Proverbs 5:1-23
5 Shiyeʼ nílíinii, díí bee honisáanii áádóó bikʼiʼdiitáanii bee naninishtinígíí hazhóʼó yísíníłtsʼą́ą́ʼ.
2 Áko yáʼátʼéehii áádóó doo yáʼátʼéehii nił bééhózin doo índa ił ééhózin bee yáníłtiʼ doo.
3 Háálá asdzání ałjiłnii yáłtiʼgo éí tsésʼná bitłʼizh bitsʼaʼ bitsʼą́ą́dóó tsésʼná bitłʼizh nahidilchʼą́łígíí nahalin; akʼah yizhólígíí nahalingo yáłtiʼ łeh.
4 Nidi áhoołʼįįhdi éí tʼáá íiyisí díchʼíiʼgo bééʼjooʼnih; diltłish ałtsʼą́ąjįʼ deenínígi átʼéego deení.
5 Anoonéełjįʼ índa hoolʼáágóó tiʼhooʼníihjįʼ dah bidiikééʼ.
6 Iiná bá atiinii tsʼídá doo yaa nitsíkees da; bá honítʼiʼii doo bił bééhózingóó ałtah ánááʼnííł.
7 Éí bąągo, shiyázhí danohłíinii, kʼad dashíínółtsʼą́ą́ʼ, áádóó saad bee nihichʼįʼ yáshtiʼígíí doo bitsʼádoohkah da.
8 Éí asdzání ákótʼéii nízaadi bitsʼąą nidaahkai, índa bichʼéʼétiin bitʼáahjįʼ dohkááh lágo.
9 Éí doodaléiʼ bee anílínígíí náánáłaʼ yee nááʼídlı̨́į doo áádóó niʼííníłdįįd bijı̨́įjįʼ doo daatsʼíidii bá nanilnish doo,
10 áádóó déʼéyóní nilíinii niyódí ádił haididoolbı̨́ı̨́ł, áádóó bikʼé nishínílnishii déʼéyóní bighan góneʼ yanáaʼáa doo;
11 áadi índa doo yáʼátʼéehii nitsʼíís bidoolnaʼgo nichʼįʼ nahwiiʼnáago bikʼee diníʼníigo
12 ádíníi doo, Dooládóʼ naʼnitin jooshłxáa da nítʼééʼ índa shichʼahoʼdishkéhígíí tʼóó yiishkóóh nítʼééʼ,
13 áádóó nidashinitinígíí doo bikʼeh honishʼı̨́į da nítʼééʼ, índa nidashinitinii doo yínístsʼą́ąʼ da nítʼééʼ!
14 Áłah nídaʼoodleełii binááł doo yáʼádaatʼéehii kʼasdą́ą́ʼ tʼáá ałtso baa niséyá.
15 Tʼáá ni nitóshjeeh bee tó síníłʼánídóó tó nidlą́; tʼáá ni nitoʼ háálı̨́ı̨́dóó tó nidlą́.*
16 Daʼ nitoʼ hadaazlı̨́ı̨́dóósh daʼnítiingóó tó tʼáá bíniʼdii tʼáá ádzaagóó taozlı̨́į dooleeł?*
17 Éí bąą tʼáá ni tʼéí bee nóhólnííh, náánáłaʼ éí doo bił ałtsʼą́ą́ʼ aníłkʼiiz da doo.
18 Hániʼdii nitoʼ háálínígíí bikʼihojidlíi leʼ, áádóó ániid nanináádą́ą́ʼ neʼasdzą́ą́ silı̨́įʼii tʼáá éí baa nił hózhǫ́ǫgo bił hiníná.
19 Hániʼdii bįįhtsaʼii ayóóʼóóʼníinii nahalin doo, áádóó jádí nizhóníii nahalin doo, áádóó hániʼdii bibeʼ tʼáá áłahjįʼ bee hwiih nílı̨́į leʼ, ayóóʼánóʼnínígíí tʼáá áłahíjįʼ bee náʼíldįįh.
20 Áko shiyeʼ, haʼátʼíísh biniyé asdzání ałjiłnii bee náʼáshdįįh doo nínízin, áádóó ayóní binísíníniiʼ?
21 Háálá diné ájítʼéegi tʼáá áłahíjįʼ Bóhólníihii biníłʼı̨́, áádóó tázhdíghááhgóó tʼáá ałtsogóó hakʼítsééłkos.
22 Diné doo yáʼáshóonii doo ákwii átʼíinii tʼáá bí atínábidoodlííł, índa tłʼóół bee dah hoʼdiistłʼǫ́ nahalingo ádił niʼiilzíihii dah nábidiyootłʼóół.
23 Tʼáadoo nahodiʼneestą́ʼí dazdootsaał, áádóó ayóó átʼéego yíní ádin baa nijigháhígíí yóóʼazhdoogááł.
Footnotes
^ Neʼasdzą́ą́ tʼáadoo binaʼíloʼígo bił hiníná, níigo ání.
^ Daʼ łaʼałyóí asdzání ná nidaʼiiłchíihgoósh naʼáłchíní tʼáá ádzaagóó nidaakai doo? níigo ání.
