Diyin God Bizaad éí kóhodoonííł ní, Christ daaztsą́ dóó bikʼijįʼ, íídą́ą́ʼ Oodlání danilínę́ę bitahdóó łaʼ Diyin God Bizaad tʼááʼaaníinii binaʼnitin yę́ę yoochʼííd yee deidoołchxǫǫł. (Acts 20:29, 30) Díí éí tʼááʼaanii ákóhóótʼįįd. Yoochʼíidgo naʼnitin dóó Jesus binaʼnitin yił ałtaa nídeisnil áádóó Oodlání dabiyoochʼíídígíí hazlı̨́ı̨́ʼ. (2 Timothy 4:3, 4) Áko dííshjı̨́įdi haash yitʼéego Diyin God Bizaad tʼááʼaaníinii yee naʼnitinígíí hazhóʼó bikʼidaʼdidiitı̨́ı̨́ł?

Jiihóvah tʼááʼaaníinii ííshjání íidoolíiłgo baa hoolzhiizh. Jiihóvah éí díí átséedi yaa hoolneʼ, nihoogháahjįʼ yoołkáałgo tʼááʼaaníinii bibee naʼnitinígíí “dahóyáanii éí ááhyiłníinii yikʼidadiʼdootı̨́ı̨́ł.” (Daniel 12:9, 10) 1870 yę́ędą́ą́ʼ tʼáá díkwíjíltéhígo Diyin God Bizaad biiʼdę́ę́ʼ tʼááʼaaníiniiígíí bíká dazhdínéeztą́ą́ʼ. Ńtʼééʼ łaʼ oodlání yah inídaajahgóó Diyin God Bizaad biiʼdę́ę́ʼ doo yee ndaʼnitin da lágo yaa ádahoniizı̨́ı̨́ʼ. Áko tʼáá níléédę́ę́ʼ Diyin God Bizaad bee naʼnitinę́ę bikʼiʼdidootı̨́ı̨́ł biniyé bíká dazhdínéeztą́ą́ʼ. Áádóó Jiihóvah bíká elwodgo Diyin God Bizaad bikʼidazhdiitą́.

Diyin God Bizaad bił danilínígíí hazhóʼó nideiskááʼ. Jiihóvah Yá Dahalneʼé áłtsé Diyin God Bizaad Yaa Daʼółtaʼii dabidiʼníigo bee béédahoʼdílzin ńtʼééʼ. Diyin God Bizaad Yaa Daʼółtaʼii áádę́ę́ʼ íhooʼaahígíí nihá nideizʼánę́ę dííshjı̨́įdi tʼahdii tʼáá ákótʼéego chodeiniilʼı̨́. Diyin God Bizaad biiʼdę́ę́ʼ bídahooʼaahígíí ałkééʼ danínilgo hazhóʼó yaa nínáá daatʼįįh ńtʼééʼ. Diyin God Bizaad łahgóó doo yikʼidaʼdiitįįhgo, náánáłahjįʼ saad dah naazhjaaʼígíí nídeinílʼįįhgo hazhóʼó bił ííshjání ádeileʼ. Áko Diyin God Bizaad biiʼdę́ę́ʼ tʼáá átʼé bee hazhóʼó bił ííshjání ádaalyaaígíí naaltsoos bikááʼ yikʼinídayíizoh. Díí éí binahjįʼ God bízhiʼ dóó biNahatʼaʼ, dóó haʼátʼíí biniyé bílaʼashdlaʼii dóó nahasdzáán ályaaígíí tʼááʼaaníigo baa haneʼígíí yénínáádaʼdeeztą́. Áádóó daneeznánígíí ádaatʼéiigi dóó náádídoojahgo bá chodahooʼínígíí ałdóʼ tʼááʼaaníigo baa haneʼígíí yénínáádaʼdeeztą́. Áko nidaazhnitáago ląʼígóó yoochʼíidgo oodląʼ dóó ádaʼoolʼįįłígíí biiʼdę́ę́ʼ hwéédahoʼdeezhchid.​—John 8:31, 32.

1879 ííhaiijįʼ Diyin God Bizaad Yaa Daʼółtaʼii tʼáá náhwiistʼą́ą́ ńtʼééʼ tʼááʼaaníinii baa hodoonihgo baa hoolzhiizh lágo yaa ádahoniizı̨́ı̨́ʼ. Tʼáá ákweʼé yihahgo díí Bee Haʼídéesʼı̨́įʼii Jiihóvah biNahatʼaʼ Yaa Halné hahinidéehgo hahoolzhiizh. Dííshjı̨́įdi tʼahdii hahinidééh. Kʼad Diyin God Bizaad tʼááʼaaníigo baa haneʼígíí 240 kéyah dah naaznilgóó dóó 750 dóó baʼaan saad ałʼąą ádaatʼéego diné bił nidahwiilneʼ. Tʼááʼaaníigo íhooʼą́ą́ʼígíí tsʼídá doo díí átʼéego kʼeeʼąą yileeh da ńtʼééʼ!

• Tʼááʼaaníinii Diyin God Bizaad biiʼdóó baa haneʼígíí, Christ daaztsą́ą́dóó bikʼijįʼ haash yilyaa?

• Tʼááʼaaníinii God Bizaad baa haneʼígíí haalá yitʼéego yénínáádaʼdeeztą́?