Godísh Bízhiʼ Hólǫ́? God tʼáá bí ání, “Shí Bóhólníihii [Jiihóvah] nishłı̨́; tʼáá éí shízhiʼ.” (Isaiah 42:8) Tʼáá ałkʼidą́ą́ʼ Hííbrewjí Diyin Bizaad ályaa yę́ę éí kʼasdą́ą́ʼ 7,000 ánéelą́ąʼdi God bízhiʼ biiʼ daasdzoh. Ląʼí Diyin Bizaad ataʼ dahalneʼii God bízhiʼ nahjįʼ kódayiilaa. Łahgóó éí “Bóhólníihii” bidiʼníigo ákóneʼ adayiiznil. God éí shikʼis díílééł nóʼní, áko ‘shízhiʼ bee dashíínóhʼshí shichʼįʼ sodadołzin,’ ní.—Psalm 105:1.

Jiihóvah Bee Bééhoʼdílzin. Diyin Bizaad biyiʼdóó Jiihóvah éí “God,” “Aláahgo Ayóóʼábóodziilii,” “Áyiilaii,” “aTaaʼ,” dóó “Bóhólníihii” bee bééhoʼdílzin. Diyin Bizaad biiʼ góneʼé, ląʼí sodizin éí ílı̨́įgo bee bééhoʼdílzinígíí dóó bízhiʼ Jiihóvah choyoołʼı̨́.—Daniel 9:4.

 God Yee Átʼéhígíí. God éí doo yitʼı̨́į da, níłchʼi diyinii nilı̨́. (John 4: 24) Diyin Bizaad ání, “Diné łaʼda hádą́ąʼda doo Diyin God yiyiiłtsą́ą da.” (John 1:18) Diyin Bizaad éí God bintsékeesígíí yaa halneʼ. Bílaʼashdlaʼii éí God łaʼda yínííł ádayiiłʼįįh, doodaiiʼ łaʼda ‘bił dahózhǫ́ǫgo’ ádayiiłʼįįh.—Proverbs 11:20; Psalm 78:​40, 41.

God éí Yáʼátʼéehgo Yee Hadítʼéhígíí. God éí tʼáá átʼé bílaʼashdlaʼii bił nilı̨́, doo łaʼ aʼohgo yaa nitsíkees da. (Acts 10:​34, 35) Tʼáá ałtso bił “aa aʼááh nízinii áádóó joobaʼii áádóó nízaadgóó haʼólníinii áádóó tsʼídá łą́ągo bibee ajoobaʼ índa bitʼáá aaníinii hólóonii.” (Exodus 34:​6, 7) Díí dı̨́įʼgo yee hadítʼéhígíí ayóó ílı̨́įgo baa nitsáhákees.

Adziil. God éí “Aláahgo Ayóóʼábóodziilii” nilı̨́. Tʼáá yee haadzíʼígíí łaʼ íidoolíiłgo átʼé.—Genesis 17:1.

Hódzą́. God éí tsʼídá aláahdi bee hódzą́ hólǫ́. Éí binahjįʼ Diyin Bizaad ání ‘tʼáá hó tʼéiyá aláahdi hojíyą́.’—Romans 16:27.

Tʼáá ákogi éʼétʼé. God éí “tsʼídá yáʼátʼéehgo áánííł,” índa “doo ákwii éʼétʼéii bąąh ádin.”—Deuteronomy 32:4.

Ayóóʼóʼóʼní. God éí doo ayóóʼóʼóʼní tʼéiyá ííshjání ííłʼı̨́į da. Diyin Bizaad ání, “God éí ayóóʼóʼóʼníinii nilı̨́.” (1 John 4:8) Beʼayóóʼóʼóʼniʼ nabiiłnáago yee tʼáá ałtsojįʼ áánííł, áádóó ląʼígo yee nihíká adoolwoł.

God éí Bílaʼashdlaʼii Yił Kʼé Ahidiʼní. God éí Nihizhéʼé yáʼąąshdi honílóonii nilı̨́, ayóóʼánihóʼní. (Matthew 6:9) Yiniidlą́ągo éí áhą́dígo nihikʼis ádiilnííł. (Psalm 25:14) God bichʼįʼ sodiilzingo bee áhánígo ííníilzin, dóó “nihidaʼdiiłʼáhígíí tʼáá ałtso baa dahidohʼaah, háálá nihíneedlı̨́įgo nihaa áhályą́.”—1 Peter 5:7; James 4:8.

Jesus éí Doo God Nilı̨́į Da. Jesus éí tʼáá sahdii ájítʼé—tʼáá bí tʼéiyá God áhoolaa. Jiihóvah áłtsé bá yizhchínígíí éí Jesus, díí biniinaa Diyin Bizaad ání Diyin God biYeʼ jílı̨́. (John 1: 14) “Naanish yiyiichįįhii” jílı̨́įgo, bílaʼashdlaʼii dóó tʼáá ałtsoní hazhéʼé bił ájiilaa.—Proverbs 8:​30, 31; Colossians 1:​15, 16.

 Jesus Christ éí God nishłı̨́, tʼáadoo dííniid da. Ákondi ájíní, God “hatsʼą́ą́dę́ę́ʼ naashá, áko éí shizhníłʼaʼ.” (John 7:29) Bídahoołʼaahii yichʼįʼ haadzííʼ, Jesus ání, Jiihóvah éí “ShiTaaʼ, tʼáá éí nihí ałdóʼ nihiTaaʼ” dóó “shiDiyin, tʼáá éí nihí ałdóʼ nihiDiyin.” (John 20:17) Jesus ájídin bikéédóó, Jiihóvah nááhodiisá, yáʼąąshdi ayóó átʼéii Naatʼáanii jílı̨́įgo Bizhéʼé binishʼnáájígo dah jineezdá.—Matthew 28:18; Acts 2:​32, 33.

Jesus Christ Binahjįʼ God Áhą́dígo Ííníilzingo Yee Níká Adoolwoł

Jesus éí Bizhéʼé yaa naʼnitin doo biniyé nihookáaʼgi jiníyá. Jiihóvah tʼáá bí, Jesus áháłní, “Díí shiYeʼ ayóóʼóóshʼníinii jílı̨́, dahwíísółtsʼą́ą́ʼ.” (Mark 9:7) Jesus éí tsʼídá aláahdi Diyin God yééhósin. Jesus ání: “Tʼáadoo łaʼ aYeʼ nilíinii yééhósiní da, tʼáá hazhóʼó aTaaʼ tʼéiyá, índa tʼáadoo łaʼ aTaaʼ yééhósiní da, tʼáá hazhóʼó aYeʼ tʼéiyá áádóó aYeʼ éí tʼáá háiida aTaaʼ bééhodzísingo áhodoolíłígíí tʼéiyá.”—Luke 10:22.

God átʼéhígíí Jesus éí nizhónígo yináłtʼé. Jesus éí áhą́dígo hazhéʼé beʼjíłʼı̨́. Ákótʼéego ájíní, “Tʼáá háiida shiiłtsánígíí éí aTaaʼ yiyiiłtsą́.” (John 14:9) Jesus ázhdííniidígíí dóó ájítʼínígíí éí Hazhéʼé beʼayóóʼóʼóʼniʼ beʼjíłʼı̨́įgo, éí binahjiʼ diné God yéédahoosįįh. Jesus ání, “Shí honítʼiʼii áádóó tʼáá aaníinii índa iiná nishłı̨́; diné doo łaʼ aTaaʼ yaa doogáał da, shí sheego tʼéiyá.” (John 14:6) Jesus ánáádíʼní: “Tʼáá aaníígóó nidahałáii éí . . . tʼáá aaníinii yee aTaaʼ yichʼįʼ nidahałáa dooleeł, háálá ákótʼéego aTaaʼ bichʼįʼ nidahałáa dooleełígíí haintá.” (John 4:23) Dooládóʼ nizhóní da! Jiihóvah tʼáá aaníinii átʼéhígíí yéédahodoosįįł, éí diné nigi ádaatʼéii, háidéezʼı̨́ı̨́ʼ.