NIHINAAGÓÓ ádahooníłígíí éí bikʼeh nihił dahóóyééʼ łeh. 2014 yihah yę́ędą́ą́ʼ, Barack Obama éí diné haneʼ baaʼihii yaa yáłtiʼ. Éí áníigo, “Ląʼí diné ádahooníłígíí éí doo bee ádídahóniilníih da yaa nitsídaakees.”

Ákondi, baaʼihgo anídahaztʼiʼígíí haitʼéego hashtʼeidoolíiłgo bił bééhózin. Áádóó ánáádíʼní, “Wááshindoon ádeiłʼínígíí éí haneʼ yáʼátʼéehii átʼé.” Obama bił chohooʼı̨́įgo ání, “Diné náásgóó yáʼátʼéehgo bił hazʼą́ą doo. Bílaʼashdlaʼii éí nihodoogááł yitsʼą́ą́dę́ę́ʼ hasdádookah.”

Obama ánínígíí diné tʼóó ahayóigo bił yáʼádaatʼééh. Łaʼ diné éí science hasdanihidoonił dayoodlą́. Bílaʼashdlaʼii ádayiilaaígíí éí nihichʼįʼ anídahaztʼiʼígíí nahjįʼ kwíidoolííł danízin. Łaʼ computer yééhósinii ání: “2030go computer tʼááłaʼí damííl yázhí ánéelą́ąʼ bidziil doo, índa 2045go tʼááłaʼí damííl tsoh bidziil ánáánéelą́ąʼdi doo. Yáʼátʼéehgo ádeilnééh. Nihichʼįʼ anídahaztʼiʼígíí tʼóó tséʼádin ndi, bee hashtʼedahodooníłígíí nihee dahólǫ́.”

Tʼáásh íiyisí ákóhoonííł? Nihodoogááłígíí tʼáásh aaníí kodę́ę́ʼ nihichʼįʼ hoolzhish? Łaʼ ndaʼałkaahii dóó naatʼáanii danilíinii éí bílaʼashdlaʼii nahasdzáán hashtʼéédeidoodlííł daaníigo yaa dahalneʼ. Ákondi, tʼóó ahayóí diné doo dayoodlą́ą da. Haʼátʼíí biniinaa?

Naatʼáanii danilíinii dóó ndaʼałkaahii éí nihichʼįʼ anídahaztʼiʼígíí yaa yádaałtiʼ. Tʼóó baaʼih ákódahooníłígíí baa ákodaniidzin.

AYÓÓ ÁTʼÉE BEE NAʼATSEEDII. United Nations dóó ałʼąągóó bił nidahazʼánígíí díí ayóó átʼée bee naʼatseedii nahjįʼ kódoolnííł chʼééh ádeiłʼı̨́. Naatʼáanii díí bee naʼatseedii doo bee hazʼą́ą da dooígíí, doo shikʼehdii da danízin. Ayóó átʼée bee naʼatseedii łaʼ ánáádadoolnííł daaníigo yindaalnish. Díí bee naʼatseedii ániid ánáádaalyaaígíí tsʼídá aláahdi átʼéego niʼdoołtsił. Ayóó átʼée bee naʼatseedii doo bee dahólónę́ę, kʼad bee dahólǫ́, dóó tsʼídá tʼááłáhíjįʼ yee nidaʼdoołtsił.

Bulletin of the Atomic Scientists ádaaní, azhą́ shı̨́ı̨́ “hodéezyéel” dazhnízin ndi tʼóó náhádzidgo kéédahwiitʼı̨́. Ayóó átʼée bee naʼatseedii kʼad tsʼídá tʼóó ahayóí. “Bee naʼatseedii doo bikʼidéestʼı̨́ı̨́ʼgóó tʼáá íiyisíí tʼóó báhádzid.”

 AYÓÓ ÁTʼÉEGO ĄĄ DAHAZʼĄ́. Azeeʼ yee ndaʼałkaahii éí ąą dahazʼą́ tsʼídá doo nahjįʼ kódeidoolíił da. Dił dego naʼałkidígíí, adeʼ adą́ bił nidaaztʼiʼii, níłchʼi tʼóó baaʼih, dóó azeeʼ bee tsiʼnaʼadá hólónígíí náás áánííł. Áko díí diné bitah honiiłgaah. Azhą́ shı̨́ı̨́ doo náánáłahdę́ę́ʼ nihidiłnéeh da ndi, bitsʼą́ą́dóó anoonééł. Łóód doo nádziihii, ajéí bąą dahazʼą́, dóó áshįįh łikan bee achʼįʼ anáhóótʼiʼ, éí bitsʼą́ą́dóó tʼóó ahayóigo naʼałtseed. Kʼad éí ániʼ nitsáhákees ąą dahazʼą́ tʼóó ahayóí bee bichʼįʼ nidahwiiʼná. Kʼad éí Ebola dóó Zika tʼóó ahayóí nidabistseed. Díísh haʼátʼíí áhyiłní? Ąą dahazʼą́ doo sohodeebeezh da. Bílaʼashdlaʼii nahjįʼ kwíidoolíłígíí doo yíneelʼą́ą da. Tʼáá íiyisíí doo bóhoneeʼą́ą da silı̨́ı̨́ʼ!

BÍLAʼASHDLAʼII NAHASDZÁÁN NIYIIŁCHXǪǪH: Diné éí nahasdzáán tʼáá siʼą́ą́ ńtʼééʼ tʼóó baaʼihgo ádayoolííł. Níłchʼi tʼóó baaʼihígíí tʼóó ahayóí diné yitsʼą́ą́dóó noonééł.

Diné dóó nahatʼá bił nidahazʼą́ą́góó, tsʼiilzéí tʼáá ałʼąą ádaatʼéego tónteel yiih dayiiyeeh. Encyclopedia of Marine Science ání: “Tónteel yíchxǫʼígíí biniinaa tó naaldeehii nidabiłtseed. Díí diné dabichʼiyąʼ yę́ę, tʼóó bitsʼą́ą́dóó bąą nidahwiiłʼaah.”

Tó niłtólí doodlı̨́ı̨́ł yę́ę áádįįł. Robin McKie naʼałkaahii Britaindę́ę́ʼ ájíní: “Tó niłtólí choidooʼįįłígíí nanitłʼah dóó tʼáá íiyisíí bitsʼą́ą́dóó tídahodiiʼní.” Nidahaʼáhígíí ádajiníigo éí bílaʼashdlaʼii ádajítʼı̨́. Díí tʼóó báhádzid bił béédahozin.

BÁHÁDZIDGO NÍŁCHʼI AŁʼĄĄ ÁNÁÁʼNÍŁÍGÍÍ ÉÍ BÍLAʼASHDLAʼII TÍʼÍYOOLIIŁ: Tó yinahgo tʼóó báhádzid. Díí níyoltsoh dóó niʼhodeezdeel bitsʼą́ą́dę́ę́ʼ nihiileʼ. Háálá hooghan niyiiłchxǫǫh dóó diné neiłtseed. Díí níłchʼi ałʼąą ánááʼníłígíí kʼad tʼóó ahayóí diné bichʼįʼ nidahwiiłná dóó neiłtseed. U.S. National Aeronautics and Space Administration ádajiní: “Tʼóó níwohda níyol dabidziil doo, yéigo dahoneezgai doo, doo ayóó nidahałtin da doo, áádóó tó nidaaląąh doo.” Daʼ níłchʼi ałʼąą ánááʼníłígíí nanihidoołtsił?

Łaʼ éí díí ndaʼałkaahii dóó naatʼáanii danilíinii dayíistsʼą́ąʼgo, tsʼídá doo nihíká adoojahgóó yaa nitsídaakees. Náásgóó iiná dóó nahasdzáán bá yáʼáhootʼéeh doogo, diné tʼóó ahayóí dayoodlą́. Haʼátʼíí lá biniyé dayoodlą́ą doo?