Kodi Baibulo Limavomereza Kuti Mwamuna ndi Mkazi Azikhalira Limodzi Asanakwatirane?
Zimene Baibulo Limanena
Baibulo limanena kuti Mulungu amafuna kuti anthu ‘azipewa dama.’ (1 Atesalonika 4:3) M’Baibulo, mawu akuti “dama” akuphatikizapo kuchita chigololo, kugonana kwa amuna kapena akazi okhaokha, komanso kugonana kwa mwamuna ndi mkazi omwe sanakwatirane.
N’chifukwa chiyani Mulungu amafuna kuti mwamuna ndi mkazi azikwatirana ngati akufuna kukhalira limodzi?
Mulungu ndi amene anayambitsa banja. Iye anayambitsa banja pa nthawi imene anakwatitsa mwamuna ndi mkazi oyambirira. (Genesis 2:22-24) Mulungu sankafuna kuti mwamuna ndi mkazi azikhalira limodzi popanda kukwatirana.
Mulungu amadziwa zomwe zingathandize anthu. Iye anakonza zoti anthu okwatirana azikhala limodzi moyo wawo wonse ndipo ankadziwa kuti zimenezi zidzathandiza komanso kuteteza anthu onse a m’banjalo. Taganizirani chitsanzo ichi: Kampani yopanga zinthu imapereka kabuku ka malangizo kothandiza munthu kudziwa mmene angalumikizire zinthu zomwe wagulazo. Mofananamo, malangizo amene Mulungu amatipatsa amathandiza mabanja kudziwa zoyenera kuchita kuti mabanja awo aziyenda bwino. Nthawi zonse anthu akamatsatira malangizo ochokera kwa Mulungu zinthu zimawayendera bwino.—Yesaya 48:17, 18.
Kampani yopanga zinthu imapereka kabuku ka malangizo kothandiza munthu kudziwa mmene angalumikizire zinthu zomwe wagulazo. Mofananamo, malangizo amene Mulungu amatipatsa amathandiza mabanja kudziwa zoyenera kuchita kuti mabanja awo aziyenda bwino.
Anthu omwe amagonana asanakwatirane amakumana ndi mavuto aakulu. Mwachitsanzo, amapereka kapena kutenga mimba yosakonzekera, amatenga matenda opatsirana pogonana, komanso amasowa mtendere. a
Mulungu analenga mwamuna ndi mkazi m’njira yoti azigonana n’cholinga choti azitha kubereka ana. Mulungu amaona kuti moyo ndi wopatulika ndipo kubereka ana ndi mphatso yamtengo wapatali. Iye amafuna kuti nafenso tiziona mphatso imeneyi kuti ndi yamtengo wapatali ndipo tingachite zimenezi mwa kulemekeza dongosolo la ukwati limene iye anakhazikitsa.—Aheberi 13:4.
Kodi anthu ayenera kukhala kaye limodzi pofuna kuona ngati ali oyenereranadi?
Kuti anthu akhale ndi banja la chimwemwe, sizoyenera kuti “akhale kaye limodzi kwa kanthawi pofuna kuyeserera” ndipo akaona kuti si oyenererana atha kusiyana. Koma chikondi chimakula ngati mwamuna ndi mkazi akuyesetsa kukhala okhulupirika komanso kuchita zinthu mogwirizana pothana ndi mavuto. b Ukwati ndi umene umathandiza kuti anthu okwatirana azikhala okhulupirika.—Mateyu 19:6.
Kodi mwamuna ndi mkazi angatani kuti akhale ndi banja lolimba?
Banja lililonse lili ndi mavuto. Ngakhale zili choncho, anthu okwatirana akamayesetsa kutsatira malangizo a m’Baibulo, banja lawo likhoza kumayenda bwino kwambiri. Onani zitsanzo zotsatirazi:
Musamangoganizira zofuna zanu koma muziganiziranso zofuna za mwamuna kapena mkazi wanu.—1 Akorinto 7:3-5; Afilipi 2:3, 4.
Muzikondana ndiponso kulemekezana kwambiri.—Aefeso 5:25, 33.
Muzisamala ndi zimene mumalankhula.—Miyambo 12:18.
Muzileza mtima komanso muzikhululuka mwamsanga.—Akolose 3:13, 14.
a Onani nkhani yakuti “Zimene Achinyamata Amadzifunsa . . . Bwanji Ngati Akundikakamiza Kuti Ndigone Naye?”
b Onani nkhani yakuti “Mfundo Zothandiza Kuti Banja Liziyenda Bwino—Kukhulupirika.”
Mwina Mungakondenso Kudziwa Izi
ANTHU OKWATIRANA KOMANSO MABANJA
Kodi Tiyambe Kukhala Limodzi Tisanakwatirane?
Anthu ena amaganiza kuti kuyamba kukhala limodzi kaye asanakwatirane kungawathandize kukonzekera banja. Kodi amenewa ndi maganizo abwino kapena pali njira ina yabwino?
GALAMUKANI!
Kodi N’kulakwa Kugonana Musanakwatirane?
Werenga nkhaniyi kuti mudziwe zimene Baibulo limanena zokhudza anthu amene amagonana kapena amene amachita zinthu zina zokhudza kugonana asanakwatirane.
KUYANKHA MAFUNSO A M’BAIBULO
Kodi Baibulo Limanena Zotani pa Nkhani ya Banja?
Mfundo za m’Baibulo zingathandize mwamuna ndi mkazi wake kuti apewe kapenanso kuthetsa mavuto am’banja lawo.
KUYANKHA MAFUNSO A M’BAIBULO
Kodi Baibulo Lingandithandize kuti Ndikhale ndi Banja Losangalala?
Malangizo anzeru ochokera m’Baibulo athandiza kale anthu mamiliyoni ambirimbiri kukhala ndi mabanja osangalala.
ZOKHUDZA IFEYO
Pemphani Kuti Tidzakuyendereni
Mutha kukhala ndi mwayi wokambirana nkhani inayake ya m’Baibulo kapena kudziwa zambiri zokhudza Mboni za Yehova.