tʼáá ákogi ádaatʼéii náás dikahgo diné baa bił nidahoozhǫǫh doo, nidi diné doo yáʼáshóonii bóhólníihgo éí diné yínííł danilı̨́į łeh.
3 Tʼáá háiida hódzą́ ayóóʼájóʼníinii éí hazhéʼé bił hojíshǫ́, nidi diné éí ałjiłnii bił ahéézhdiilwoʼii hanaalyeʼé tʼóó bee nijiné.
4 Aláahgo naatʼáanii tʼáá ákogi ááníłígíí bee diné kéyah yikááʼgóó kééhatʼínígíí hashtʼeʼniijih, nidi naatʼáanii éí bee nahoʼdiiniihii yókeedii éí tʼóó hoł taniʼdoogish.
5 Bił kééhojitʼíinii bichʼįʼ ájíníigo baa hojiniihgo éí łoh ádá ninájítʼááh.
6 Diné doo yáʼáshóonii bee hazʼáanii kʼíinítiʼgo łoh yiih yighááh, nidi diné tʼáá ákogi átʼéii hataałgo bił nihoozhǫǫh łeh.
7 Diné tʼáá ákogi átʼéii éí badahojoobáʼíii bee bá nahazʼáanii yee yaa nitsíkees, nidi diné doo yáʼáshóonii doo tʼáá kʼad bił bééhoozin da.
8 Diné ándahałtʼiʼii éí kin haalʼáagi kéédahatʼíinii yá nídahałchįįhgo áyiiłʼįįh, nidi diné dahóyáanii éí áháchįʼ nahjįʼ kódeileʼ.
9 Diné hóyáanii éí diné doo áhályáanii yił ałghaditʼáahgo doo áhályáanii báháchįʼgo, doodaiiʼ anádlohgoda ałghaditʼáhígíí doo niitʼéeh da.
10 Diné nideiłtseedgo dił atsʼádaazlı̨́įgo ádeileʼii éí diné baʼátʼeʼ ádinii yikʼee dadiniih, nidi diné tʼáá ákogi ádaatʼéii éí diné baʼátʼeʼ ádinii yá atídaatʼı̨́.
11 Diné doo áhályáanii tʼáá bánáháchįįh bikʼeh tʼáá ákǫ́ǫ́ tʼáá ałtso yaa halneʼ, nidi diné hóyáanii éí tʼóó yił déesxéél.
12 Naatʼáanii nilíinii woochʼííd yiyíistsʼą́ąʼgo diné bá nidaalʼaʼígíí tʼáá ałtso doo yáʼádaashǫ́ǫ da daaleeh.
13 Diné bahojoobáʼíii áádóó diné ade áhósinii díí yee ahéédiitʼash: éí tʼáá ájíłah Bóhólníihii hoł chʼíʼdiiłdlaad.
14 Aláahgo naatʼáanii baʼahódlíigo diné badahojoobáʼíii yá nihodiyiiʼaahgo hoolʼáágóó bohoníłdzilgo nantʼáago ádoolnííł.
15 Náhodiʼnilghałgo áádóó nahodiʼditehgo bee hojiyąąh, nidi áłchíní doo baa hwiinítʼı̨́ı̨́góó tʼáá bí nízinígi ááníiłgo bimá baa yánízin łeh.
16 Diné doo yáʼádaashóonii łą́ yileełgo bee hazʼáanii hitíihii ałdóʼ kʼeeʼąą dilzhish, nidi hakʼeh dahodeesdlı̨́įʼgo diné tʼáá ákogi ádaatʼéii dahoníłʼı̨́į doo.
17 Niyeʼ hashtʼeʼnináhídlóós, áko bee háánílyı̨́įh doo, tʼáá aaníí niiʼ sizíinii bił hózhǫ́ǫgo íidoolííł.
18 Bikʼehgo dooleełii ádingo diné tʼáá áhoodzaagóó dildah, nidi Diyin God yee hasʼáanii bikʼeh hojíłʼíinii éí hoł hózhǫ́.
19 Naalʼaʼí éí doo saad tʼéiyá bee hashtʼeʼninádoodlóos da; azhą́ akʼidiʼyiitįįh nidi, doo kótʼé níi da.
20 Diné tʼáadoo nitsíhodeeskézí hahadziihiísh bééhonísin? Jó, diné doo áhályáanii haláahgo bá chohooʼı̨́.
21 Diné há naalʼaʼí tʼáá áłchíní nilı̨́ı̨́dą́ą́ʼ baa jéʼjólnáago neeyą́ągo hayeʼ ídidoolnííł.
22 Diné bánáháchįįhii diné ahinéidiiłjah łeh, áádóó diné hashké nídzinii bee hazʼáanii hitíihii biiʼ hadeezbin.
23 Diné bibee ádaa hodzódliʼ akéédę́ę́ʼ nibidoołtʼeeł, nidi diné aʼohgo ádaa nitsíkeesii diné bił jílı̨́į doo.
24 Tʼáá háiida aniʼįįhii bił ałchʼojíʼníinii éí hwiiʼ sizíinii bikʼeezhdiniih; ádee haʼdidziih yidiitsʼaʼ, nidi tʼáadoo haadzíiʼ da.
25 Diné bił yéeʼii éí yee łoh ádá niiʼááh, nidi diné éí Bóhólníihii yaa dzólíii bá hasih hazʼą́ą doo.
26 Tʼóó ahojíyóí éí naatʼáanii shichʼijí astą́ą doo daznízin, nidi diné tʼáá ałtso doo haada yitʼéégóó bá nihodiitʼaahígíí éí Bóhólníihii bitsʼą́ą́dę́ę́ʼ nihwiileeh.
27 Diné doo ákwii átʼéii éí diné tʼáá ákogi ádaatʼéii doo dabíłdin da, áádóó diné kʼéhézdongo yigáłígíí éí diné doo yáʼádaashóonii doo dabíłdin da.
