Proverbs 9:1-18
9 Hódzą́ kin niiníʼą́; tsostsʼidgo bíyah daʼniiʼáago áyiilaa;
2 binaaldlooshii dabidookįįł biniyé neistsxeed; biwáin hashtʼeyiilaa; bibikááʼ adání bikááʼ niʼiizką́ągo
3 chʼikéí bá nidaalʼaʼí éí daʼdooyı̨́įłii yíká ayiisʼaʼ; kintah aghádahazʼáádóó dilwosh.
4 Hódzą́ ání, Doo dahonohsáanii wóshdę́ęʼgo ahohkááh. Bee akʼiʼdiitįįh bee ádinii kwííłní,
5 Hágo shibááh daahsą́, áádóó shiwáin hashtʼeishłaaígíí daahdlą́.
6 Doo ádahalyáanii tʼáadoo baa nídaohtʼíní, áádóó hazhóʼó dahinohná áádóó bee akʼidiʼyiitįįh bikʼehgo deínóhkááh.
7 Diné ánahałtʼiʼii bichʼahojishkéii tʼóó haa yáhodoosįįł; diné doo yáʼáshóonii jideeztehii tʼóó hwíidoodzih.
8 Diné ánahałtʼiʼii doo shikʼee diniih da dooleeł nínízingo tʼáadoo bichʼahoshíníkéhí; diné hóyáanii dínítehgo ayóóʼánóʼníi doo.
9 Diné hóyáanii nidíníítįįł, áko tʼah yówehgo hóyą́ą doo; diné tʼáá ákogi ááníiłii nidíníítįįł, áko tʼah biláhígo íhwiidoołʼááł.
10 Bóhólníihii jidósin jileehdóó ahozhʼniiyąąh áádóó Diyin nilíinii bééhodzoosįįhgo akʼizhʼdiitı̨́ı̨́h.
11 Jó, shí shinahjįʼ níyoołkáłígíí ná bíidooʼnił, áádóó nináháhígíí ná bíidooʼnił.
12 Honíyą́ągo tʼáá ádá honíyą́ą doo; ánáhółtʼiʼgo tʼáá ni bá nantłizh doo.
13 Asdzání doo áhályáanii éí tʼáadoo yaa yánízinígóó ayóo yádíłtih łeh; doo hóyą́ą́góó tʼáadoo bił bééhóziní da łeh.
14 Áko bighangi chʼéʼétiindóó sidáa łeh; kin haalʼáagi wódahgo nahazʼą́ągi dah sidáa łeh.
15 Tʼóó bíighah dahidikáhígíí, éí tʼáá ákóneʼ deíkáahii yichʼįʼ áníi łeh,
16 Doo honíyáanii wóshdę́ęʼgo dah diinááh. Bee akʼiʼdiitįįh bee ádinii kwííłní,
17 Tó neestʼı̨́įʼii łikan łeh, áádóó tʼáá nahontʼinee bááh nídiitʼáanii łikan łeh.
18 Nidi ákwii daneeznáanii hólǫ́ǫgo áádóó asdzání yaa nídaakah nítʼéeʼii hoolʼáágóó tiʼhooʼníihdi naaldeehgo doo hoł bééhózin da.
