TSʼÍDÁ akéeʼdi Diyin Bizaad naaltsoos siʼánígíí éí Revelation. Éí bílaʼashdlaʼii náásgóó bił chodahooʼı̨́į doogo bá ályaa. Éí Jiihóvah yihodeezʼánę́ę bihodoolníiłjįʼ bílátah dahashzhiizhgo yaa halneʼ. Jiihóvah éí yilʼaadii John yichʼįʼ yitʼíní ííłʼı̨́įgo binahjįʼ akʼeʼashchı̨́.

Áłtsé éí Jesus áłah nídaadleehii yaa haznih, dóó hashké nídzingo yichʼįʼ haadzííʼ. Náá ákóneʼ éí God yáʼąąshdi bibikááʼdóó nahatʼáii bidáahgi níłchʼi nidaalʼaʼii baa dahaniih.

Dibé Yázhí bidiʼníinii Jesus Christ, naaltsoos 7go bidádaʼdeeshjééʼ léiʼ bee yíltsooz. Áłtsé dı̨́įʼgo ąą ádaalyaa, éí łı̨́ı̨́ʼ bikʼi dah naʼasdáago chʼíníjééʼ. Áłtséhígíí éí łı̨́ı̨́łgaii chʼélwod, éí Jesus yikááʼ dah sidáago naatʼá chʼah bąąh siʼą́. Náá ákónéʼ łı̨́ı̨́ʼ ałʼąą ádaatʼéego, éí anaaʼ, hodichin, dóó naałniih yił chʼíníjééʼ. Éí díí kʼad kótʼéego nihił hazʼą́. Tsostsʼid góneʼ ąą ályaaígíí, éí tsostsʼidi dilní bee ádahodidooʼniił. Éí God yee nihwiidiyooʼáałii bee ííshjání ádadoolnííł. Díí tsostsʼidgo bee atíʼdoolníiłii éí God bá hodoochįįłgo áhyiłní.

God biNahatʼaʼ éí yáʼąąshdi niitʼą́, éí índa ashkii yizhchínígíí nahalin. Yáʼąąshdi anaaʼ hazlı̨́ı̨́ʼ, áádóó Séítan dóó bá ndaalʼaʼí nahasdzáán bikáaʼjįʼ adah dabiʼdiistłʼííd. Ayóó íistsʼą́ąʼgo łaʼ ájíní, “Nahasdzáán . . . doo hojoobaʼ ájíníi da!”, doodaiiʼ doo tsʼíí áhodoonííł. Séítan éí ayóó átʼéego báháchįʼ, háálá tʼóó kónígháníjįʼ nááhojídlǫ́ǫ doogo bił bééhózin.​—Revelation 12:12.

John éí yáʼąąshdi Jesus 144,000go bílaʼashdlaʼii bitahdę́ę́ʼ nídabiʼdiisdláʼígíí yił naazı̨́įgo yiyiiłtsą́. Éí Jesus “yił bídahólníih doo.” Revelation biiʼ 144,000go díí nídabiʼdiisdlááʼ nínę́ę éí Genesis 3:15gi asdzání baʼáłchíní baa chʼíhootʼánę́ę, bí ádaatʼı̨́.​—Revelation 14:1; 20:6.

Nahasdzáán bikááʼ naatʼáanii dahwéeʼaahii, éí “God Aláahgo Ayóóʼábóodziilii” biʼanaaʼ, éí Armagédan wolyéii bee ałhąʼ ábidiʼdoolnííł. Díí naatʼáanii dahwéeʼaahii, éí łı̨́ı̨́łgaii yikááʼ dah sidáhígíí Jesus, dóó níłchʼigo ndaalʼaʼí yooʼishígíí yikʼiidoojah. Ákondi ałtso áhodiʼdooldįįł. Séítan éí beʼdootłʼóół. Nahasdzáán bikáaʼgi, 144,000ígíí éí “tʼááłáhídi mííl nááhaijįʼ Christ yił” bídahólníih doo. Áádóó tʼááłáhídi mííl nááhaigo áadi Séítan bidiʼyoolyééł.​—Revelation 16:14; 20:4.

Áko díí tʼááłáhídi mííl nááhai dahojéeʼaahgo, akʼeh dahółʼíinii haʼátʼíí bá łaʼ dazhdoolííł? John ání, Jiihóvah éí “dabinákʼeeshtoʼ tʼáá ałtso yá yidootʼoł, aniné ádin doo, áádóó atínáhodinidleeh ádin doo, áádóó cha ádin doo índa adiniih ádin doo, háálá áłtséédą́ą́ʼ dahólóonii bił yóóʼahóóyá.” (Revelation 21:4) Nahasdzáán bikááʼ ayóó áhonóolin náhásdlı̨́įʼ doo!

Diyin Bizaad biiʼ baa haneʼígíí éí Revelation ałtso yaa nihonílneʼ. Mesáíyah biNahatʼaʼ bee hoolʼáágóó Jiihóvah bízhiʼ dílzin, dóó bí bóhólníihgi ííshjání ályaa doo!

​—Naaltsoos Revelation biiʼ baa haneʼ.