AHÉʼÉSKÉEGI ahínaʼadloʼ yííʼáahgo ayóó átʼéego atíʼiiłʼįįh. Łaʼ bichʼooní bínaʼazloʼ ńtʼéeʼgo áádóó hashtʼeʼnitsínáníkéezgo yaa níjoozbaʼgo ahísiilkéegi hazhóʼó hashtʼéédoolnííł niizįįh. a Azhą́ ahéʼéskéegi hashtʼenályaa doodaiiʼ tʼáadoo da ndi, atélyaaígíí tsʼídá yéigo yínííł ábiʼdilyaa doo. Áko atélyaaígíí haitʼéego bíká aʼdoowoł?

Achʼooní naʼadloʼgo bee atídaalyaaígíí ayóó átʼéego bijéí daneezgai ndi, Diyin Bizaad bíká iilwoʼ. Diyin Bizaad yídahołʼaahgo Diyin éí dabinákʼeeshtoʼ yooʼı̨́ áádóó bijéí yineesgai.—Malachi 2:​13-16.

“Shijéí biʼdiiłʼáhígíí ląʼí yileehgo nitsʼą́ą́dóó bee hadaʼahóníinii tʼáá íiyisíí náshooshǫǫł.”—Psalm 94:​19, New World Translation.

“Kweʼé Diyin Bizaad yíníshtaʼgo danéshgai yę́ęgóó azhéʼé nahalingo éí doo neezgai da doo biniyé Jiihóvah shá yąą éʼélééh nisin łeh,” ní Bill.

“Aa aʼááh danízinii bichʼįʼ aa aʼááh nínízingo [Jiihóvah] íʼdíínílzin.”—Psalm 18:25.

Carmen éí hachʼooní honaʼaloʼgo díkwíí shı̨́ı̨́ nídeezid, ájíní: “Shichʼooní shinaʼazloʼ, ndi Jiihóvah éí shaa aʼááh nízin. Bí éí tsʼídá doo yóóʼashididooʼáał da.”

“Tʼáadoo haʼátʼíhída nihidaʼdiiłʼáhí, . . . tʼáá ałtsojįʼ sodizin índa náʼookąąh bee deínóhkeedígíí Diyin God bił béédahonohsin leʼ. Áko Diyin God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, . . . yaa áhályą́ą doo.”—Philippians 4:​6, 7.

Sasha ání: “Díí tʼáá áłahájįʼ néíníshtah. Tʼáá sodisziní sodiszingo Diyin éí achʼįʼ hózhǫ́ shichʼįʼ kwííłʼı̨́.”

Díí tʼáá ájíłtso haa dahaneʼígíí éí łahda doo yeeʼ bíighah da náádazhniidzįįh. Ndi Jiihóvah yadaʼólí, áádóó Bizaad yee dabidziil. Bill ání: “Tʼáá ałtsoní ałtso yanáałdááz nahalin shı̨́į ndi, sheʼoodląʼ binahjįʼ biniyé iináanii shił ííshjání áyiilaa. Azhą́ shı̨́ı̨́ ‘bikooh góyaa chahałheeł biiʼ chʼíníyá,’ ndi Diyin shił hólǫ́ǫgo éí biiʼ chʼíníyá.”—Psalm 23:4.