CHRIST joosdląąd dóó bikʼijįʼ, Paul éí God biNahatʼaʼ yaa nahasneʼ. Áłtsé éí Christ bikʼijįʼ jílı̨́ı̨́ ńtʼééʼ, kʼad éí átíhoʼdilʼı̨́įgo hoolzhish. Díí yilʼaadii éí danízaadgóó God biNahatʼaʼ baa nahojilneʼgo tázhdííyá. Jó éí God átséedi bílaʼashdlaʼii yá yihodeezʼánę́ę bee łaʼ yilyaa doo.

Áłtsé éí Lístradi nahojilneʼgo ákwii hastiin léiʼ naaljı̨́ı̨́d jílı̨́įgo hoʼdizhchı̨́, éí Paul nijigháago áhoolaa. Áko ńtʼééʼ Paul dóó Bárnabas, diné ákweʼé áłah nilínígíí chʼééh dooda bijiníigo, diyin nohłı̨́ dahałníigo dadilwosh. Paul biʼanaʼí éí diné áłah nilínę́ę yíniʼ yá ádayiilaa. Paul éí yił nidadzisneʼgo dajiztsą́ą́ lá daniizı̨́įʼgo tʼáá ákǫ́ǫ́ adahwiisghan. Ákondi Paul éí tʼáadoo daaztsą́ą da. Áádóó ákwii nínáádzídzáago ídahoołʼaahii saad bee chánah danilı̨́įgo ánááyiidlaa.

Jew dineʼé łaʼ oodlání danilínígíí saad dahasłı̨́ı̨́ʼ. Éí doo oodlání danilínígíí, bee hazʼáanii Mózes baa deetʼánę́ę łahdóó bikʼeh dahojíłʼı̨́į doo dahałní. Paul éí Jerúsalemdi daalʼaadii, dóó hastóí ánaazíinii díí baa saad hólónígíí bichʼįʼ jiníʼą́. Éí Diyin Bizaad, dóó God biníłchʼi diyinii bikʼehgo hazhóʼó baa nídajistʼįįd. Éí edaʼalyaii, dił, dóó atsįʼ bidił doo hazhóʼó nahjįʼ kólyaaígíí éí tʼáadoo daohsání, índa naʼageh bee tsiʼnaʼadá bitsʼąą ádanohtʼé. Hastóí ánaazíinii kódaaníigo áłah nídaʼadleehgóó bichʼįʼ ádaʼjiilaa. Háála díí bee nihodeetʼáanii éí “tʼáá ákónéehee ádaatʼéii átʼé.” Ndi bee hazʼáanii Mózes baa deetʼánę́ę bikʼeh ádanohtʼé, doo danihidiʼníi da.​—Acts 15:28, 29.

Paul éí naaki góneʼ nahojilneʼgo tázhdííyáhígíí Beríyadi jiníyá, éí ákweʼé kʼad Gríis hoolyé. Jew dineʼé ákweʼé kéédahatʼínígíí yídaneedlı̨́įgo saad nídeediilá. Éí Paul yee naʼnitinígíí, tʼáá ákwíí jı̨́ Diyin Bizaad biiʼdóó dayółtaʼgo nideiłkaah. Ńtʼééʼ Paul bikʼijįʼ ídlı̨́įgo baa nínááʼdiildeeʼ, éí biniinaa Áthenzgóó dah náázhdiidzá. Ákweʼé Paul, Áthenz dineʼé áyóó átʼéego daʼííłtaʼii saad baa jistiʼgo, ndi bidziilgo bichʼįʼ hajoodzííʼ.

Paul éí tááʼ góneʼ nahojilneʼgo tázhdííyáhígíí bikéédóó Jerúsalemdi jiníyá. Áadi jiníyáago, łaʼ Jew dineʼé dahodiyiilyééł daniizı̨́įʼgo hahodííłdláád. Rome bisiláo hachʼą́ą́h niníjééʼ, áádóó tʼáá naʼníleʼdii nidahódééłkid. Romedóó dineʼé jílı̨́įgo biniinaa tʼahádóó Rome binanitʼaʼí Fííliks bidááhdóó áchʼą́ą́h hajoodzííʼ. Éí Jew dineʼé Paul yee ndaʼastsooz ndi, bee ííshjání ádazhdoolíłígíí hwee ádaadin. Paul éí náánáłaʼ Romedóó binanitʼaʼí Féstas, éí Jew dineʼé doo bichʼįʼ kónááshizhdoodlíił da jinízingo ábijiní: “Síízar éí shaa nídóotʼįįłgo baa náʼooshkąąh!” Áádóó Féstas áhałní: “Síízar bichʼįʼ díínááł.”​—Acts 25:11, 12.

Áádóó Paul éí haa hwiidínóotʼįįł biniyé tsinaaʼeeł bee Ítaligóó bił íldeeʼ. Yę́ęniʼ ákǫ́ǫ́ hoł daʼéʼeełgo tsinaaʼeeł hoł neheestǫʼ. Éí bąąh Máltagi táłkááʼ kéyah dah siʼą́ léiʼgi hwéé hai. Romedi jiníyáago, hooghan léiʼgi bikʼé ajisłáago naaki honááhai. Siláo hakʼi déezʼı̨́ı̨́ʼ ndi, diné haa dahakáhígíí God biNahatʼaʼ bee bił dahojilneʼgo hoolzhiizh.

​—Naaltsoos Acts wóltaʼii 11:22dóó wóltaʼii 28:31jįʼ biiʼ baa haneʼ.