Kodi M’Baibulo Mungapezeke Mawu Omwe Angandilimbikitse?
Yankho la m’Baibulo
Inde. (Aroma 15:4) Mwachitsanzo, taonani mfundo za m’Baibulo zomwe zili m’munsimu zomwe zathandiza anthu ambiri omwe akulimbana ndi mavuto komanso nkhawa zosiyanasiyana.
Zimene zili munkhaniyi
Mavuto
Salimo 23:4: “Ngakhale ndikuyenda m’chigwa cha mdima wandiweyani, sindikuopa kanthu, pakuti inu muli ndi ine.”
Mfundo yake: Tikamapemphera kwa Mulungu komanso kudalira Mawu ake opezeka m’Baibulo kuti atitsogolere, tikhoza kulimbana ndi mavuto athu.
Afilipi 4:13: “Pa zinthu zonse, ndimapeza mphamvu kuchokera kwa iye amene amandipatsa mphamvu.”
Mfundo yake: Mulungu akhoza kutipatsa mphamvu kuti tilimbane ndi vuto lililonse.
Imfa ya munthu amene tinkamukonda
Mlaliki 9:10: “Kulibe kugwira ntchito, kuganiza zochita, kudziwa zinthu, kapena nzeru, ku Manda kumene ukupitako.”
Mfundo yake: Anthu omwe anamwalira sakuvutika ndipo sangativulaze chifukwa sadziwa chilichonse.
Machitidwe 24:15: “Kudzakhala kuuka.”
Mfundo yake: Mulungu ali ndi mphamvu zodzaukitsa omwe anamwalira kuti adzakhalenso ndi moyo.
Kudziimba mlandu
Salimo 86:5: “Inu Yehova a ndinu Mulungu wabwino ndipo ndinu wokonzeka kukhululuka. Kukoma mtima kosatha kumene mumawasonyeza onse oitana pa inu ndi kwakukulu.”
Mfundo yake: Mulungu amakhululukira anthu omwe amadzimvera chisoni chifukwa cha zinthu zomwe analakwitsa ndiponso omwe ndi ofunitsitsa kuti asadzabwerezenso zomwe anachita.
Salimo 103:12: “Monga mmene kum’mawa kwatalikirana ndi kumadzulo, momwemonso, watiikira kutali zolakwa zathu.”
Mfundo yake: Mulungu akatikhululukira, amatiikira kutali machimo athu. Ndipo sakhalira kutikumbutsa zomwe tinalakwa ndi cholinga chofuna kutiimba mlandu kapena kutilanga.
Kukhumudwa
Salimo 31:7: “Mwaona kusautsika kwanga. Mwadziwa zowawa zimene zandigwera.”
Mfundo yake: Mulungu akudziwa bwino za mavuto omwe mukudutsamo. Amadziwanso bwino mmene mavutowo amakukhudzirani mumtima ngakhale pamene anthu ena sakuona zimenezo.
Salimo 34:18: “Yehova ali pafupi ndi anthu a mtima wosweka. Ndipo odzimvera chisoni mumtima mwawo amawapulumutsa.”
Mfundo yake: Mulungu akulonjeza kuti ndi wokonzeka kukuthandizani pamene muli wokhumudwa. Iye angathe kukupatsani mphamvu kuti mupirire.
Kudwala
Salimo 41:3: “Yehova adzachirikiza wonyozekayo pamene akudwala pabedi lake.”
Mfundo yake: Mulungu akhoza kukuthandizani pamene mukudwala kwambiri. Angachite zimenezi pokupatsani mtendere wamumtima, mphamvu zoti muthe kupirira komanso nzeru kuti mukwanitse kusankha bwino zoti muchite.
Yesaya 33:24: “Palibe munthu wokhala m’dzikolo amene adzanene kuti: ‘Ndikudwala.’”
Mfundo yake: Mulungu analonjeza kuti m’tsogolomu anthu onse adzakhala ndi moyo wathanzi.
Nkhawa komanso kuvutika maganizo
Salimo 94:19 “Malingaliro osautsa atandichulukira mumtima mwanga, Mawu anu otonthoza anayamba kusangalatsa moyo wanga.”
Mfundo yake: Tikamadalira Yehova pamene tili ndi nkhawa, Iye angatithandize kuti tikhazikitse maganizo athu m’malo.
1 Petulo 5:7: ‘Mutulireni nkhawa zanu zonse, pakuti amakuderani nkhawa.’
Mfundo yake: Mulungu amatidera nkhawa tikamavutika. Iye amatilimbikitsa kuti tizipemphera kwa iye n’kumuuza zomwe zikutidetsa nkhawa.
Nkhondo
Salimo 46:9: “Akuletsa nkhondo mpaka kumalekezero a dziko lapansi.”
Mfundo yake: Posachedwa, Ufumu wa Mulungu udzathetsa nkhondo zonse.
Salimo 37:11, 29: “Anthu ofatsa adzalandira dziko lapansi, ndipo adzasangalala ndi mtendere wochuluka. . . . Olungama adzalandira dziko lapansi, ndipo adzakhala mmenemo kwamuyaya.”
Mfundo yake: Anthu abwino adzakhala mwamtendere padziko lapansi mpaka kalekale.
Kudera nkhawa zam’tsogolo
Yeremiya 29:11: “Maganizo anga kwa inu ndikuwadziwa bwino. Ndikuganizira zokupatsani mtendere osati masoka, kuti mukhale ndi chiyembekezo chabwino ndiponso tsogolo labwino,’ watero Yehova.”
Mfundo yake: Mulungu akutsimikizira anthu ake kuti adzawapatsa tsogolo labwino kwambiri.
Chivumbulutso 21:4: “Adzapukuta misozi yonse m’maso mwawo, ndipo imfa sidzakhalaponso. Sipadzakhalanso kulira, kapena kubuula, ngakhale kupweteka. Zakalezo zapita.”
Mfundo yake: Mulungu akulonjeza kuti adzachotsa zinthu zonse zoipa zomwe timaziona komanso kukumana nazo masiku ano.
a Yehova ndi dzina lenileni la Mulungu. (Salimo 83:18) Werengani nkhani yakuti, “Kodi Yehova Ndi Ndani?”
Mwina Mungakondenso Kudziwa Izi
NSANJA YA OLONDA
Kodi Kudziwa Zoti Mulungu Amatiganizira Kungatithandize Bwanji?
Malemba amatithandiza kuti tikhale ndi chikhulupiriro choti Mulungu adzakwaniritsa zimene watilonjeza.
KUYANKHA MAFUNSO A M’BAIBULO
Kodi Chiyembekezo Ndingachipeze Kuti?
Malangizo odalirika angakuthandizeni kuti muzisangalala komanso kuti muziyembekezera zinthu zabwino mtsogolo.
NKHANI ZINA
Uthenga Wotonthoza Anthu Omwe Aferedwa
Munthu amene tinkamukonda akamwalira, tingaganize kuti palibe amene akutimvetsa mmene tikumvera. Koma Mulungu amatimvetsa ndipo ndi wokonzeka kuti atithandize.
NSANJA YA OLONDA
Mukamaona Kuti Simungathenso Kupirira
Ngakhale kuti tikukumana ndi mavuto, pali chifukwa chokhalira ndi moyo.
MFUNDO ZOFUNIKA ZA M'BAIBULO
N’chifukwa Chiyani Mulungu Amalola Kuti Anthu Azivutika?
Anthu ambiri amafuna kudziwa kuti n’chifukwa chiyani padzikoli pali mavuto ambiri. Baibulo limapereka yankho logwira mtima pa nkhaniyi.
ZIMENE BAIBULO LIMAPHUNZITSA
Yambani Kuphunzira Baibulo
Phunzirani Baibulo kwaulere, mochita kukambirana ndi mphunzitsi wanu.